Ka ken Bibilo tseegh atesen ase cii a dugh ye. Nahan ka sea seer zuan a mkav sha kwagh u ken Ruamabera shi a wanger se wang yô, i gba u se nyôôso atesen ase. a

 Ieren yase i nyôôso atesen la zua sha kwagh u i er ken Anzaakaa 4:18 la. Ivur ne kaa ér: “Gbenda u orperapera ngu er iwanger i sha use nahan, ngi seer a seer zan hemen zan zan mkende u iyange sha sha tembe.” Er iyange ka ia kenden sha kure kure ve se hemban nengen a akaa ken ica wang nahan, kape Aôndo ka a naan se mkav sha akaaôron a na a mimi kure kure, sha ashighe a a nenge i doo un je la. (1 Peteru 1:10-12) Ngu hemban eren kwagh ne sha “shighe u mkur” u se lu ker ne, er yange Bibilo tsengaôron nahan.—Daniel 12:4.

 Shighe u se nyôôso mkav wase sha kwagh u Bibilo i tese yô, i de kpiligh se iyol ga, shi i de ze se iyol kpaa ga. Mbacivir Aôndo mba sha ashighe a tsuaa la kpa ashighe agen yange ve kav kwagh sha gbenda u vough ga, shin ve lu a ishimaverenkeghen i vough ga, nahan i gba u vea hide a nyôôso mnenge ve la. Nenge ase ikyav:

•   Mose yange tsua iyol na ér una yima ikyurior i Iserael, kpa shighe u Aôndo ver u yiman ve la gema shi anyom 40 ken hemen.—Aerenakaa 7:23-25, 30, 35.

•   Yange mbaapostoli kav kwaghôron u profeti u tsengaôron kwagh u ku u Mesiya man nder na u shin ku la ga.—Yesaia 53:8-12; Mateu 16:21-23.

•   Yange Mbakristu mbagenev sha ayange a mbaapostoli la kav shighe u “iyange i Ter” ia va la sha gbenda u vough ga.—2 Mbatesalonika 2:1, 2.

Shighe kar yô, Aôndo wase ve, nahan ve zua a mkav u vough sha akaa la, se kpa ka se eren msen ser Aôndo a za hemen u wasen se sha imba gbenda la.—Yakobu 1:5.