1, 2. Ехова гуллукчыларына нәдип гөркезме берйәр?

ЕХОВА хемише өз халкына гөркезме берйәр. Гечмишде Худай перишделер, гөрнүш я-да дүйш аркалы болҗак затлары адамлара өңүнден хабар берйәрди. Шейле-де ол гуллукчыларына юмуш табшырярды (Сан. 7:89; Эзек. 1:1; Дан. 2:19). Кәбир ягдайларда Ехова гөркезмесини ердәки гурамасының агзалары аркалы берйәр. Худайың халкы онуң гөркезмесини нәхили усул билен алса-да, оңа эерип берекет аляр.

² Шу гүнлер Ехова халкына Мукаддес Язгылар, мукаддес рухы ве йыгнак душушыклары аркалы гөркезме берйәр (Рес. иш. 9:31; 15:28; 2 Тим. 3:16, 17). Худайың берйән гөркезмеси шейле айдың боляр велин, биз: «„Ёл будур, шундан йөрәң“ диен сеси эшиден» ялы болярыс (Иш. 30:21). Аслында, Ехова йыгнагың башы эдип Исаны белледи ве ол «садык хем акыллы хызматкәриң» үсти билен бизе гөркезме берйәр (Мат. 24:45). Биз эбеди яшайыш сылагыны алмак үчин, Худайың берйән шол гөркезмесине гулак асмалы (Евр. 5:10).

3. Ехованың гөркезмесине эермәге бизе нәмелер пәсгел берйәр? (Макаланың башындакы сурата середиң).

³ Шейтан Иблис бизи Ехованың яшайыш берйән гөркезмесине эертмеҗек боляр. Галыберсе-де, бизиң «хилегәр» йүрегимиз Ехова долы гулак асасы гелмейәр (Ер. 17:9). Шол себәпли, гелиң, Худайың сесини эшитмәге  пәсгел берйән затлара нәдип гаршы дуруп боляндыгына середелиң. Шейле-де әхли ягдайларда Ехова гулак асып, дога этмегиң онуң билен достлугымызы сакламага нәдип көмек эдйәндигини билелиң.

4. Шейтан адамларың ой-пикирлерине нәдип тәсир этҗек боляр?

⁴ Шейтан ялан маглуматлар ве нәдогры гарайышлар аркалы адамларың ой-пикирлерине тәсир этҗек боляр (1 Яхя 5:19-ы окаң). Бүтин дүнйәде газетлер, китап-журналлар, радио, телегеплешиклер ве Интернет аркалы дүрли маглуматлар яйрадыляр. Олар гызыклы ялы гөрүнсе-де, көпленч Ехованың када-канунларына гаршы гелйән затлары өңе сүрйәр (Ер. 2:13). Мысал үчин, тәзеликлерде ве гөвначма геплешиклеринде бир җынсдакы адамларың никалашмагыны адаты зат ялы эдип гөркезйәрлер. Көп адамлар Мукаддес Язгыларда гомосексуализм барада айдылян затлары көнелишен хасаплаярлар (1 Кор. 6:9, 10).

5. Шейтаның яйрадян нәдогры гарайышларының тәсирине дүшмез ялы нәме этмели?

⁵ Худайың догрулыгыны сөййән адамлар Шейтаның яйрадян нәдогры гарайышларының тәсирине дүшмез ялы нәме этмели? Олара ягшыны-яманы сайгармага нәме көмек эдер? Мунуң үчин Мукаддес Язгыларда айдылян затлара эермели (Зеб. 119:9). Худайың Сөзүнде хакыкаты яландан сайгарып билер ялы әхли герекли гөркезмелер берилйәр (Сүл. тым. 23:23). Иса: «Адам... Худайың агзындан чыкан хер бир сөз билен хем яшаяндыр» дийди (Мат. 4:4). Шол себәпли биз Мукаддес Язгыларың принциплерини дурмушымызда нәдип уланмалыдыгыны өвренмели. Меселем, Юсуп атлы яш йигит Худайың зына барада энтек язылгы кануны болмаса-да, зына этмегиң гүнәдигине дүшүнйәрди. Потыпарың аялы Юсуба гүнә этдирҗек боланда, ол Ехова гулак асмазлык барада асла пикирем этмәнди (Гелип чыкыш 39:7—9-нҗы аятлары окаң) *. Бу аял оны бирнәче гезек ырҗак болса-да, Юсуп оңа дәл-де, Ехова гулак асды. Биз ягшыны ямандан сайгармак үчин, Ехованың сесине гулак асып, Шейтаның яйрадян нәдогры гарайышларына гулак габартмалы дәл.

6, 7. Шейтаның эрбет маслахатларына эермез ялы нәме этмели?

⁶ Шейтаның дүнйәси бири-бирине гаршы гелйән ялан дини дүшүнҗелерден ве таглыматлардан долы. Шол себәпли көп адамлар хакыкы дини тапып болмаяр диййәрлер. Эмма Ехова хөвес билен гулак асян адамлара айдың  гөркезме берйәр. Биз киме гулак асҗакдыгымызы өзүмиз сайламалы. Адам шол бир вагтың өзүнде ики сеси диңләп билмейәр. Шонуң үчин биз Исаның «сесини танап», оңа гулак асмалы. Себәби Ехова Исаны гоюнларына чопан эдип белледи (Яхя 10:3—5-нҗи аятлары окаң).

⁷ Иса: «Эшидйәнлериңизе үнс бериң» дийди (Мар. 4:24). Ехованың берйән айдың ве догры маслахатларыны йүрекден кабул этмек үчин, олара үнсли болуп, гулак асмалы. Эгер биз сересап болмасак, Ехованың сөйги билен берйән маслахатларыны диңлемән, гайтам, Шейтаның эрбет маслахатларына гулак габардарыс. Шол себәпли, гелиң, бу дүнйәдәки айдым-сазларың, фильмлериң, телегеплешиклериң, китапларың, дост-ярларың, мугаллымларың ве шонуң ялы адамларың бизиң дурмушымыза тәсир этмегине ёл бермәлиң! (Кол. 2:8).

8. a) Биз нәдип Шейтаның дузагына дүшүп билерис? б) Йүрегимизе тәсир эдйән затлара бипарх гарасак нәме болар?

⁸ Шейтан бизиң гүнәли хөвеслеримизиң бардыгыны билип, олары канагатландырмага итерйәр. Иблис бизиң гүнәли хөвеслеримизи ояранда, Худая вепалы галмак кын боляр (Яхя 8:44—47). Биз муңа нәдип дөз гелип билерис? Адам нәмедир бир зады хич хачан этмерин дийип пикир этсе-де, гүнәли хөвеслерине ёл берсе, оны эдип билйәр (Рим. 7:15). Муңа нәме себәп боляр? Ол юваш-ювашдан Ехованың сесине үнс бермән башлаяр я-да йүрегине тәсир эдйән эрбет затлара бипарх гараяр. Я-да ол дога этмегини бес эдйәр, ыхласлы вагыз этмейәр ве йыгнак душушыкларына ызыгидерли бармаяр. Нетиҗеде, ол хөвеслерине эерип, билгешлейин гүнә эдйәр. Биз шейле ягдая дүшмез ялы йүрегимизе тәсир эдйән эрбет затлара үнсли болуп, айгытлы херекет этмели. Галыберсе-де, биз Ехованың сесине гулак ассак, имандан дәнен адамларың гарайшыны рет эдерис (Сүл. тым. 11:9).

9. Гүнәли хөвесимизиң бардыгыны дуян бадымыза нәме үчин айгытлы херекет этмели?

⁹ Адам агыр кеселиниң бардыгыны билен бадына, беҗерги алып башласа, җаныны халас эдип билйәр. Шонуң ялы-да, биз гүнәли хөвесимизиң бардыгыны дуян бадымыза, айгытлы херекет этсек, дирилигимизе Шейтаның элине дүшмерис ве онуң «ислегини ерине етирмерис» (2 Тим. 2:26). Эгер биз пикиримизиң ве ислегимизиң Худайың талапларына лайык гелмейәндигини билсек нәме этмели? Биз хаял этмән, песгөвүнлилик билен Худая дөнмели ве онуң гөркезмесине гулак асып, йүрекден кабул этмели  (Иш. 44:22). Биз кәбир меселелерде нәдогры карара гелсек, онуң нетиҗесиниң эрбет болуп, залым дүнйәниң соңуна ченли эҗир чекҗекдигимизе дүшүнмели. Шол себәпли шейле ялңышлыкларың деррев өңүни алсак нәхили пайхаслы боларды!

10, 11. а) Биз нәдип текепбир болуп билерис? б) Биз Кора, Датан ве Абырамың мысалындан нәхили сапак эдинип билерис?

¹⁰ Йүрегимиз бизи Еховадан дашлашдырып билйәр. Меселем, текепбирлик ве ачгөзлүк барада ойланып гөрелиң. Бу хәсиетлер бизи гүнә этмәге итерип билер. Текепбир адам өзүни хеммелерден ёкары тутуп, ислән задыны эдип билйәндирин өйдйәр. Ол маңа нәме этмелидигини айтмага хич кимиң хакы ёк дийип пикир эдйәр. Текепбир адам месихчилериң, йыгнак яшулуларының, хатда Ехованың гурамасының берйән маслахатларына-да гулак асмаяр. Ол Еховадан дашлашып, Худайың сесини сайгарып билмейәр.

¹¹ Гадымы дөвүрде ысрайыллылар чөлде гөчүп-гонуп йөркә, Кора, Датан ве Абырам Муса билен Харуна гаршы питне туруздылар. Питнечилер текепбирлигинден яңа, Ехова өзлериниң ислейши ялы сежде этмек иследилер. Бу Ехова нәхили тәсир этди? Ол питнечилери өлдүрди (Сан. 26:8—10). Биз мундан говы сапак эдинип билерис. Ехова гаршы питне турузмак хеләкчилиге элтйәр. Шол себәпли, гелиң, «хеләкчиликден өң текепбирлик... гелйәндигини» ятдан чыкармалың! (Сүл. тым. 16:18; Иш. 13:11).

12, 13. а) Ачгөзлүгиң хеләкчилиге элтйәндигини мысал аркалы дүшүндириң. б) Ачгөзлүги айырмасак, ол йүрегимизи нәдип чалт эеләп билер?

¹² Ачгөзлүк хем ховплудыр. Ачгөз адам көпленч Ехованың гөркезмесини өзүне дегишли хасапламаяр. Ол өзүниңки болмадык зады алып билйәндирин өйдйәр. Эляша пыгамбер арамлыларың гошун серкердеси Нагаманы пис ачма кеселинден сагалдяр. Шонда Нагаман Эляша пыгамбере совгат берҗек боланда, ол оны алмаяр. Эмма Эляшаның хызматкәри Гейхазы шол совгатлары алмак ислейәр. Ол: «„Ребден ант ичйәрин, мен онуң (Нагаманың) ызындан ылгап гидип, ондан бир затлар алайын“ диен пикире гелйәр». Гейхазы Эляша хич зат диймән, Нагаманың ызындан етип, оңа ялан сөзлейәр ве «бир ярым батман төвереги күмүш билен ики лай эшик» сораяр. Гейхазының ачгөзлүк эдип, Ехованың пыгамберине ялан сөзләндиги үчин нәме болды? Нагаманың ёканчлы дери кесели оңа гечди! (2 Пат. 5:20—27).

¹³ Ачгөзлүк кичи затдан башланяр. Эмма оны деррев айырмасаң, ол адамың йүрегини чалт эелейәр. Мукаддес Язгыларда Аканың ачгөзлүги барада айдыляр. Гелиң, ачгөзлүгиң Аканың йүрегини нәдип чалт эеләндигине середелиң. Ол шейле диййәр: «Мен олҗа алнан затларың арасындан овадан Шингар донуны, бәш гадак күмүш хем-де аграмы бир ярым гадак болан алтын токгасыны гөренимде, гөзүм гидип, олары огурладым». Акан пәлинден гайтман, ачгөзлүк билен огурлык эдйәр ве алан затларыны чадырында гизлейәр. Аканың эден ишиниң үсти ачыланда, Ешува Ехованың оңа бетбагтчылык индирҗекдигини айдяр. Шол гүни Аканы ве онуң машгаласыны дашлап өлдүрйәрлер (Еш. 7:11, 21, 24, 25). Биз хем сересап болмасак, Акан ялы ачгөзлүгиң дузагына дүшүп билерис. Шол себәпли биз «өзүмизи хер хили бетнебисликден горамалы» (Лука 12:15). Ахлаксызлык хем ачгөзлүгиң бир гөрнүшидир. Эгер биз кәте эрбет затлар барада пикир эдйән болсак, ярамаз ислеглеримиз бизе гүнә этдирмез ялы, олара гаршы дурмалы (Якуп 1:14, 15-нҗи аятлары окаң).

14. Биз өзүмизде текепбирлигиң я-да ачгөзлүгиң бардыгыны дуйсак нәме этмели?

 ¹⁴ Текепбирлигем, ачгөзлүгем хеләкчилиге элтйәр. Эрбет ишлериң нетиҗеси барада өңүнден ойланмак, Ехованың сесини диңлемәге көмек эдйәр (Кан. таг. 32:29). Хак Худай Мукаддес Язгылар аркалы бизе диңе бир догры ёлы гөркезмән, эйсем, ондан йөремегиң пейдалыдыгыны хем дүшүндирйәр. Шейле-де Ехова нәдогры ёлдан йөремегиң эрбетлиге элтйәндигини айдяр. Шол себәпли бизиң йүрегимиз текепбирлик я-да ачгөзлүк билен хайсыдыр бир эрбет зады этдирҗек болса, онуң нетиҗеси барада ойлансак пайхаслы болар. Биз эрбет херекетимизиң өзүмизе, якынларымыза, эсасан-да, Ехова билен достлугымыза нәхили тәсир этҗекдиги барада ойланмалы.

15. Биз Исаның Ехова билен гатнашыгындан нәме өвренип билйәрис?

¹⁵ Ехова бизиң багтлы яшамагымызы ислейәр (Зеб. 1:1—3). Ол бизе герек вагты догры гөркезме берйәр (Еврейлер 4:16-ны окаң). Иса кәмил болса-да, Худай билен якын гатнашыкда болуп, дынгысыз дога эдйәрди. Ехова оны тәсин усуллар аркалы голдап, гөркезме берйәрди. Худай Иса хызмат эдер ялы перишделерини иберди, мукаддес рухы аркалы көмек этди ве 12 ресулыны сайланда, оңа гөркезме берди. Шейле-де Ехова гөкден гүрләп, Исаны голдаяндыгыны ве ондан разыдыгыны айтды (Мат. 3:17; 17:5; Мар. 1:12, 13; Лука 6:12, 13; Яхя 12:28). Иса ялы биз хем Худая дога эдип, йүрегимизи дөкмели (Зеб. 62:7, 8; Евр. 5:7). Дога бизе Ехова билен якын гатнашыкда болмага ве оны шөхратландырып яшамага көмек эдйәр.

16. Ехова сесини диңлемәге бизе нәдип көмек эдйәр?

¹⁶ Ехова бизе маслахат берсе-де, оңа эермәге меҗбур этмейәр. Биз онуң мукаддес рухуны дилесек, ол оны җомартлык билен берйәр (Лука 11:10—13-нҗи аятлары окаң). Биз, эсасанам, «эшидишимизе үнс бермели» (Лука 8:18). Меселем, Еховадан ахлаксызлыга гаршы гөрешмәге көмек этмегини диләп, өзүмиз болса порнография я-да ахлаксыз фильмлери гөрсек, икийүзлүлик этдигимиз боларды. Биз Ехованың көмегини алмак үчин, онуң рухуның бар ерлерине, меселем, йыгнак душушыкларына бармалы. Худайың гуллукчыларының көпүси йыгнак душушыкларында Ехованы диңләп, көп бетбагтчылыкдан гача дурдулар. Олар гүнәли хөвеслерини йүреклеринден согруп, догры ёла дүшдүлер (Зеб. 73:12—17; 143:10).

17. Өзүңе бил багламак нәме үчин ховплы?

¹⁷ Гелиң, гадымы Ысрайылың патышасы Давудың мысалына середелиң. Ол етгинҗек огланка, Җалут атлы пилиштли әпет пәлваны еңди. Давут халкың эсгери, патышасы, горайҗысы ве ёлбашчысы болды. Эмма Давут өзүне бил багланда, йүрегиниң алдавына дүшүп, Батшеба билен зына этди. Ол хатда онуң янёлдашы Урыяны хем өлдүртди. Ехова Давуды дүзеденде, ол кичигөвүнлилик билен гүнәсини боюн алып, Ехова билен гатнашыгыны дикелтди (Зеб. 51:4, 6, 10, 11).

18. Ехованың сесини хемише диңлемәге бизе нәме көмек эдер?

¹⁸ Гелиң, әхлимиз 1 Коринтослылар 10:12-дәки маслахата эерелиң ве өзүмизе гөвнүетиҗи болмалың. «Догры әдим басмагың ыгтыярымызда дәлдиги» үчин, биз я Ехованың, я-да Шейтаның сесини диңлейәрис (Ер. 10:23). Шол себәпли биз дынгысыз дога эдип, мукаддес рухуң гөркезмесине эерип, Ехованың сесини хемише үнсли диңлемели.