1. Ынсаның догабитди нәхили ислеги бар ве оны кимлер канагатландырып билйәр?

ЫНСАНЫҢ башга адамлар билен якындан гатнашмага догабитди ислеги боляр. Кәбир адамларың айтмагына гөрә, бири-бириңи ичгин танап, йүрекден говы гөрениңде, бирек-биреге ыснышярсың. Машгала агзаларымыз ве достларымыз бизи сөенде, гадырымызы биленде ве ягдайымыза дүшүненде өзүмизи багтлы дуйярыс. Эмма биз, эсасанам, Бейик Ярадыҗымыз билен достлугымызы беркитмели (Ваг. 12:1).

2. Ехова бизе нәме вада берйәр, эмма көп адамлар нәме үчин муңа ынанмаярлар?

² Ехова Мукаддес Язгыларда өзүне «якынлашмага» чагыряр. Шейле этсек, онуң хем бизе «якынлашҗакдыгыны» вада берйәр (Якуп 4:8). Бу бизи бегендирмейәрми нәме?! Эмма көп адамлар Худайың бизе якынлашмак ислейәндигине ынанмаярлар. Олар өзлерини Худая якынлашмага мынасып гөрмейәрлер я-да Худай бизден хас узакда дийип пикир эдйәрлер. Аслында, Ехова якынлашып болярмы?

3. Биз Ехованың нәхили Худайдыгына ынанмалы?

³ Ехова өзүни агтарянларың «хич биринден узакда дәлдир»; оны якындан танап боляр (Ресулларың ишлери 17:26, 27; Зебур 145:18-нҗи аятлары окаң). Ехова Худай хатда бикәмил адамларың хем оңа якынлашмагыны ислейәр.  Ол мерхемети билен олары дост хөкмүнде кабул этмәге хемише-де тайындыр (Иш. 41:8; 55:6). Муңа гөз етирен мезмурчы Ехова барада шейле дийди: «Әхли адамзат догалары эшидйән Саңа гелйәр... Сайлан адамың, Өзүңе якынлашдыран адамың, гөр, не багтлы!» (Зеб. 65:2, 4). Гелиң, Мукаддес Язгыларда агзалян Яхуда патышасы Асаның мысалындан Худая якынлашян адамлара Ехованың нәхили гараяндыгыны билелиң *.

4. Аса патыша ехудылара нәхили гөрелде гөркезди?

⁴ Аса патышаның хөкүм сүрйән дөврүнде юртда ахлаксызлык ве бутпаразлык гиңден яйрапды. Аса ыбадатхананы бу затлардан арассалап, хакыкы сеждә болан ыхласыны гөркезди (1 Пат. 15:9—13). Ол халка йүзленип: «Аталарымызың Худайы Ребби агтарып, Онуң кануныны ве табшырыкларыны берҗай эдиң» дийди. Ехова Асаның хөкүмдарлыгының илкинҗи он йылыны парахатлык берип берекетледи. Аса парахатчылыгы Ехованың берйәндигине дүшүнип, халка шейле дийди: «Биз Оны агтардык, Ол бизе хер тарапдан асудалык берди» (2 Йыл. 14:1—7). Гелиң, соңра нәме боландыгыны билелиң.

5. Аса хайсы ягдайда Ехова бил баглады ве нетиҗеси нәме болды?

⁵ Өзүңи Асаның ерине гоюп гөр. Эфиопиялы Зера бир миллион эсгери ве 300 гошун арабасы билен Яхуда хүҗүм этмәге гелйәр (2 Йыл. 14:8—10). Шейле әгирт улы гошуның сениң патышалыгыңа чозуп гелйәндигини гөрениңде, өзүңи нәхили дуярдың? Сениң гошуныңда болса, бары-ёгы 580 мүң эсгер бар! Шонда сен Худайың ики эссе көп гошуның хүҗүм этмегине нәме үчин ёл берендигине гең галармыдың? Шейле чыкгынсыз ягдайда өз дүшүнҗәңе бил баглардыңмы? Аса патышаның эден херекети онуң Ехова бил баглаяндыгыны ве онуң билен якын дост боландыгыны гөркезди. Ол Ехова гызгын дога эдип шейле дийди: «Эй Ехова Худайымыз, бизе ярдам эт, чүнки биз саңа бил баглаярыс. Сениң адың билен биз бу уммасыз гошуның гаршысына чыкдык. Эй Ехова, сен бизиң Худайымызсың, ынсана сенден үстүн чыкмага ёл берме». Худай Асаның йүрекден эден дилегине нәхили җогап берди? Ехова «эфиопиялыларың барыны гырып, екеҗесини хем дири галдырмады» (2 Йыл. 14:11—13, ТД).

6. Биз Асаның гөрелдесине нәдип эерип билерис?

⁶ Аса патыша Худайың гөркезме берҗекдигине ве гораҗакдыгына нәме үчин ынанярды? Мукаддес Язгыларда Асаның «Реббиң назарында догры ишлери эдендиги» ве бүтин йүреги билен Худая бил багландыгы айдыляр (1 Пат. 15:11, 14). Бизем Ехова Худая бүтин йүрегимиз билен гуллук этсек, хәзир хем, гелеҗекде хем онуң билен дост боларыс. Ехованың бизи өзүне чекйәндигине ве онуң билен достлашмага көмек эдйәндигине дийсең бегенйәрис! Гелиң, хәзир Ехованың бизи өзүне хайсы ики усул билен якынлашдыряндыгына середелиң.

7. a) Ехова бизи өзүне якынлашдырмак үчин нәме эдйәр? б) Худай, айратынам, бизи нәме аркалы өзүне якынлашдыряр?

⁷ Ехова ынсан машгаласына овадан Ери совгат берип, сөйгүсини гөркезди. Ол хәзирем бизи яшайыш үчин герекли затлар билен үпҗүн эдип, сөйгүсини билдирйәр (Рес. иш. 17:28; Ылх. 4:11). Ехова, эсасанам, бизиң рухы  зерурлыкларымызың аладасыны эдйәр (Лука 12:42). Шейле-де ол бизиң эдйән догаларымызы диңе өзи диңлейәр (1 Яхя 5:14). Эмма Худай, айратынам, төлег гурбаны аркалы бизи өзүне якынлашдырып, сөййәндигини гөркезйәр (1 Яхя 4:9, 10, 19-нҗы аятлары окаң). Ехова бизи гүнәден ве өлүмден азат этмек үчин, өзүниң «екеҗе Оглуны» ер йүзүне иберди (Яхя 3:16).

8, 9. Ехованың ниетинде Исаның нәхили орны бар?

⁸ Ехова хатда Месихден өң яшан адамлара-да төлег гурбанындан пейдаланмага мүмкинчилик берди. Ехова адамзадың Халасгәри барада пыгамберлик эденде, ол төлеги эййәм төленен хасаплаярды. Себәби ол ниетини амала ашырмага хич задың пәсгел берип билмеҗекдигини билйәрди (Гел. чык. 3:15). Шондан бирнәче асыр геченсоң, Павлус ресул Иса Месихиң төлег гурбаны үчин Худая миннетдарлык билдирип: «Ол (Худай)... Өз сабры астында йүзе чыкан гүнәлери өтди» дийди (Рим. 3:21—26). Догрудан-да, бизиң Худай билен достлашмагымызда Исаның ваҗып орны бар.

⁹ Кичигөвүнли адамлар диңе Иса аркалы Ехованы танап, онуң билен достлашып, шатлык тапып билйәрлер. Мукаддес Язгылар муны нәдип тассыклаяр? Павлус ресул: «Худай бизе болан сөйгүсини, биз энтек гүнәкәркәк, Месихиң бизиң угрумызда өлмеги билен гөркезди» дийди (Рим. 5:6—8). Ехова Исаның төлег гурбаныны бизиң мынасып боланымыз үчин дәл, эйсем, бизи сөййәндиги үчин берди. Иса: «Мени иберен Атам чекмесе, хич ким Мениң яныма гелип билмез» дийди. Шейле-де ол: «Менсиз хич ким Ата барып билмез» дийди (Яхя 6:44; 14:6). Ехова Иса аркалы адамлары өзүне чекип, Худайың сөйгүсинде галмага ве эбеди яшайша умыт этмәге нәдип көмек эдйәр? Ол гуллукчыларына мукаддес рухуны берйәр (Яхуда 20, 21-нҗи аятлары окаң). Гелиң, инди Ехованың ене-де нәхили усул билен бизи өзүне якынлашдыряндыгыны билелиң.

10. Мукаддес Язгылар бизе Худая якынлашмага нәдип көмек эдйәр?

¹⁰ Биз шу макаланың ёкаркы абзацларында Мукаддес Язгыларың 14 саны китабына салгыландык. Мукаддес Язгылар болмадык болса, биз Ярадыҗымыза якынлашып боляндыгыны билермидик? Шейле-де биз төлег гурбаны ве Иса аркалы Ехова билен достлашып боляндыгыны нәдип билердик? Ехова рухы аркалы Мукаддес Язгылары яздырып, өзүниң аҗайып хәсиетлерини ве бейик ниетини аян этди. Мысал үчин, Мүсүрден чыкыш 34:6, 7-нҗи аятларда Ехова Муса пыгамбере шейле дийди: «Мен... рехимли ве мерхеметли Худайдырын. Мен гиң гөвүнли, сөйгә, вепадарлыга бай. Мүңлерче несиллере бакы сөйгими гөркезерин. Этмиши, языгы ве гүнәни багышлаярын». Эйсем, шейле Худай билен кимиң достлашасы гелмейәр?! Ехова бизиң Мукаддес Язгылардан ол барада нәче көп билдигимизче, онуң дири Худайдыгына гөз етирип, оңа якынлашҗакдыгымызы билйәр.

11. Ехованы танамак нәме үчин ваҗып? (Макаланың башындакы сурата середиң).

¹¹ Биз адамы якындан танап, гылык-хәсиетлерини говы гөренимизде, онуң билен достлашярыс. Шонуң ялы-да, Худай билен достлашмак үчин Мукаддес Язгылардан онуң хәсиетлерини билип, оны танамалы. Ехованың Мукаддес Язгылары бизе дүшнүкли эдип яздырандыгына өрән миннетдардырыс!

12. Ехова нәме үчин Мукаддес Язгылары адамлара яздырды?

¹² Ехова Мукаддес Язгылары перишделере-де яздырып билерди. Аслында,  олар бизиң өзүмиз ве эдйән ишлеримиз билен өрән гызыкланяр (1 Пет. 1:12). Элбетде, перишделер Худайың хабарыны адамлар үчин язып билерди. Эмма олар әхли зада ынсаның гарайшы ялы гарап билердими? Олар бизиң зерурлыкларымызы, эҗизликлеримизи ве ислеглеримизи дүшүндирип билердими? Ёк, Ехова оларың муны башармаҗакдыгыны билйәр. Шол себәпли Худай Мукаддес Язгыларың бизе хас дүшнүкли болмагы үчин, оны адамлара яздырды. Биз Мукаддес Язгыларда агзалян ве оны язан адамларың пикирлерине ве дуйгуларына дүшүнйәрис. Шейле-де биз оларың лапыкечлигине, шүбхесине, горкусына, бикәмиллигине дең гынанып, бегенҗине ве үстүнлигине шатланярыс. Ыляс пыгамберде-де, Мукаддес Язгылары язан адамларың әхлисинде-де «бизиңки ялы дуйгулары» барды (Якуп 5:17).

13. Юнус пыгамбериң эден догасы сениң йүрегиңе нәхили тәсир эдйәр?

¹³ Гелиң, Юнус пыгамбериң мысалына середелиң. Ол Худайың берен юмшуны ерине етирмеҗек болуп гачып гидйәр. Шонда Юнусың нәхили дуйгулары башдан гечирендигини перишде долы беян эдип билердими? Ехованың Юнус пыгамбериң башындан гечирен вакаларыны, деңзиң дүйбүнде эден гызгын догасыны онуң өзүне яздырмагы, гөр, нәхили пайхаслы! Юнус догасында: «Я Реб, җандан умыт үзенимде, Сени чагырдым» дийди (Юнус 1:3, 10; 2:1—9).

14. Биз Ишая пыгамбериң ягдайына нәме үчин говы дүшүнйәрис?

¹⁴ Гелиң, инди Ишая пыгамбериң язан сөзлери барада ойланалың. Ол гөрнүш аркалы Ехованың шөхратыны гөренде, өзүниң бикәмиллиги барада шейле дийди: «Мениң дат гүнүме! Мен хеләк болдум, чүнки мен агзы харам адамдырын ве агзы харам адамларың  арасында яшаярын. Ине, гөзлерим Шаны–Хөкмүрован Ребби гөрди» (Иш. 6:5). Шейле сөзлери перишде хич хачан айтмазды! Биз хем Ишая пыгамбер ялы гүнәлидигимиз үчин, онуң ягдайына говы дүшүнйәрис.

15, 16. a) Биз адамларың дуйгуларына нәме үчин дүшүнйәрис? Мысал гетириң. б) Худай билен достлашмага бизе нәме көмек эдйәр?

¹⁵ Перишделер Якуп ялы өзүниң «мынасып дәлдигини» я-да Петрус ресул ялы «гүнәкәрдигини» айдып билердими? (Гел. чык. 32:10; Лука 5:8). Перишделер Исаның шәгиртлери ялы «горкардымы»? Я-да олара ызарламаларда хош хабары вагыз этмек үчин Павлус ресула ве бейлеки шәгиртлере берлиши ялы, «гуҗур-гайрат бермек» герекдими? (Яхя 6:19; 1 Сел. 2:2). Ёк, перишделер кәмил ве ынсандан хас гүйчли. Бикәмил адам дуйгуларыны беян эденде, биз муңа говы дүшүнйәрис. Себәби бизем шонуң ялы дуйгулары башдан гечирйәрис. Биз Худайың Сөзүни оканымызда, «шатланянлар билен шатланып, аглаянлар билен аглаярыс» (Рим. 12:15).

¹⁶ Биз Мукаддес Язгылардан Ехованың вепалы гуллукчыларына болан гарайшы барада ойлананымызда, Худайың бикәмил адамлара сабыр эдйәндигини ве олар билен достлашяндыгыны билип, онуң говы хәсиетлерини гөрйәрис. Биз Худайы нәче говы танадыгымызча, шонча-да оңа болан сөйгимиз артяр. Нетиҗеде, биз онуң билен якындан достлашярыс (Сүлейманың тымсаллары 3:32-ни окаң).

17. a) Азария пыгамбер Аса нәхили говы маслахат берди? б) Аса Азария пыгамбериң маслахатыны нәдип әсгермезлик этди ве нетиҗеде нәме болды?

¹⁷ Аса патыша эфиопиялыларың гошуныны дерби-дагын эденсоң, Худайың пыгамбери Азария оңа ве халка өвүт-үндев берди. Ол шейле дийди: «Сиз Реб билен болсаңыз, Ол хем сизиң билендир. Оны агтарсаңыз, тапарсыңыз; Оны терк этсеңиз, Ол-да сизи терк эдер» (2 Йыл. 15:1, 2). Эмма Аса гарташан чагында бу маслахата эермеди. Он тайпалы демиргазык Ысрайыл патышалыгы Яхуда ховп саланда, Аса Сирия патышалыгына йүз тутуп, көмек сорады. Ол Ехова бил багламагың дерегине, бутпаразлар билен әхт баглашды. Шол себәпли Худай Аса: «Сен акмаклык этдиң. Мундан бейләк сен мыдама уруш ичинде боларсың» дийди (2 Йыл. 16:1—9). Биз мундан нәхили сапак эдинип билерис?

18, 19. a) Биз Еховадан сәхелче-де дашлашсак нәме этмели? б) Биз Ехова нәдип якынлашып билерис?

¹⁸ Биз хич хачан Еховадан дашлашмалы дәл. Эгер биз Еховадан сәхелче-де дашлашсак, Хошеа 12:6-дакы шу маслахата эермели: «Инди сен Худайың көмеги билен оңа долан. Вепалы сөйгини ве адалатлылыгы саклап, хемише өз Худайыңа умыт баглап гөз дик». Шол себәпли, гелиң, төлег гурбанына миннетдарлыгымызы билдирип ве Худайың Сөзүни ыхлас билен өвренип, Ехова хас-да якынлашалың! (Канун таглыматы 13:4-и окаң) *.

¹⁹ Мезмурчы: «Маңа болса Худая якынлашмак говудыр» дийди (Зеб. 73:28). Бизиң әхлимиз Ехова барада нәче көп билдигимизче, шонча-да оны сөймәге көп себәбиң бардыгына гөз етирерис. Шонда Ехова хәзир хем, эбеди хем бизиң достумыз болар!