БИЗ адамзат тарыхының иң кын дөврүнде яшаярыс (2 Тим. 3:1—5). Бизиң Ехова болан сөйгимиз ве онуң догры кадаларына гөрә яшамак ислегимиз хер гүн сыналяр. Иса кын гүнлериң болҗакдыгыны өнүңден айдыпды. Шейле-де ол шәгиртлерине дүнйәниң соңуна ченли герекли голдавы берҗекдигини вада берди (Мат. 24:3, 13; 28:20). Ол шәгиртлерини рухы тайдан беркитмек үчин, олара «вагтлы-вагтында» рухы иймити берҗек садык хызматкәри белледи (Мат. 24:45, 46).

Садык хызматкәр 1919-нҗы йылда беллениленден бәри әхли диллерден болан миллионларча «өйдәки хызматкәрлер» Худайың гурамасына йыгналып, рухы тайдан иймитлендирилйәр (Мат. 24:14; Ылх. 22:17). Эмма эдебиятларымыз әхли диле дең дереҗеде чап эдилмейәр ве адамларың кәбиринде оларың электрон гөрнүши ёк. Меселем, кәбир видеодыр макалаларың диңе jw.org сайтымызда чыкяндыгы себәпли, олар доган-уяларың көпүсинде болмаяр. Бу доган-уяларың рухы тайдан берк болмаклары үчин етерликли рухы иймити алмаяндыгыны аңладярмы? Гелиң, муңа айдың дүшүнмек үчин, дөрт эсасы сорагың җогабына середелиң.

Шейтан: «Дашлары чөреге өвүр» дийип, Исаны сынанда, ол: «Адам диңе бир чөрек билен дәл, эйсем Худайың агзындан чыкан хер бир сөз билен хем яшаяндыр» дийип җогап берди (Мат. 4:3, 4). Ехованың сөзлери Мукаддес Язгыларда язылгы (2 Пет. 1:20, 21). Шол себәпли бизиң эсасы рухы иймитимиз — Мукаддес Язгылар (2 Тим. 3:16, 17).

Ехованың гурамасы «Мукаддес Язгыларың Тәзе дүнйә терҗимесини» тутушлыгына я-да бөлеклейин 120-ден говрак дилде чап этди. Шейле-де ол хер йыл бирнәче диле терҗиме эдилйәр. Мундан башга-да Мукаддес Язгыларың башга терҗимелериниң миллиардларчасы тутушлыгына я-да бөлеклейин мүңлерче дилде бар. Бу Ехованың «бүтин адамларың гутулмагыны, хакыкат билимине етмегини ислейәндигини» гөркезйәр (1 Тим. 2:3, 4). «Худайдан гизлин хич бир махлук ёкдур». Шол себәпли ол «рухы гарыплары» гурамасына чекйәр ве олары рухы иймит билен үпҗүн эдйәр (Евр. 4:13; Мат. 5:3, 6; Яхя 6:44; 10:14).

Иманымызы беркитмек үчин, диңе Мукаддес Язгылары окамак етерликли дәл. Биз окан задымыза дүшүнип, өвренен задымызы дурмушда уланмалы (Якуп 1:22—25). I асырда яшан хебешистанлы везир муңа говы дүшүнди. Ол Худайың Сөзүни окап отырка, хош хабарчы Филипус ондан: «Окаян затларыңа дүшүнйәрмисиң?» дийип сорады. Ол хем: «Бири ёл гөркезмесе, нәхили дүшүнейин?» дийип җогап берди (Рес. иш. 8:26—31). Филипус везире Худайың Сөзүне догры дүшүнмәге көмек этди. Везире алан билими шейле гүйчли тәсир этди велин, ол сувда чокундырылды (Рес. иш. 8:32—38). Шонуң ялы-да, Мукаддес Язгылара эсасланан эдебиятларымыз бизе хакыкат билимине етмәге көмек эдйәр. Бу билим бизиң йүрегимизе тәсир эдип, өвренен затларымыза гөрә яшамага хөвеслендирйәр (Кол. 1:9, 10).

Ехованың гуллукчыларына эдебиятлар аркалы рухы тайдан бол иймит берилйәр (Иш. 65:13). Меселем, 210-дан говрак дилде чыкян «Гаравул диңи» журналында пыгамберликлер дүшүндирилйәр ве рухы хакыкат билимимиз чуңлашдырыляр. Шейле-де Мукаддес Язгыларың принциплерине гөрә яшамага хөвеслендирилйәр. 100-ден говрак дилде чыкян «Ояның!» журналында болса, Ехованың ярадан затлары хакда гүррүң берилйәр ве Мукаддес Язгыларың пейдалы маслахатларына нәдип эермелидиги дүшүндирилйәр (Сүл. тым. 3:21—23; Рим. 1:20). Садык хызматкәр Мукаддес Язгылара эсасланан эдебиятлары 680-ден говрак диле терҗиме эдйәр. Сен хер гүн Мукаддес Язгылары окамак үчин вагт сарп эдйәрмиң? Сен хер бир тәзе журналы ве хер йыл эне дилиңде чыкян тәзе эдебиятлары окаярмың?

Ехованың гурамасы эдебиятлардан башга-да йыгнакларда, конгреслерде чыкыш эдилйән Мукаддес Язгылара эсасланан нутуклары тайярлаяр. Сен бу душушыкларда айдылян нутуклары, гөркезилйән сахналары ве берилйән интервьюлары халаярмың? Хава, Ехова бизе рухы той сачагыны гиңден безейәр! (Иш. 25:6).

Ёк, аңлатмаяр. Ехованың гуллукчыларының кәбири бейлекилере гараныңда, рухы иймити көпрәк аляр. Нәме үчин? Гелиң, ресулларың мысалына середелиң. I асырда Исаның бейлеки шәгиртлерине гараныңда, олара хас көп гөркезме берилйәрди (Мар. 4:10; 9:35—37). Муңа гарамаздан, бейлеки шәгиртлер хем рухы иймити етерликли алярды (Эфес. 4:20—24; 1 Пет. 1:8).

Шейле-де Исаның айдан сөзлериниң ве эден ишлериниң әхлиси Инҗилде язылмандыр. Яхя ресул: «Исаның башга-да эден ишлери гаты көпдүр. Олар бирин-бирин язылса, онда язылан китаплар дүнйә сыгмаз дийип пикир эдйәрин» дийди (Яхя 21:25). Бизе гараныңда, I асырда яшан шәгиртлер Иса барада хас көп билйәрди. Эмма бизде-де етерликли билим бар. Ехова Исаның гөрелдесине эерип билмегимиз үчин, ол барада бизе етерликли билим берйәр (1 Пет. 2:21).

Шейле-де I асырда ресулларың йыгнаклара язан хатлары барада ойланып гөрелиң. Биз Павлусың язан хатларының азындан бириниң Мукаддес Язгылара гошулмандыгыны билйәрис (Кол. 4:16). Шол хатың ёкдугы үчин, рухы иймити етерликли алмадык дийип билерисми? Ёк. Ехова бизиң зерурлыкларымызы билйәр ве рухы тайдан берк болмагымыз үчин етерликли иймит берйәр (Мат. 6:8).

Шу гүнлер Ехованың кәбир гуллукчылары башгалара гараныңда, рухы иймити көпрәк аляр. Сизиң эне дилиңизде диңе бирнәче эдебият бар болса нәме? Онда Ехованың аладаңызы эдйәндигини унутмаң. Барҗа эдебиятларыңызы окаң. Шейле-де мүмкинчилигиңиз болса, дүшүнйән дилиңиздәки йыгнак душушыкларына гатнашың. Ехованың рухы тайдан сизи беркитҗекдигине шүбхеленмәң (Зеб. 1:2; Евр. 10:24, 25).

Интернет сайтымызда журналлар ве Мукаддес Язгылара эсасланан бейлеки эдебиятлар бар. Шейле-де онда машгалалар, етгинҗеклер ве чагалар үчин пейдалы болҗак дүрли маглуматлар берилйәр. Шол маглуматлара машгала окувында серетсеңиз говы болар. Онсоңам, Интернет сайтымызда Гилеад мекдебиниң учурымы, йыллык душушыгы ялы йөрите программалар берилйәр. Шейле-де онда бүтин дүнйәдәки доганлара Ехованың халкына тәсир эден тебигы бетбагтчылыклар ве казыет билен багланышыклы меселелер барада айдыляр (1 Пет. 5:8, 9). Галыберсе-де, Интернет сайтымыз вагыз этмекде говы гурал болуп хызмат эдйәр. Хатда вагыз иши чәклендирилен я-да гадаган эдилен юртларда-да сайтымыз аркалы хош хабар вагыз эдилйәр.

Эмма сиз Интернет сайтымыздакы әхли маглуматлары алып билмесеңиз-де, рухы тайдан говшамарсыңыз. Садык хызматкәр «өйдәки хызматкәрлери» рухы тайдан говы иймитлендирер ялы, чап эдилен эдебиятлары тайярламак үчин җан эдйәр. Шол себәпли jw.org сайтымыздакы маглуматы алмак үчин техники энҗамлары хөкман сатын алмалы дийип пикир этмәң. Кәбирлери Интернет сайтымыздакы эдебиятлары чап эдип, Интернетден пейдаланып билмейән доган-уялара берип билер. Эмма шейле этмек талап эдилмейәр.

Биз Иса Месихиң рухы зерурлыкларымызың аладасыны этҗекдиги барада берен вадасында дуряндыгына өрән бегенйәрис. Шу соңкы кын гүнлериң тизден тамамланҗакдыгы үчин, Ехованың бизи мундан бейләк-де рухы иймит билен «вагтлы-вагтында» үпҗүн этҗекдигине ынанярыс.