1, 2. Ехова Муса пыгамбере нәхили юмуш табшырды ве нәмәни вада берди?

СЕН Ехованың халкы үчин ер йүзүндәки иң бейик хөкүмдарың өңүнде дуруп геплешмели болсаң, өзүңи нәхили дуярдың? Белки, алҗырап, горкудан яңа сениң дилиң тутулан ялы боларды. Сен айтҗак сөзлериңи өңүнден нәдип тайярлардың? Гудратыгүйчли Худайың векили хөкмүнде ынамлы гүрләп билермидиң?

² Муса пыгамбер эдил шейле ягдая дүшди. Ол җуда кичигөвүнли адамды (Сан. 12:3). Эмма Ехова оны гөдек ве текепбир фыровның янына иберйәр. Ехова Муса аркалы фыровндан үч миллиона голай ысрайыллылары гулчулыкдан азатлыга чыкармагыны сораяр (Мүс. чык. 5:1, 2). Ине, шол себәпли Муса пыгамбер Ехова шейле диййәр: «Фыровның янына гидип, ысрайыллылары Мүсүрден чыкарып гетирер ялы, мен ким болупдырын?» Муса пыгамбер фыровн билен гүрлешип билмерин өйден болмалы. Эмма Ехова Муса пыгамбери еке гоймаҗакдыгыны вада берип, оңа: «Мен сениң билен боларын» дийди (Мүс. чык. 3:9—12).

3, 4. a) Муса пыгамбер нәме үчин горкды? б) Хайсы ягдайларда биз Муса ялы горкмагымыз мүмкин?

³ Муса пыгамбер нәме үчин горкдука? Муса фыровн оны Гудратыгүйчли Худайың векили хөкмүнде кабул этмез өйдүп горкяр. Шейле-де ол Худайың Мүсүрден азат этмек үчин  оны иберендигине ысрайыллыларам ынанмазлар дийип пикир эдйәр. Шол себәпли Муса пыгамбер Ехова: «Олар маңа ынанмазлар я-да сөзүме гулак асман „Реб саңа гөрнен дәлдир“ диерлер» диййәр (Мүс. чык. 3:15—18; 4:1).

⁴ Биз Ехованың Муса пыгамбере берен җогабындан ве ондан соңра болан вакалардан ваҗып сапак эдинип билерис. Белки, биз хич хачан дөвлет баштутанларының өңүнде дурмалы болмарыс. Йөне сизе яшаян ериңиздәки адамлара Ехова ве онуң Патышалыгы барада вагыз этмек кын болярмы? Эгер шейле болса, онда, гелиң, Мусаның мысалындан нәме өвренип боляндыгына середелиң.

5. Худай Муса пыгамбериң элине нәме берди ве бу оңа ынамлы гүрлемәге нәдип көмек этди? (Макаланың башындакы сурата середиң).

⁵ Муса пыгамбер Худая горкусыны айданда, Ол оны болҗак затлара өңүнден тайярлады. Мукаддес Язгыларда шейле дийилйәр: «Реб Мусадан: „Элиңдәки нәме?“ дийип сорады. Ол хем: „Хаса“ дийди. Реб: „Оны ере ташла“ дийди. Муса оны ере ташлады, ол хаса йылана өврүлди. Шонда Муса ондан гачып башлады. Эмма Реб Муса: „Элиңи узат-да, онуң гуйругындан тут“ дийди. Муса элини узадып, оны тутан бадына, йылан онуң элинде өңкүси ялы хаса өврүлди». Ехова оңа: «Шонда саңа Худайың гөрнендигине ынанарлар» дийди (Мүс. чык. 4:2—5). Мусаның элиндәки хасасы Худайың гүйҗи аркалы йылана өврүлди! Бу гудрат Худайың Мусаны векил эдип белләндигини ве ыгтыяр берендигини субут эдйәрди. Ехова оңа: «Аламатлары гөркезер ялы, сен бу хасаны хем өз яның билен ал» дийди (Мүс. чык. 4:17). Шу субутнамалар билен Муса пыгамбер хак Худайың адындан халкың ве фыровның өңүнде ынамлы гүрләп билйәрди (Мүс. чык. 4:29—31; 7:8—13).

6. а) Биз вагыз эденимизде элимизде нәме болмалы ве нәме үчин? б) Худайың Сөзүниң хайсы маныда «диридигини» ве «тәсирлидигини» дүшүндириң.

⁶ Биз хем адамлара Мукаддес Язгылардакы хош хабары вагыз эденимизде, олар бизден: «Элиңиздәки нәме?» дийип сорамаклары мүмкин. Көп ягдайларда биз Мукаддес Язгылары окап бермек үчин оны элимизде тутмалы *. Адамларың көпүси Мукаддес Язгылара йөнекей бир китап хөкмүнде гараса-да, онда Ехованың бизиң үчин хабары бар (2 Пет. 1:21). Мукаддес Язгыларда Худайың вадасы ве онуң Патышалыгының бизиң үчин нәмелер этҗекдиги язылгы. Павлус ресул: «Худайың сөзи дири хем тәсирлидир» дийди (Еврейлер 4:12-ни окаң). Худайың Сөзи хайсы маныда дири? Мукаддес Язгылардакы Ехованың берен әхли вадалары юваш-ювашдан берҗай боляр ве ахырсоңы хеммеси долы ерине етер (Иш. 46:10; 55:11). Адам муңа дүшүненде, Мукаддес Язгылардан окаян затлары онуң дурмушына гүйчли тәсир эдйәр.

7. Биз нәдип «хакыкат сөзүни догры уланып билерис»?

⁷ Ехова бизе өзүниң дири Сөзүни, ягны Мукаддес Язгылары берди. Биз бу гурал аркалы айдян хабарымыза ынанып боляндыгыны ве онуң Худайдандыгыны субут эдип билйәрис. Павлус ресул Еврейлере язан хатындан соңра, Тимотеоса «хакыкат сөзүни догры уланмагы» маслахат берди (2 Тим. 2:15). Биз Павлусың бу маслахатына нәдип эерип билерис? Биз адамларың йүрегине тәсир этҗек ерликли аятлары окамалы. 2013-нҗи йылда чап эдилен китапчалар бу бабатда бизе көмек эдер.

8. Бир вагыз гөзегчиси китапчалар барада нәме диййәр?

⁸ Тәзе китапчаларың әхлиси бир гөрнүшде  чап эдилди. Оларың бирини нәдип уланып боляндыгыны өвренсек, башгаларыны хем шол усул билен уланып билерис. Гаваялы (АБШ) бир вагыз гөзегчиси шейле диййәр: «Биз бу тәзе гураллар аркалы өйден-өе ве көчеде говы вагыз эдип боляндыгына деррев гөз етирдик». Бу китапчалары нәме үчин уланмак аңсат? Себәби оларың дашкы сахыпасында берлен сорага бирнәче җогаплар бар. Адам шол сорага нәдогры җогап берерин дийип яйданмаяр. Доганың айтмагына гөрә, бу китапчалар шейле язылан велин, адамларың көпүси хөвес билен гүррүңдеш болярлар. Нетиҗеде, көп гызыклы сөхбетдешлик боляр.

9, 10. a) Бизиң китапчаларымыз Мукаддес Язгылары уланмага нәдип көмек эдйәр? б) Сен хайсы китапчаны нетиҗели уланярсың ве нәме үчин?

⁹ Китапчаларың хер биринде окап бермәге ерликли болҗак аятлар бар. Мысал үчин, «Хорлуклар гутарармыка?» диен китапча середелиң. Адам бу сорага «Хава», «ёк» я-да «белки-де» диен дашкы сахыпадакы җогапларың бирини сайламагы мүмкин. Онуң хайсы җогабы сайландыгына гарамаздан, сиз китапчаның ички сахыпасыны ачып: «Ине, Мукаддес Язгыларда нәме дийилйәндигине середиң» дийип, Ылхам 21:4-и окаң.

¹⁰ Шонуң ялы «Сиз Мукаддес Язгылара нәхили гараярсыңыз?» диен китапчаны улананыңызда, адам дашкы сахыпадакы үч җогабың бирини сайлап билер. Шондан соң китапчаның ички сахыпасыны ачып: «Ине, Мукаддес Язгыларда нәме дийилйәндигине середиң» дийип, 2 Тимотеос 3:16-ны окаң.

11, 12. а) Сиз вагыз гуллугы гызыклы болар ялы нәме эдип билерсиңиз? б) Сиз китапчалар аркалы нәдип икиленч идеге тайярланып билерсиңиз?

¹¹ Адамың диңлейши онуң билен гүррүңи довам этмелими я-да этмели дәлдигини билмәге көмек эдер. Эгер адам хөвес билен диңлесе, диңе бир китапчадакы маглуматы окап, ара алып маслахатлашман, эйсем, гүррүңдешлиги довам эдип хем билерсиңиз. Эмма ол кән бир хөвес билен диңлемесе, китапчадакы маглумат билен пайлашып, Худайың Сөзүнден бирнәче аяды окаса болар. Сиз оңа бир-ики аяды окап берсеңиз-де, соңра гүррүңи довам этмек үчин, икиленч идеге барып билерсиңиз.

¹² Икиленч идегде китапчаның соңкы сахыпасындакы «Ойланып гөрүң» диен сөзбашының ашагында гетирилен  сорага ве аятлара середиң. Мысал үчин, «Сиз гелеҗеге нәхили гараярсыңыз?» диен китапчада «Худай дүнйәниң ягдайыны нәдип өзгердер?» диен сораг ве Даныел 2:44 хем-де Сүлейманың тымсаллары 2:21, 22-нҗи аятлар гетирилйәр. «Арадан чыкан адамлар дирелерми?» диен китапчада болса, «Биз нәме үчин гарраярыс ве өлйәрис?» диен сораг хем-де Гелип чыкыш 3:17—19 ве Римлилер 5:12-нҗи аятлар гетирилйәр.

13. Мукаддес Язгылар окувына башламак үчин, китапчалары нәдип уланып боляндыгыны дүшүндириң.

¹³ Бу китапчалар бизе Мукаддес Язгылар окувыны башламага көмек эдйәр. Гызыкланян адам китапчаның соңкы сахыпасындакы штрихкоды * копиялап алса, бизиң Интернет сайтымыза гирер. Онда оңа биз билен Мукаддес Язгылар окувыны гечмеги теклип эдилер. Шейле-де китапчаларда «Худайың хош хабары» атлы брошюра ве ондакы кәбир сапаклара салгы берилйәр. Меселем, «Бу дүнйәниң хөкүмдары ким?» диен китапчада шол брошюраның 5-нҗи сапагына салгы берилйәр. «Машгаланы нәме багтлы эдйәр?» диен китапчада болса, брошюраның 9-нҗы сапагына салгыланыляр. Бу китапчалары ниетленши ялы улансаңыз, вагызда ве икиленч идегде Мукаддес Язгылары уланмага көмек эдер. Нетиҗеде, бирнәче Мукаддес Язгылар окувына башлап билерсиңиз. Худайың Сөзүни вагызда ене-де нәдип нетиҗели уланып болар?

14, 15. Биз вагызда Павлусдан нәдип гөрелде алып билерис?

¹⁴ Павлус ресулың «көп адамлара» вагыз этмек ислеги барды (1 Коринтослылар 9:19—23-нҗи аятлары окаң). Үнс берен болсаңыз, Павлус ресул «ехудылары... Канун астындакылары... Кануны ёклары... Эҗизлери газанмагы умыт эдйәрди». Хава, ол «кәбирлерини халас этҗек болуп, хер кесе хер зат болды» (Рес. иш. 20:21). Биз хем яшаян еримиздәки хер хили адамлара хакыкаты айданымызда, Павлус ресулдан нәдип гөрелде алып билерис? (1 Тим. 2:3, 4).

¹⁵ Хер ай бизиң «Худая гуллугымызда» вагыз этмек үчин теклиплер берилйәр. Шолары уланмага җан эдиң. Эмма сизиң яшаян ериңиздәки адамлары башга темалар гызыкландырян болса, онда шоңа гөрә теклиплериңизи үйтгедиң. Оларың нәхили адамдыгы, нәхили шертлерде яшаяндыгы ве олары, эсасан, нәме гызыкландыряндыгы хакда пикирлениң. Соңра шоңа гөрә аяды тапмага чалшың. Бир айланян гөзегчи ве онуң аялы вагызда көпрәк Мукаддес Язгылары уланмак үчин нәме эдйәндиги хакда шейле диййәрлер: «Биз адамлара айтҗак задымызы гысгача дүшүндиренимизде, олар бизе бир аяды окамага мүмкинчилик берйәрлер. Биз ерли ягдая гөрә саламлашанымыздан соң, Мукаддес Язгылардан бир аяды окап берйәрис». Индики абзацларда көплере нетиҗели вагыз этмәге көмек эден кәбир темалар, сораглар ве аятлар гетирилйәр. Сизем олары өз яшаян ериңизде уланмага җан этсеңиз говы болар.

16. Зебур 46:9-ы вагызда нәдип уланып болҗакдыгыны дүшүндириң.

¹⁶ Эгер-де сизиң яшаян ериңизде көп уруш болян болса, онда сиз адама шейле дийип билерсиңиз: «Биз хачанам болса, парахат дүнйәде яшарысмы? Зебур 46:9-да „Ериң уҗуна ченли урушларың тогтаҗакдыгы“ айдыляр. Аслында, Мукаддес Язгылар аркалы Худай бизе гелеҗекде парахат дурмушы берҗекдигини энчеме гезек вада берйәр». Соңра Мукаддес Язгылардан шейле вадаларың бирини окап бериң.

17. Биз вагызда Матта 4:4-нҗи аят аркалы нәдип гүррүңдеш болуп билерис?

 ¹⁷ Сизиң яшаян ериңизде эркек адамлара машгаласыны эклемек кын болярмы? Онда гүррүңе шейле башлап билерсиңиз: «Сизиң пикириңизче, машгаланы багтлы этмек үчин нәчерәк газанч этмеликә?» Адам җогап беренден соң шейле дийиң: «Көп эркек адамлар герегинден артык газанч этсе-де, оларың машгаласы өзүни багтсыз дуйяр. Аслында, бизе багтлы болмак үчин нәме гереккә?» Соңра Матта 4:4-и окап, Мукаддес Язгылар окувыны теклип эдиң.

18. Биз адамлара теселли бермек үчин Зебур 37:11-и нәдип уланып билерис?

¹⁸ Сизиң яшаян ериңиздәки адамлар яңы-якында болан тебигы бетбагтчылыкдан эҗир чекйәрми? Онда сиз шейле дийип сөзе башлап билерсиңиз: «Мен сизе бираз гөвүнлик бермек үчин гелдим (Зебур 37:11-и окаң). Үнс берен болсаңыз, Худай бизе нәме бермек ислейәр? Парахатлык ве гөвүнлик. Алланың шейле говы дурмушы бермек ислейәндигини билмек теселли берйән болса герек, шейле дәлми? Эмма бу нәдип бейле болар?» Соңра «Худайың хош хабары» атлы брошюраның габат гелйән сапагы билен гүррүңи довам эдиң.

19. Диндар адамлар билен гүррүң эдениңизде, Ылхам 14:6, 7-нҗи аятлары нәдип уланып болҗакдыгыны дүшүндириң.

¹⁹ Сизиң яшаян ериңиздәки адамлар дин билен гызыкланярмы? Онда сиз гүррүңе шейле башлап билерсиңиз: «Эгер сиз перишде билен геплешен болсаңыз, ол хем сизе бир зат айтҗак болса, оны диңләрдиңизми? (Ылхам 14:6, 7-нҗи аятлары окаң). Шол перишде гөги ве ери ярадана сежде эдиң хем-де Ондан горкуң диййәр. Сиз гөги ве ери ярадан Худайың адыны билйәрсиңизми?» Соңра Зебур 8:1-дәки «Эй Ехова, Реббимиз! Бүтин ер йүзүнде Сениң адың нәхили дабаралы! Сен шөхратыңы гөклериң үстүне яздың» диен сөзлери окаң. Шондан соңра адама Ехова Худай барада көпрәк билмеги теклип эдиң.

20. а) Сүлейманың тымсаллары 30:4-нҗи аят аркалы Худайың ады барада нәдип вагыз эдип билерис? б) Сениң уланян хайсы аядың говы нетиҗе берйәр?

²⁰ Сиз яшлар билен гүррүңдешлиге шейле башлап билерсиңиз: «Мен сизе Мукаддес Язгылардан бир аяды окап бересим гелйәр. Ол ерде бир ваҗып сораг берилйәр. (Сүлейманың тымсаллары 30:4-и окаң). Хич бир адамам шу ерде айдылян затлары эдип билмейәр, диймек, бу ерде бизиң Ярадыҗымыз гөз өңүнде тутуляр. Онуң адыны нәдип билсе боларка? Эгер ислесеңиз мен сизе оны Мукаддес Язгылардан гөркезейин».

21, 22. а) Ерликли сайланан аятлар адамың дурмушыны нәдип үйтгедйәр? б) Сиз вагызда нәме этмеги йүрегиңизе дүвдүңиз?

²¹ Ерликли сайланан аятларың адамлара нәхили тәсир этҗекдигини билип болмаяр. Мысал үчин, ики саны Ехованың Шаяды бир яш аялың гапысыны какяр. Оларың бириси ол аялдан: «Худайың адыны билйәңизми?» дийип сораяр ве Зебур 83:18-и окаяр. Ол аял шейле диййәр: «Мен гаты хайран галдым! Шол себәпли олар гиденден соңра, өйүмизден 56 километр узаклыкда ерлешйән китап дүканына гитдим. Ол ерде мен Худайың адыны Мукаддес Язгыларың бейлеки терҗимелеринден барладым ве сөзлүкден ачып гөрдүм. Худайың адының Еховадыгына долы гөз етиренимден соң, мен көп зады билмейәндигиме дүшүндим». Шондан соң ол ве онуң гелҗекки янёлдашы Мукаддес Язгылары окап башлады хем-де сувда чокундырылды.

²² Мукаддес Язгылары окап, Ехованың дири вадаларына иман этсең, ол дурмушыңы үйтгедйәр (1 Селаниклилер 2:13-и окаң). Адамларың йүрегине тәсир этмек үчин, бизиң айдян ислендик сөзүмизден Худайың Сөзи хас гүйчли тәсир эдйәр. Шол себәпли, гелиң, хер бир мүмкинчиликден пейдаланып, Худайың Сөзүни уланалың, чүнки ол диридир!