ПЕТРУС РЕСУЛ Исаны танамаярын дийип инкәр эденсоң, мөңңүрип аглаяр. Хениз ол рухы тайдан берк галмак үчин җан этмели болса-да, Иса ол аркалы башгалара көмек этмек ислейәрди. Шонуң үчин Иса оңа: «Сен хем бир вагт өврүлип гелеңде, доганлара голтгы бер» диййәр (Лука 22:32, 54—62). Петрус ресул хем I асырдакы месихчилер йыгнагының диреги болды (Гал. 2:9). Шонуң ялы бир вагт яшулы болуп гуллук эден доган өңки борҗуны алып, доган-уялары рухы тайдан беркитмек билен шатлык тапып билер.

Гөзегчилик борҗундан айрылан кәбир доганлар өзүни дерексиз дуйярлар. Гүнорта Америкада 20 йылдан говрак яшулы болуп гуллук эден Хулио * шейле диййәр: «Мениң көпленч эдйән ишлерим: нутук тайярламак, доганлары идемек ве йыгнагың агзаларына чопанчылык идегини этмекди! Гынансам-да, бу затлар менден айрылансоң, дурмушым бошап галан ялы болды. Умуман айданыңда, бу мениң үчин иң агыр дөвүр болды». Шу гүнлер Хулио ене-де яшулы болуп гуллук эдйәр.

Якуп шәгирт: «Эй доганлар, дүрли сынаглара учраңызда, муны улы бегенч сайың» дийди (Якуп 1:2). Якуп сынаглар диенде бикәмиллигиң ве ызарламаларың нетиҗесини гөз өңүнде тутупды. Ол тен хөвеслерини, йүзгөрмеклик ве шуңа меңзеш затлары агзап гечди (Якуп 1:14; 2:1; 4:1, 2, 11). Ехова бизе тербие беренде, агыр дегмеги мүмкин (Евр. 12:11). Эмма биз шейле сынаглар себәпли шатлыгымызы йитирмели дәл.

Биз йыгнакдакы җогапкәрли борчлардан кесилен болсак-да, Ехова болан иманымызың беркдигини субут этмәге ве оңа болан сөйгимизи гөркезмәге мүмкинчилигимиз бар. Шейле-де биз Худая нәме үчин гуллук эдендигимиз барада пикирленип билерис. Меселем, биз өз бәхбидимиз үчинми я-да Худайы сөййәндигимиз үчин шейле  җогапкәрли борҗы ерине етирдик? Биз йыгнагың Худайыңкыдыгына ве доган-уяларың мәхирли аладасының эдилмегине мынасыпдыгына дүшүнйәрисми? (Рес. иш. 20:28—30). Өң яшулы болуп гуллук эден доганлар мукаддес гуллугыны шатлыклы ерине етирип, Ехованы йүрекден сөййәндигини хеммелере, шол санда Шейтана субут эдйәр.

Давут патыша агыр гүнәлери эденде, оңа кәйинч берилди. Ол теммини кабул эдендиги үчин багышланды. Давут шейле айдым айтды: «Җенаяты багышланан, гүнәси өртүлен адам нәхили багтлы! Реб тарапындан гүнәси хасаба алынмаян адам, рухунда хиле ёк адам нәхили багтлы!» (Зеб. 32:1, 2). Элбетде, Давут гүнәсинден сапланандан соң, Худайың халкына хас говы чопан болды.

Көпленч тәзеден яшулы болуп белленен доганлар өңкүсинден хем хас говы чопан болярлар. Шейле яшулуларың бири: «Инди мен гүнә эден доган-уяларың ягдайына хас говы дүшүнйәрин» диййәр. Башга бир яшулы болса: «Хәзир мен доган-уялара хызмат этмек борҗумы хас гыммат сайярын» диййәр.

Мезмурчы: «(Ехова) хемише кәемез, гахарыны эбеди сакламаз» дийди (Зеб. 103:9). Шонуң үчин биз агыр гүнә эден адама Худай оңа гайдып хич хачан ынанмаз дийип пикир этмели дәл. Энчеме йыл яшулы болуп гуллук эдип, соңра борҗундан кесилен Рикардо шейле гүррүң берйәр: «Мен гойберен ялңышлыгым үчин өрән лапыкеч болдум. Көп вагтлап мениң өзүми дерексиз дуймагым тәзеден доган-уялара гөзегчи болуп гуллук этмегиме пәсгел берди. Мен ене-де яшулы болуп билҗекдигиме хич хили ынамым ёкды. Эмма мен башгалара шатлык билен көмек этдим, Мукаддес Язгылар окувыны гечирдим, йыгнакда доган-уялары рухландырдым ве олар билен вагыз этдим. Бу болса маңа өзүме ынамлы болмага көмек этди. Хәзир мен ене-де яшулы болуп гуллук эдйәрин».

Өйке-кине сакламак хем догана яшулы болмага пәсгел берйәр. Бу бабатда Ехованың гуллукчысы Давутдан гөрелде алсак говы болар! Ол гөрипчилик эдйән Шаул патышадан гачып йөрмели болды. Давудың мүмкинчилиги болса-да, ол Шаулдан ар алмады (1 Шам. 24:4—7; 26:8—12).  Шаул урушда өленде, Давут оны ве онуң оглы Ёнатаны «сөйгүли, эзиз» адамлар хөкмүнде ятлап аглады (2 Шам. 1:21—23). Давут өйке-кине сакламады.

Эгер-де сиз: «Мениң ягдайыма догры дүшүнмедилер я-да мениң меселәм адалатсыз чөзүлди» дийип пикир эдйән болсаңыз, онда өйкелемеҗек болуң. Меселем, Англияда 30 йыла голай яшулы болуп гуллук эдип, соңра шол борҗундан айрылан Вильям кәбир яшулулардан өйкелейәрди. Вильяма пайхаслы болмага нәме көмек этди? Ол: «Мен Эйюп китабыны окап рухландым. Эгер Ехова Эйюба үч достуна догры гарайышда болмага көмек эден болса, онда Ол маңа йыгнак яшулуларына догры гарайышда болмага хас көп көмек эдер!» дийди (Эйюп 42:7—9).

Эгер-де сиз Худайың сүрүсине чопанчылык этмек борҗуңызы табшыран болсаңыз, онда сиз нәме үчин шейле карара гелендигиңиз барада ойлансаңыз говы боларды. Меселем, сиз кынчылыкларыңыз билен башагай болдуңызмы? Сизиң дурмушыңызда башга затлар хас ваҗып орун тутдумы? Башгаларың бикәмиллиги себәпли рухдан дүшдүңизми? Нәме болаянда-да, сиз яшулы болуп гуллук эден вагтыңыз башгалара хер дүрли усуллар билен көмек эдендигиңизи унутмасаңыз говы болар. Сиз олары гүррүңлериңиз билен беркитдиңиз, гөрелдәңиз билен рухландырдыңыз ве сынага дүшенлеринде, чопанчылык идеглериңиз билен олара дөз гелмәге көмек этдиңиз. Сиз яшулы болуп вепалы гуллук эдениңизде, өзүңизем бегендиңиз, хас-да Ехованың йүрегини шатландырдыңыз (Сүл. тым. 27:11).

Ехова доганлара йыгнакда җогапкәрли борҗы алмак ислегини берди ве шатлыклы гуллук этмәге көмек этди. Эгер сиз яшулы болуп гуллук этмек борҗуңызы табшыран я-да ондан айрылан болсаңыз, онда сиз ене-де «гөзегчи болмага җан чексеңиз» говы болар (1 Тим. 3:1). Павлус ресул Колоседәки месихчилериң «Реббе мынасып ягдайда гезип, Оны хер бабатда хошнут этмеклери» үчин, Худайың ислегиниң догры билимини алар ялы, олар үчин «дилемегиң ызыны үзмейәрди» (Кол. 1:9, 10). Эгер сиз ене-де яшулы болуп гуллук эдйән болсаңыз, Еховадан сизи беркитмегини, сабыр ве шатлык бермегини диләп билерсиңиз. Шу соңкы гүнлерде Худайың халкы мәхирли чопанларың рухы голдавына мәтәч. Сизиң доган-уялары беркитмәге ислегиңиз ве мүмкинчилигиңиз бармы?