1. Павлус ресул Ехова йүрекден гуллук эдйәнлере нәхили гараярды?

ПАВЛУС ресул хош хабарың угрунда агыр зәхмет чекйән доган-уялары унутмаярды. Ол шейле язды: «Иманың хасылы болан ишиңизи, сөйгүден эмеле гелен зәхметиңизи, Реббимиз Иса Месихе баглан умыдыңыздан дөрән чыдамыңызы Худайымыз хем Атамыз өңүнде дынгысыз ятлаярыс» (1 Сел. 1:3). Ехова-да элинде барыны эдйән вепалы гуллукчыларының сөйги билен эдйән ишлериниң хич бирини ятдан чыкармаяр (Евр. 6:10).

2. Биз шу макалада нәмә середерис?

² Гечмишде хем, шу гүнлер хем доган-уяларың көпүси Ехова долы вагт гуллук этмек үчин көп затдан гечдилер. Биз шу макалада I асырдакы кәбир месихчилериң Ехова гуллук этмек үчин нәмелери эдендиги барада гүррүң эдерис. Шейле-де бизиң гүнлеримизде долы вагт гуллук эдйән доган-уяларың нәхили ишлери эдйәндигине ве олара нәдип көмек эдип боляндыгына середерис.

3, 4. а) I асырда кәбир доган-уялар Ехова нәдип гуллук этдилер? б) Олар мадды зерурлыкларының аладасыны нәдип эдйәрдилер?

³ Иса Месих сувда чокундырыландан соң, деррев Худайың Патышалыгы барада вагыз эдип башлады ве муны шәгиртлерине-де өвретди (Лука 3:21—23; 4:14, 15, 43). Исаның өлүминден  соң, ресуллар хош хабарың яйрадылмагына ёлбашчылык этдилер (Рес. иш. 5:42; 6:7). Филипус ялы кәбир месихчилер Палестинада хош хабарчы ве миссионер болуп гуллук этдилер (Рес. иш. 8:5, 40; 21:8). Павлус ресул ве башга месихчилер өйүнден узак ерлерде вагыз этдилер (Рес. иш. 13:2—4; 14:26; 2 Кор. 1:19). Силванус (Силас), Маркус ве Лука ялы кәбир месихчилер болса, Мукаддес Язгыларың китапларыны яздылар я-да оны язанларың кәтиби болуп хызмат этдилер (1 Пет. 5:12). Месихчи уялар хем бу вепалы доганлар билен билеликде зәхмет чекйәрдилер (Рес. иш. 18:26; Рим. 16:1, 2). Биз шол месихчилериң башдан гечирен гызыклы вакаларыны Инҗилден окаярыс. Бу вакалар Ехованың өз гуллукчыларының эдйән ишлерини гыммат сайяндыгыны ве оларың зерурлыкларының аладасыны эдйәндигини гөркезйәр.

⁴ I асырда долы вагт гуллук эден месихчилер мадды зерурлыкларының аладасыны нәдип эдйәрдилер? Кәвагт доган-уялар олары мыхманчылыга чагырярды ве башга көмеги берйәрди. Эмма олар шейле көмегиң берилмегини талап этмейәрдилер (1 Кор. 9:11—15). Кәбир доган-уялар ве йыгнаклар долы вагт гуллук эдйән месихчилери хөвес билен голдаярдылар (Ресулларың ишлери 16:14, 15; Филипилилер 4:15—18-нҗи аятлары окаң). Муңа гарамаздан, Павлус ресул ве онуң ёлдашлары чыкдаҗыларыны өдемек үчин ярым гүн ишлейәрдилер.

5. Долы вагт гуллук эдйән месихчи әр-аял дурмушы барада нәме диййәр?

⁵ Шу гүнлерем көп месихчилер долы вагт гуллугың дүрли гөрнүшине гатнашып, җан аяман зәхмет чекйәрлер (« Долы вагт гуллугың гөрнүшлери» диен чарчува середиң). Олар сайлан гуллугына нәхили гараярлар? Сиз олардан бу барада сорасаңыз, өрән рухланарсыңыз. Башда умумы пионер, йөрите пионер, соңра миссионер, хәзир болса дашары юртда Бейтелде гуллук эдйән бир доган шейле диййәр: «Мениң долы вагт гуллугы сайламагым, гелен карарларымың иң говусы болды. Мен 18 яшымда университетде окамалымы, везипә ковалашмалымы я-да пионер болуп гуллук этмелидигини сайламалы болдум. Мен хәзир долы вагт гуллук этмек үчин нәмелерден гечендигими Ехованың унутмаяндыгына гөз етирдим. Ехова маңа гуллугымда зехиними ве укыпларымы уланмага мүмкинчилик берди. Мен везипә ковалашан болсам, бейле болмазды». Шол доганың аялы шейле гүррүң берйәр: «Ехованың табшыран хер бир иши маңа рухы тайдан өсмәге көмек этди. Биз Ехованың гораяндыгыны ве гөркезме берйәндигини гайта-гайта гөрйәрис. Эгер биз өйде, аматлы шертде яшамагы сайлан болсак, бу затлары гөрмездик. Мен долы вагт гуллук эдйәндигим үчин Ехова хер гүн миннетдарлык билдирйәрин». Сенем дурмушыңың шейле болмагыны ислейәрмиң?

6. Ехова бизиң эдйән гуллугымыза нәхили гараяр?

⁶ Элбетде, кәбир месихчилериң долы вагт гуллук этмәге ягдайы болмаяр. Биз оларың ак йүрекден эдйән тагалласыны хем Ехованың гыммат сайяндыгыны билйәрис. Мысал үчин, Филимун 1—3-нҗи аятларда Павлус ресул Колоседәки доган-уяларың әхлисине салам айдяр ве оларың кәбирлерини атма-ат ятлаяр (окаң). Павлус ресул-да, Ехова-да оларың җан аяман чекен зәхметини гыммат сайярды. Шонуң ялы-да, гөкдәки Атамыз сизиң гуллугыңызы хем гыммат сайяр. Муңа гарамаздан, сиз шу гүнлер долы вагт гуллук эдйән доган-уялары нәдип голдап билерсиңиз?

7, 8. Йыгнакда пионерлер нәмелери эдйәр ве доган-уялар олара нәдип көмек эдип билер?

⁷ I асырдакы хош хабарчылар ялы, бизиң гүнлеримиздәки ыхласлы  пионерлер хем йыгнакдакы доган-уялары рухландырярлар. Оларың көпүси хер ай 70 сагат вагыз эдйәрлер. Биз олара нәдип көмек эдип билерис?

⁸ Шари атлы бир пионер уя шейле диййәр: «Пионерлер гүнде вагыз эдйәндиги себәпли, рухы тайдан берк ялы гөрүнйәрлер. Эмма олары хем рухландырмалы» (Рим. 1:11, 12). Энчеме йыл пионер болуп гуллук эден башга бир уя йыгнагындакы пионерлер барада шейле диййәр: «Олар арман-ядаман, дынгысыз зәхмет чекйәрлер. Доган-уялар пионерлере вагза машында әкитмеги теклип эденлеринде, мыхманчылыга чагыранларында, бираз ёл пулуны беренлеринде я-да кәбир чыкдаҗыларына көмек эденлеринде, олар өрән бегенйәрлер. Бу сизиң оларың йүрекден аладасыны эдйәндигиңизи гөркезйәр».

9, 10. Кәбир доган-уялар йыгнакдакы пионерлере нәдип көмек эдйәрлер?

⁹ Сен пионерлере көмек этмек ислейәрмиң? Баби атлы бир пионер уя шейле диййәр: «Хепдәниң довамында маңа көп көмек герек боляр». Онуң йыгнагындакы башга бир пионер уя болса: «Өйлән вагза гитмәге адам тапмак кын боляр» диййәр. Хәзир Бруклиндәки Бейтелде гуллук эдйән уя пионер болуп гуллук эден дөврүни ятлап, шейле гүррүң берйәр: «Машынлы бир уя маңа: „Ислендик вагт сен вагза гитмәге адам тапмасаң, маңа җаң эт, мен хөкман гелерин“ дийипди. Шол уя маңа пионер гуллугымы довам этмәге говы көмек этди». Ёкарда агзалан Шари атлы уя шейле диййәр: «Көпленч вагыздан соң, дурмуш гурмадык пионерлер вагтыны еке өзлери гечирйәрлер. Шол себәпли сиз олары вагтал-вагтал машгала окувыңыза я-да шуңа меңзеш затлара чагырың. Бу олары рухы тайдан беркидер».

¹⁰ Такмынан 50 йылдан бәри долы вагт гуллук эдйән бир уя дурмуш гурмадык кәбир уялар билен пионер болуп гуллук эден дөврүни шейле ятлаяр: «Йыгнагымыздакы яшулулар пионерлери хер ики айдан идәп дурярды. Олар бизиң саглыгымыз, ишимиз ве биынҗалык болян затларымыз билен гызыкланярды. Олар муны йүрекден эдйәрди. Олар бизиң нәмә мәтәчдигимизи билмек үчин йөрите өйүмизе гелйәрди». Шейле яшулулар Онисифорың гөрелдесине эерйәрлер. Ол машгаласының аладасыны этмек билен чәкленмән, Павлус ресула хем көмек эдйәрди (2 Тим. 1:18).

11. Йөрите пионерлер нәмелери эдйәр?

 ¹¹ Кәбир йыгнакларда йөрите пионер болуп гуллук эдйән доган-уялар бар. Оларың көпүси хер ай 130 сагат вагыз эдйәрлер. Йөрите пионерлер вагтыны вагза ве онуң билен баглы ишлере сарп эдйәндиги үчин, дүнъеви ишде аз ишлейәрлер я-да асла ишлемейәрлер. Олар бүтин вагтыны вагза сарп эдип билер ялы, филиал олара хер ай бираз пул көмегини берйәр.

12. Яшулулар ве бейлеки доган-уялар йөрите пионерлери нәдип голдап билерлер?

¹² Биз йөрите пионерлери нәдип голдап билерис? Йөрите пионерлер билен хызматдашлык эдйән филиалдакы бир яшулы шейле диййәр: «Яшулулар олар билен гүрлешип, ягдайларыны билмели ве олара нәхили көмек бермелидигини аныкламалы. Доган-уяларың кәбири йөрите пионерлере пул көмегиниң берилйәндиги үчин, олар көмеге мәтәч дәлдир өйдйәрлер. Эмма йыгнакдакы доганлар хем олара көп затда көмек эдип билерлер». Умумы пионерлер ялы, йөрите пионерлер хем олар билен вагыз эдйән доган-уялара миннетдар болярлар. Сенем олар билен вагыз эдип билермиң?

13, 14. а) Этрап гөзегчилери бабатда нәмәни унутмалы дәл? б) Сиз этрап гөзегчиси болуп гуллук эдйәнлере нәдип көмек эдип билерсиңиз?

¹³ Доган-уялар көпленч этрап гөзегчилерини ве оларың аялларыны рухы тайдан берк хасаплап, оларың рухландырмагына гарашярлар. Йөне биз хем олары рухландырмагы унутмалы дәл. Биз олары дынч алмага чагырсак я-да олар билен биле вагза гитсек говы болар. Эгер олар сыркавласа я-да хассахана дүшсе, биз олары идәп, герекли көмеги берип билерис. Ресулларың ишлери китабыны язан «сөйгүли» лукман Лука-да Павлус ресула ве онуң ёлдашларына говы көмек эдипди (Кол. 4:14; Рес. иш. 20:5—21:18).

¹⁴ Этрап гөзегчилери ве оларың аяллары доган-уялар билен якындан достлашмак ве рухланмак ислейәрлер. Бир этрап гөзегчиси шейле язды: «Достларым мени хачан рухландырмалыдыгыны билйәрлер. Олар маңа дүшгүрлик билен сораг берйәрлер. Бу болса маңа биынҗалык болян затларымы гүррүң бермәге көмек эдйәр. Оларың үнсли диңлемеги хем мениң үчин говы көмек боляр». Этрап гөзегчилери ве оларың аяллары доган-уяларың йүрекден эдйән аладасыны гыммат сайярлар.

15, 16. Бейтелчилер ве Конгрес залларында гуллук эдйәнлер нәмелери эдйәрлер ве биз олары нәдип голдап билерис?

¹⁵ Бүтин дүнйәде Бейтелде ве Конгрес залларында гуллук эдйән доган-уялар вагыз ишине ваҗып гошант гошярлар. Сизиң йыгнагыңызда я-да яшаян ериңизде бейтелчилер бар болса, олары нәдип голдап билерсиңиз?

¹⁶ Оларың кәбирлери Бейтеле геленде, машгаласындан ве дост-ярларындан айра дүшендиги себәпли, илкибада, өйүни күйсемеги мүмкин. Шол себәпли Бейтелдәки ве тәзе йыгнагындакы доган-уяларың өзлерини достларча алып бармагы олары өрән бегендирйәр! (Мар. 10:29, 30). Бейтелчилериң гүн тертиби йыгнак душушыкларына бармага ве хер хепде вагза гитмәге мүмкинчилик берйәр. Эмма кәте оларың гошмача борчлары хем боляр. Шол себәпли йыгнакдакы доган-уялар муңа дүшүнип, бейтелчилери ве оларың эдйән ишини гыммат сайяндыгыны гөркезселер, хеммелере пейдалы болар (1 Селаниклилер 2:9-ы окаң).

17, 18. Дашары юртда долы вагт гуллук эдйән доган-уялар нәхили ишлери эдйәрлер?

¹⁷ Доган-уяларың кәбири дашары юртда долы вагт гуллук эдйәрлер. Олар тәзе иймите, диле, ерли дәплере ве яшайыш шертлерине өвренишмели  болярлар. Дашары юртда долы вагт гуллук эдйән доган-уялар нәхили ишлери эдйәрлер?

¹⁸ Оларың кәбири миссионер болуп, көп вагыз эдйәрлер. Олар өкде вагызчы ве мугаллым хөкмүнде алан тәлимини йыгнакдакы доган-уялар билен пайлашярлар. Филиал миссионерлери яшамак үчин сада өй билен үпҗүн эдйәр ве олара эсасы чыкдаҗыларыны өдәр ялы пул көмегини берйәр. Дашары юртда гуллук эдйәнлериң кәбири болса, филиалда гуллук эдйәрлер я-да филиалларың, терҗимечилер офислериниң, Конгрес ве Патышалык залларының гурлушык ишлерине гатнашярлар. Олар нахар, яшайыш җайы ве башга-да герекли затлар билен үпҗүн эдилйәр. Бейтел машгаласының агзалары ялы, олар хем йыгнак душушыкларына ве вагыз гуллугына ызыгидерли гатнашып, көп берекет алярлар.

19. Сиз юрдуңызда долы вагт гуллук эдйән доган-уялары нәдип голдап билерсиңиз?

¹⁹ Сиз юрдуңызда долы вагт гуллук эдйән доган-уялары нәдип голдап билерсиңиз? Илкибада, олара ерли халкың иймитине өвренишмегиң кын боляндыгыны унутмаң. Сиз олары мыхманчылыга чагыраныңызда, нәхили нахары говы гөрйәндигини я-да хайсы нахары халамаяндыгыны сораң. Шейле-де олар сизиң дилиңизи ве дәплериңизи өвренйәнчә, бираз вагт герек болар. Шол себәпли сиз сабырлы болуп, олара мәхирлилик билен көмек эдип билерсиңиз. Себәби олар муны өвренмек ислейәрлер!

20. Биз долы вагт гуллук эдйәнлере ве оларың ата-энесине нәдип көмек эдип билерис?

²⁰ Вагтың гечмеги билен, дашары юртда долы вагт гуллук эдйән месихчилер гарташан ата-энесине көмек этмек бабатда карара гелмели болярлар. Оларың ата-энеси Ехованың Шаятлары болса, олар чагаларының гуллугыны довам этмегини ислейәрлер (3 Яхя 4). Элбетде, долы вагт гуллук эдйән доган-уялар ата-энеси көмеге мәтәч боланда, мүмкин болдугындан, олары көпрәк идәп, аладасыны эдерлер. Эмма оларың ата-энесиниң янында яшаян доган-уялар хем олары голдап, аладасыны эдип билерлер. Долы вагт гуллук эдйән доган-уяларың бүтин дүнйәде алнып барылян хас мөхүм ишде ваҗып җогапкәрчиликлериниң бардыгыны унутмаң (Мат. 28:19, 20). Сиз долы вагт гуллук эдйән месихчилериң ата-энесине көмек эдип билермисиңиз?

21. Долы вагт гуллук эдйән доган-уялар башгаларың берйән көмегине ве голдавына нәхили гараярлар?

²¹ Долы вагт гуллук эдйән доган-уялар баямак үчин дәл-де, Ехова йүрекден гуллук этмек ве адамлара көмек этмек үчин зәхмет чекйәрлер. Шол себәпли олар берилйән хер бир көмегиң гадырыны билйәрлер. Дашары юртда гуллук эдйән бир уя шейле диййәр: «Доган-уялар миннетдарлык билдиренде, оларың сен барада ойланяндыгыны ве эдйән ишиңи гыммат сайяндыгыны гөрйәрсиң».

22. Сиз долы вагт гуллук эдйән доган-уялара нәхили гараярсыңыз?

²² Ехова долы вагт гуллук этмек дурмушда багтлы эдйән иң говы ёлдур. Бу ёлдан йөремек гөвнүңи гөтерйәр, көп берекетлери берйәр ве дурмушыңдан канагат тапмага көмек эдйәр. Шейле-де бу гелеҗеге хәзирден тайярланмага ярдам эдйәр. Тизден Худайың вепалы гуллукчыларының әхлиси Ехова шатлык билен эбеди гуллук эдерлер. Шол себәпли, гелиң, әхлимиз долы вагт гуллук эдйән доган-уяларың «иманының хасылы болан ишини, сөйгүден эмеле гелен зәхметини» унутмалың! (1 Сел. 1:3).