ФЕРНАНДО * өрән аладаланяр. Себәби ики яшулы онуң билен икичәк геплешҗек боляндыгыны айтдылар. Этрап гөзегчиси йыгнагы соңкы гезеклер идәнсоң, яшулулар Фернандоның йыгнакда гошмача борчлары алмагы үчин нәме этмелидигини дүшүндирипдилер. Шондан бәри эп-эсли вагт гечди. Инди Фернандо: «Мен хачанам болса яшулы болармыкам?» дийип алада эдип башлады. Этрап гөзегчиси яңы-якында йыгнагы ене-де идәпди. Яшулулар бу гезек нәме диеркә?

Фернандо яшулуларың бириниң айдан сөзлерини диңлейәр. Доган 1 Тимотеос 3:1-е салгыланяр хем-де йыгнак яшулуларының Фернандоның яшулы эдип белленилендиги барада хат аландыгыны айдяр. Фернандо муңа аңк болуп: «Сиз нәме дийдиңиз?» диййәр. Доган айдан сөзлерини ене-де гайталаяр. Шонда Фернандоның йүзүнде шатлык аламаты пейда боляр. Йыгнакда Фернандоның яшулы эдип белленендиги билдириш эдиленде, доган-уяларың әхлиси бегенйәр.

Йыгнакда җогапкәрли борчлары алмак ислемек нәдогрумы? Элбетде, ёк. 1 Тимотеос 3:1-де айдылышы ялы, «ким гөзегчи болмага җан чекйән болса, онда ол оңат иши арзув эдйәр». Доганларың көпүси бу маслахата эерип, рухы тайдан өсдүлер ве йыгнакда җогапкәрли борчлары алдылар. Шол себәпли Худайың халкының арасында 100 мүңден говрак укыплы яшулулар ве гуллук хызматчылары бар. Эмма йыгнакларың көпелйәндиги себәпли, хас көп доганларың җан этмеги герек боляр. Мунуң үчин нәме этмели? Гөзегчи болмага җан эдйән доганлар хачан яшулы боларкам дийип алада этмелими?

Мукаддес Язгылардакы «җан чекмек» дийип грек дилинден терҗиме эдилен җүмле тутанъерлилик билен ислег билдирмеги, ымтылмагы аңладяр. Белки-де, бу җүмле агачдан асылып дуран гөзе якымлы мивәни алҗак болуп ымтылян адамы ядыңа саляндыр. Эмма оңат иш үчин  «җан чекмек» «гөзегчи болмага» небисҗеңлик билен дырҗашмагы аңлатмаяр. Нәме үчин? Себәби ак йүрекден яшулы болуп гуллук этмек ислейәнлериң максады ат-абрай газанмак дәл-де, «оңат иш» этмекдир.

Бу оңат иши ерине етирмек үчин, эсасан, нәмелериң талап эдилйәндиги 1 Тимотеос 3:2—7 ве Титус 1:5—9-нҗы аятларда айдыляр. Көп йылдан бәри яшулы болуп гуллук эдйән Раймонд доган бу талаплары шейле дүшүндирйәр: «Мениң үчин, эсасан, бизиң нәхили адам болмалыдыгымыз ваҗып. Чыкыш этмек ве өвретмек укыплары ваҗып болса-да, мүйнсүз, хүшгәр, сагдын дүшүнҗели, гепи-сөзи ерликли, мыхмансөер ве юмшак болмак хас ваҗыпдыр».

«Оңат иш» үчин йүрекден җан эдйән доган яланчылыгың ве эрбетлигиң хер бир гөрнүшинден гача дуруп, өзүниң мүйнсүздигини гөркезйәр. Ол хүшгәр, сагдын дүшүнҗели, гепи-сөзи ерликли, мыхмансөер ве юмшак боланы үчин, йыгнакдакы доган-уялар онуң гөркезме берип, кынчылыкларыны чөзмәге көмек этҗекдигине ынанярлар. Шейле-де доган мыхмансөерлик билдирип, йыгнакдакы яшлары ве яңы хакыката геленлери рухландыряр. Ол кеселлән ве гарташан доган-уялара көмек эдип, теселли берйәр, чүнки ол ягшылыгы сөййәр. Доган бу хәсиетлери абрайыны галдырып, җогапкәрли борҗы алмак үчин дәл-де, адамлара ягшылык этмек үчин өсдүрйәр *.

Элбетде, яшулулар «оңат иш» үчин җан эдйән доганлара хөвес билен маслахат берип рухландырарлар. Эмма доганың өзи хем Мукаддес Язгылардакы талаплара лайык гелмек үчин тагалла этмели. Теҗрибели гөзегчи доган Хенри: «Эгер сен оңат иш үчин җан эдйән болсаң, талаба лайык гелйәндигиңи гөркезмек үчин элиңде барыны эт» диййәр. Ол Вагыз китабы 9:10-а салгыланып, сөзүни шейле довам эдйәр: «„Элиң этмәге нәме тапса, оны бар гүйҗүң билен эт.“ Яшулулар саңа нәхили юмуш табшырса-да, оны говы ерине етирҗек бол. Йыгнакда саңа нәхили иш берилсе-де, хатда пол сүпүрмели болса-да, оны йүрекден эт. Вагтың гечмеги билен, сениң эдйән ишлериң ве тагаллаларың аян болар». Эгер сен яшулы болмак ислейән болсаң, мукаддес гуллугың әхли гөрнүшинде зәхметсөер ве ынама мынасып болмага чалыш.  Сен диңе өзүңи билип, текепбир болман, кичигөвүнли болмага җан эт (Мат. 23:8—12).

Йыгнакда яшулы болмак ислейән доганларың кәбири, белки-де, шейле ислегиниң бардыгыны ачык айтман, какдырып айдяндыр я-да яшулулара говы гөрүнҗек боляндыр. Кәбирлери болса, яшулулар маслахат беренде нәгиле болярлар. Шол себәпли доган өзүнден: «Мен өз ислегими канагатландырҗак болярынмы я-да кичигөвүнлилик билен Ехованың гоюнларының аладасыны этмек ислейәринми?» дийип сораса говы болар.

Шейле-де «оңат иш» үчин җан эдйән доган яшулулардан «сүрә гөрелде болмагың» талап эдилйәндигини хем унутмалы дәл (1 Пет. 5:1—3). Ол нәдогры пикирлерден ве херекетлерден гача дуруп, йыгнакдакылара гөрелде гөркезйәр. Доган хәзир яшулы болса-да, болмаса-да сабырлы болмага җан этмели. Ол яшулы болансоң, онуң әхли эҗизликлери гудрат билен айрылмаяр (Сан. 12:3; Зеб. 106:32, 33). Доган «өзүнде бир айып гөрмесе-де», кәбир себәплере гөрә, адамлар ол барада башга пикирде болмагы мүмкин (1 Кор. 4:4). Шол себәпли яшулулар Мукаддес Язгылар эсасында саңа ак йүрекден маслахат берсе, олары гахарланман диңлеҗек бол.

Кәбир доганлар яшулы эдип белленилйәнчә, көп вагт гарашян ялы гөрүнйәр. Эгер сенем энчеме йылдан бәри «гөзегчи болмага җан чекип» гарашян болсаң, кәвагт биынҗалык болярсыңмы? Онда шу сөзлере үнс берип билерсиң: «Чыкмадык тама йүреге дертдир; хасыл болан арзув болса яшайыш агаҗыдыр» (Сүл. тым. 13:12).

Адам максадына етип билмейәндирин өйтсе, ол рухдан дүшүп билер. Ыбрайым пыгамбер хем шейле ягдая дүшүпди. Ехова оңа огул берҗекдигини вада берипди. Эмма энчеме йыл гечсе-де, Сарраның чагасы болмады (Гел. чык. 12:1—3, 7). Ыбрайым гарташан чагында Ехова ялбарып: «Эй, Хөкмүрован Реб, Сен маңа нәме берҗек? Мен перзентсиз өтерин... Сен маңа перзент бермедиң» дийди. Шонда Ехова оңа берен вадасыны берҗай этҗекдигини айдып, теселли берди. Эмма Худайың сөзи амала ашянча, Ыбрайым 14 йылданам көпрәк гарашмалы болды (Гел. чык. 15:2—4; 16:16; 21:5).

Ыбрайым пыгамбер Ехованың вадасына гарашып, шатлыгыны йитирдими? Ёк, ол хич хачан Худайың берен вадасына шүбхеленмейәрди ве гелеҗеге умыт билен гараярды. Павлус ресул: «Шейлеликде, сабырлы гарашан Ыбрайым вада етди» дийди (Евр. 6:15). Ахыры Гудратыгүйчли Худай бу вепалы пыгамбере узак вагтлап гарашан перзендини берип сылаглады. Биз Ыбрайым пыгамберден нәме өвренип билерис?

Эгер сен бирнәче йылдан бәри яшулы болмак исләп, хенизем болмадык болсаң, онда хемише Ехова бил багла. Худая гуллук эдениңде шатлыгыңы йитирмеҗек бол. Көп доганлара рухы тайдан өсмәге көмек эден Уоррен мунуң ваҗыпдыгыны шейле дүшүндирйәр: «Доганың җогапкәрли борҗы алмага лайык гелйәндиги айдың болянча, вагт герек боляр. Вагтың гечмеги билен, доганың өзүни алып баршындан ве табшырылан юмушлары ерине етиришинден онуң укыпларыны  хем-де гарайшыны юваш-ювашдан билсе боляр. Кәбирлери диңе җогапкәрли борч алса, үстүнлик газаняндырын өйдйәр. Эмма шейле гарайыш нәдогры ве адамы ченденаша алада гоймагы мүмкин. Сен ниреде болсаң-да, нәме этсең-де Ехова вепалы гуллук этсең, үстүнлик газандыгыңдыр».

Бир доган яшулы болуп белленйәнчә, он йылдан говрак гарашыпды. Ол Эзекиел китабының 1-нҗи бабындакы гөрнүше салгыланып, өзүниң нәхили сапак эдинендигини гүррүң берйәр. Ол шейле диййәр: «Ехова арабасыны, ягны гурамасыны сайлан тизлигинде йөредйәр. Шол себәпли бизиң беллән вагтымыз дәл-де, Ехованың беллән вагты ваҗыпдыр. Яшулы болмак үчин нәче гарашмалыдыгымы Ехова менден хас говы билйәр».

Сен гөзегчи болуп оңат ишлери этмәге умыт эдйән болсаң, йыгнагың бәхбиди үчин җан эт. Эгер сениң үчин вагт хаял гечйән ялы гөрүнсе, онда алада этмән, сабырлы болҗак бол. Ёкарда агзалан Раймонд доган шейле диййәр: «Өзүң барада ченденаша пикир этсең, канагатлы болмак кын боляр. Шейле хәсиетли адам Ехова гуллук эденде шатлыгыны йитирйәр». Шол себәпли Худайың мукаддес рухуның мивесини, эсасанам, сабырлылык хәсиетини өсдүрҗек бол. Мукаддес Язгылары өвренип, рухы тайдан өсмәге җан эт. Вагыз гуллугына көпрәк гатнашып, гызыкланан адамлар билен Мукаддес Язгылар окувыны гечирмек үчин тагалла эт. Шейле-де машгала агзаларыңың хемише рухы тайдан аладасыны эдип, олар билен машгала окувыны гечир. Доган-уялар билен вагтыңы биле гечирйәндигиңе беген. Сен максадыңа етйәнчәң, Ехова гуллук эдип, йүрекден шатланып билерсиң.

Йыгнакда җогапкәрли борҗы алмак Ехованың берйән берекедидир. Ехова ве онуң гурамасы оңат иш үчин җан эдйәнлериң лапыкеч болуп, гуллукда шатлыгыны йитирмегини ислемейәр. Худай ак йүрекден гуллук эдйәнлери голдаяр ве берекет берйәр. Догрудан-да, Ехова берйән берекетлериниң хич бирине «дерт-алада гошмаяр» (Сүл. тым. 10:22, МК).

Сен энчеме вагтдан бәри «оңат иш» үчин җан эдйән болсаң-да, Ехова билен достлугыңы беркитмек үчин ене-де көп затлары эдип билерсиң. Сен герекли хәсиетлери өсдүрмек үчин тагалла эдйән болсаң ве машгалаңы үнсден дүшүрмән, йыгнагың бәхбиди үчин йүрекден зәхмет чекйән болсаң, Ехова сениң эдйән ишлериңи хич хачан унутмаз. Шол себәпли йыгнакда нәхили җогапкәрли борч алсаң-да, гой, Ехова гуллук этмек саңа шатлык гетирсин!