1. Левилер китабының бизе нәхили пейдасы бар?

ЕХОВА хер бир гуллукчысының мукаддес болмагыны ислейәр. Мукаддес Язгыларың бейлеки китапларына гараныңда, мукаддеслик барада Левилер китабында көп агзаляр. Шол себәпли бу китаба говы дүшүнмек ве өзлешдирмек бизе мукаддес болмага, ягны рухы, ахлак хем-де беден тайдан арасса галмага көмек эдер.

2. Левилер китабының нәхили айратынлыгы бар?

² Левилер китабыны Муса пыгамбер язды. Бу китап хем «Язгыларың» бир бөлеги болуп, өвретмек үчин пейдалыдыр (2 Тим. 3:16, 17). Мукаддес Язгыларың асыл нусгасында Ехованың ады Левилер китабының хер бабында такмынан он гезек душ гелйәр. Бу китаба говы дүшүнмек бизе Худайың адына ыснат гетирйән затларың әхлисинден гача дурмага көмек эдер (Лев. 22:32). Шол китапда энчеме гезек агзалян «Худайыңыз Реб — Мендирин» диен сөзлер Ехова гулак асмагың ваҗыпдыгыны ятладяр. Биз шу ве индики макалада Левилер китабындан гымматбаха дүрдәне ялы пикирлере середерис. Бу бизе Худая мукаддес гуллугымызы амала ашырмага ярдам эдер.

3, 4. Харуның ве онуң огулларының ювунмагы нәмәни аңладярды? (Макаланың башындакы сурата середиң).

³ Левилер 8:5, 6-нҗы аятлары окаң *. Ехова Харуны Ысрайылда баш руханы ве онуң огулларыны халкың руханылары эдип белледи. Харун Иса Месихи, онуң огуллары болса, Исаның месх эдилен шәгиртлерини аңладяр. Харуның ювунмагы Исаның хем тәмизленмелидигини аңладярмы? Ёк. Иса гүнәсиз ве «мүйнсүз» боланы үчин, тәмизленмәге мәтәч дәл (Евр. 7:26; 9:14). Эмма Харуның ювунмагы Исаның арасса ве догручылдыгыны гөркезйәрди. Онда Харуның огулларының ювунмагы нәмәни аңладярды?

⁴ Оларың ювунмагы гөкде руханылар болмак үчин сайлананларың арассаланмалыдыгыны аңладярды. Месх эдиленлериң сувда чокундырылмагы Харуның огулларының арассаланмагы билен багланышыклымы? Ёк, сувда чокундырылмак гүнәлери ювман, адамың өзүни Ехова багыш эдендигини гөркезйәр. Месх эдиленлер Худайың «сөзи билен» арассаланярлар. Шол себәпли олар Иса Месихиң өвреден затларының әхлисини ак йүрекден ерине етирмели (Эфес. 5:25—27). Шейдип, олар мукаддес ве арасса болярлар. Эмма «башга гоюнлар» барада нәме дийсе болар? (Яхя 10:16).

5. Башга гоюнлар нәме үчин Худайың Сөзи билен арассаланяр дийсе болар?

⁵ Харуның огуллары «улы мәрекәниң» агзаларыны аңлатмаяр (Ылх. 7:9). Эмма олар хем Худайың Сөзи билен арассаланып, мукаддес болярмы? Элбетде! Ер йүзүнде яшамага умыт эдйән адамлар Мукаддес Язгылардан Исаның дөкен ганының әхмиети барада окап, иман эдйәрлер ве Худая «гиҗе-гүндиз хызмат эдйәрлер» (Ылх. 7:13—15). Месх эдилен месихчилериң ве башга гоюнларың ызыгидерли арассаланяндыгы, оларың «оңат эдим-гылымындан» айдың гөрүнйәр (1 Пет. 2:12). Ехова бу вепалы гуллукчыларының Чопаны Исаның ызына эерип, арасса ве агзыбир сежде эдйәндиклерини гөрүп, өрән бегенйәр!

6. Биз нәме үчин өзүмизи вагтал-вагтал барламалы?

⁶ Ысрайыл руханыларындан беден арассалыгының талап эдилмеги Ехованың хәзирки халкы үчин хем чуң манысы бар. Гызыкланян адамлар билен Мукаддес Язгылар окувыны гечйән доган-уялар сежде эдйән еримизиң ве эгин-эшигимизиң арасса хем-де гелшикли болмалыдыгы барада көпленч белләп гечйәрлер. Эмма руханыларың арассачылыгы Ехованың бейик дагына чыкян хер бир гуллукчысының «йүрегиниң ак» болмалыдыгыны гөркезйәр (Зебур 24:3, 4-нҗи аятлары окаң; Иш. 2:2, 3). Ехова гуллук эденимизде, бизиң диңе бир даш кешбимиз дәл, эйсем, пикиримиз ве йүрегимиз хем арасса болмалы. Шол себәпли биз мукаддес болмак үчин вагтал-вагтал өзүмизи чынлакай барламалы. Белки-де, кәбир өзгеришлери этмелидир (2 Кор. 13:5). Мысал үчин, бир доган я-да уя билгешлейин порнография гөрйән болса, өзүнден: «Шейле этмек билен, мен мукаддеслигими саклаярынмы?» дийип сораса говы болар. Шонда ол эрбет эндигини гоймак үчин көмек сорар (Якуп 5:14).

7. Левилер 8:22—24-нҗи аятлара лайыклыкда, Иса нәхили гөрелде галдырды?

⁷ Ысрайылда руханылар беллененде, баш руханы Харуның ве огулларының саг гулагына, элиниң хем-де аягының башам бармагына гочуң ганы  чалынды (Левилер 8:22—24-нҗи аятлары окаң) *. Бу оларың Ехова табын болуп, борчларыны говы ерине етирмек үчин элинде барыны этмелидигини аңладярды. Бу бабатда Баш руханы Иса месх эдиленлере ве башга гоюнлара кәмил гөрелде галдырды. Онуң гулагы Худайың гөркезмесине герлендир ве эллери Ехованың ишини эдип, аяклары хич хачан мукаддес ёлдан совулмаяр (Яхя 4:31—34).

8. Бизиң әхлимиз нәме этмели?

⁸ Бизиң әхлимиз Ехованың гуллукчылары хөкмүнде Исаның гөрелдесине эерип, айыпсызлыгымызы сакламалы. Шейле-де Мукаддес Язгылардакы гөркезмелере табын болуп, Ехованың рухуны гамгын этмеҗек болмалы (Эфес. 4:30). Биз «аякларымыз үчин гөни ёллар ясамалы» (Евр. 12:13).

9. Үч доган нәмәни гүррүң берйәр ве бу бизе мукаддес галмага нәдип көмек эдер?

⁹ Гелиң, онларча йылдан бәри Ёлбашчылык маслахатының агзалары билен якындан хызматдашлык эдйән үч доганың айдан сөзлерине середелиң. Оларың бири шейле гүррүң берйәр: «Бу мениң үчин аҗайып мүмкинчилик болды. Эмма месх эдилен доганлар билен йыгы-йыгыдан хызматдашлык эдениңде, оларың хем бизиң ялы бикәмил адамдыгына гөз етирйәрсиң. Муңа гарамаздан, мен ёлбашчылык эдйәнлере хемише табын болмагы максат эдиндим». Бейлеки доган болса шейле диййәр: «2 Коринтослылар 10:5-де „Месихе боюн болмак“ барада айдылан сөзлер ёлбашчылык эдйән доганлар билен хызматдашлык этмәге ве олара табын болмага көмек этди. Мен олара йүрекден табын болярын». Доганларың ене бири шейле диййәр: «Ехованың гурамасына ве ниетини амала ашырмакда уланян адамларына табын боляндыгымызы гөркезмек үчин, Худайың сөййән задыны сөйүп, йигренйән задыны йигренмели, хемише онүң гөркезмесини гөзлемели ве оңа яраян затлары этмели». Бу доган Ёлбашчылык маслахатының агзасы болан Нейтан Норр доганың табынлыгындан гөрелде аландыгыны айдяр. 1925-нҗи йылың «Гаравул диңи» журналындакы «Халкың дөремеги» диен макалада айдылан пикирлере башгалар шүбхеленсе-де, Норр доган йүрекден кабул эдйәр. Биз үч доганың айдан сөзлери барада ойлансак, Худая табын болмага ве мукаддес галмага көмек эдер.

10. Худайың ган барадакы канунына гулак асмак нәме үчин ваҗып?

¹⁰ Левилер 17:10, 14-нҗи аятлары окаң *. Ехова ысрайыллылара «хич бир җандарың ганыны» иймезлиги табшырды. Шол себәпли месихчилер хем гандан гача дурмалы (Рес. иш. 15:28, 29). Биз Ехова гаршы гүнә эдип, онуң бизден йүз өвүрмегини ве йыгнак гатнашыгындан кесилмегимизи гөз өңүне гетирмәге-де горкярыс. Биз Ехованы сөййәрис ве оңа гулак асмак ислейәрис. Хатда җанымыза ховп абанса-да, Ехованы танамаян ве оңа гулак асмаян адамларың ялбарышына я-да талабына ырылмак ислемейәрис. Элбетде,  гандан гача дуряндыгымыз үчин, бизи яңсылаярлар. Эмма биз Ехова табын болмагы йүрегимизе дүвдүк (Яхуда 17, 18). Ган иймекден я-да оны гойбертмекден гача дурмага бизе нәме көмек эдер? (Кан. таг. 12:23).

11. Гүнәден сапланма гүни нәме үчин йөне бир адат дәл дийсе болар?

¹¹ Гадымы Ысрайылда баш руханының Гүнәден сапланма гүнүнде ганы нәдип уланандыгыны билсек, Худайың гана болан гарайшына дүшүнмәге көмек эдер. Ган белли бир максат билен, ягны Ехова якынлашмак ислейән адамларың гүнәсиниң багышланмагы үчин уланылярды. Өкүзчәниң ве эркеҗиң ганы әхт сандыгының гапагының үстүне ве өңүне сепилйәрди (Лев. 16:14, 15, 19). Бу ган аркалы Худай ысрайыллыларың гүнәсини багышлаярды. Шейле-де Ехова кимдир бири хайваны иймек үчин өлдүрсе, онуң ганыны ере дөкүп, үстүни топрак билен басырсын дийип табшырды. Себәби «хер бир җандарың җаны — онуң ганындадыр» (Лев. 17:11—14). Бу табшырыклара йөне бир әхмиетсиз адат дийсе болармы? Ёк. Себәби йүзлерче йыл өң, Ехова Нух пыгамбере ве онуң несиллерине хем ган иймеги гадаган эдипди (Гел. чык. 9:3—6). Бу месихчилер үчин нәмәни аңладяр?

12. Павлус ресул ган аркалы гүнәлериң багышланяндыгыны нәдип дүшүндирди?

¹² Павлус ресул ган аркалы тәмизленип боляндыгыны еврей месихчилерине язан хатында шейле дүшүндирди: «Мукаддес Канун боюнча затларың хеммеси диен ялы ган билен тәмизленйәр. Ган дөкүлмән, багышланма болмаз» (Евр. 9:22). Шейле-де ол мал гурбанларының ысрайыллыларың гүнәлидигини ве гүнәден долы сапланмагы үчин хас гымматлы гурбана мәтәчдигини ятладандыгыны айтды. Хава, Муса пыгамбере берлен канун «гелҗекки оңат затларың аслы дәл-де, көлегесидир» (Евр. 10:1—4). Онда гүнәлер нәдип багышланяр?

13. Исаның ганының бахасыны Ехова хөдүрлемеги сизе нәхили тәсир эдйәр?

¹³ Эфеслилер 1:7, 8-нҗи аятлары окаң. Иса Месихиң әхли адамзат үчин берен төлег гурбанының оны ве  Ехованы сөййән адамлар үчин улы әхмиети бар (Гал. 2:20). Иса диреленсоң бизиң гүнәлеримизиң багышланмагына ёл ачды. Бу Мусаның кануны боюнча Гүнәден сапланма гүни баш руханының эден ишлерине меңзейәр. Шол гүн баш руханы чадырың иң мукаддес отагына гирип, гурбан эдилен малларың ганыны Худая хөдүрлейәрди. Шейдип, ол Худайың хузурына барян ялы болярды (Лев. 16:11—15). Шонуң ялы-да, Иса Месих ганының бахасыны гөкде Ехова хөдүрледи (Евр. 9:6, 7, 11—14, 24—28). Биз Исаның дөкен ганына иман эдип, гүнәлеримизиң багышланяндыгына ве Худая арасса ынсап билен гуллук эдип билйәндигимизе өрән бегенйәрис!

14, 15. Ехованың ган барадакы канунына дүшүнмек ве гулак асмак нәме үчин ваҗып?

¹⁴ Сиз инди Ехованың нәме үчин хич бир җандарың ганыны иймезлиги табшырандыгына говы дүшүнйәрсиңизми? (Лев. 17:10, 14). Худайың ганы нәме үчин мукаддес хасаплаяндыгына гөз етирдиңизми? Себәби ган җаны аңладяр (Гел. чык. 9:4). Хава, биз гана Худайың гарайшы ялы гарап, ондан гача дурмалы. Сиз мунуң билен ылалашярмысыңыз? Бизиң хер биримиз Худай билен достлашмак үчин, Исаның төлег гурбанына иман этмели ве ганың Ярадыҗымыз үчин әхмиетлидигине дүшүнмели (Кол. 1:19, 20).

¹⁵ Эмма биз дуйдансыз кынчылыга дүшенимизде, ган бабатда белли бир карара гелмели боларыс. Я-да машгала агзаларымызың ве дост-ярларымызың бири ган гойбертмек, ганың фракциялары, я-да ган билен беҗерги алмак барада карара гелмели боларлар. Шол себәпли болуп биләйҗек бетбагтчылыклара өңүнден тайярланмак өрән ваҗып. Биз Ехова дога эдип, гөзлег гечирсек, гандан гача дурмагы берк йүрегимизе дүвүп билерис. Элбетде, биз Ехованың язгарян ишини эдип, оны гынандырмак ислемейәрис! Лукманлар ве башгалар адамларың җаныны халас этмек үчин ган бермеги маслахат берйәрлер. Эмма Ехованың мукаддес халкы ганы нәдип уланмалыдыгыны Ярадыҗының айтмага хукуклыдыгына дүшүнйәр. Ехова «хер бир җандарың ганыны» мукаддес хасаплаяр. Шол себәпли биз Худайың ган барадакы канунына гулак асмагы йүрегимизе дүвмели. Шейле-де биз өзүмизи мукаддес алып бармак билен, Исаның ганыны гыммат сайяндыгымызы гөркезмели. Себәби диңе онуң ганы гүнәлеримизиң багышланмагына ве эбеди яшайша ёл ачяр (Яхя 3:16).

16. Ехованың халкы нәме үчин мукаддес болмалы?

¹⁶ Худай ысрайыл халкыны Мүсүр гулчылыгындан азатлыга чыкаранда, олара шейле дийди: «Мен Реб сизи Мүсүр топрагындан, сизиң Худайыңыз болмак үчин алып гелдим. Сиз мукаддес болмалысыңыз, чүнки Мен мукаддесдирин» (Лев. 11:45). Ехованың мукаддес боланы үчин, ысрайыллыларам мукаддес болмалыды. Бизем Ехованың Шаятлары боланымыз үчин мукаддес болмалы. Муны Левилер китабындан айдың гөрсе боляр.

17. Сиз инди Левилер китабына нәхили гараярсыңыз?

¹⁷ Левилер китабындан ара алып маслахатлашан пикирлеримиз бизиң үчин пейдалы болды. Биз инди Мукаддес Язгыларың Левилер китабыны хас-да гыммат сайярыс. Китапдакы ваҗып вакалар барада ойланып, биз нәме үчин мукаддес болмалыдыгымыза говы дүшүндик. Эмма Левилер китабындан ене-де нәмелери өвренип билерис? Бу китап Худая сежде эденимизде мукаддес болмага нәдип көмек эдип билер? Бу барада индики макалада гүррүң эдерис.