1, 2. a) Худайың халкы өзүни нәхили алып бармалы? б) Биз шу макалада хайсы сораглара середерис?

ПЕТРУС РЕСУЛ Левилер китабында агзалян мукаддеслик барада айдып, ысрайыллылардан талап эдилиши ялы, месихчилериң хем мукаддес болмалыдыгыны дүшүндирди (1 Петрус 1:14—16-нҗы аятлары окаң). «Мукаддес» Ехова Худай месх эдилен месихчилериң ве «башга гоюнларың» диңе кәбир ягдайларда дәл, эйсем, әхли эдим-гылымында мукаддес болмагы үчин элинде барыны этмеклерини ислейәр (Яхя 10:16).

² Бу макалада Левилер китабындан ара алып маслахатлашҗак ваҗып пикирлеримиз Худайың мукаддеслик бабатда табшырыкларына говы дүшүнмәге ве әхли эдим-гылымымызда мукаддес болмага көмек эдер. Биз шу сорагларың җогабына середерис: Башгаларың тәсирине дүшмез ялы нәме этмели? Левилер китабында Ехованың хөкүмдарлыгыны голдамак бабатда нәме айдыляр? Биз ысрайыллыларың берен гурбанларындан нәме өвренип билерис?

3, 4. a) Месихчилер Худайың када-канунларыны берҗай эденде нәме үчин башгаларың тәсирине дүшмели дәл? б) Биз нәме үчин ар алмалы дәл я-да өйке-кине сакламалы дәл?

³ Биз Ехованың гөвнүнден турмак үчин, адамларың нәдогры гарайышларының тәсирине дүшмән, хемише Худайың када-канунларыны берҗай этмели. Биз Мусаның кануны  астында болмасак-да, ондакы табшырыклар Худайың назарында нәмәниң догрудыгына ве нәдогрудыгына дүшүнмәге көмек эдйәр. Меселем, ысрайыллылара шейле табшырык берлипди: «Өз халкыңдан өч алма, оларың хич бири бабатда ичиңде китүв саклама. Гайтам, ёлдашыңы-да өзүңи сөйшүң ялы сөй. Сизиң Худайыңыз Реб — Мендирин» (Лев. 19:18).

⁴ Ехова бизиң ар алмагымызы ве ичимизде өйке-кине сакламагымызы ислемейәр (Рим. 12:19). Биз Худайың када-канунларына гулак асмасак, Шейтаны бегендирип, Ехованың адына ыснат гетирерис. Эгер кимдир бири билгешлейин гөвнүмизе дегсе-де, йүрегимизде кине сакламалы дәл. Худай бизи ичинде хазына сакланян «топрак гаплара» меңзедйәр. Бу хазына — бизиң вагыз гуллугымыз (2 Кор. 4:1, 7). Шол себәпли биз ичимизде авы ялы өйке-кине сакламак ислемейәрис!

5. Биз Харундан ве онуң огулларының өлүминден нәме өвренип билерис? (Макаланың башындакы сурата середиң).

⁵ Левилер 10:1—11-нҗи аятларда Харуның машгаласының гынанчлы ягдайы беян эдилйәр. Гөкден от гелип, мукаддес чадырда Харуның огуллары Надап билен Абыхуны якып күл эденде, онуң машгаласы гайгы-хасрат чекендир. Өлен якынлары үчин яс тутмалы дәлдиги айдыланда, Харун ве онуң машгаласы үчин, гөр, нәхили улы сынаг боландыр! Сизиң машгала агзаларыңызың я-да дост-ярларыңызың бири йыгнак гатнашыгындан кесилен болса, олар билен гатнашман, мукаддеслигиңизи саклаярмысыңыз? (1 Коринтослылар 5:11-и окаң).

6, 7. a) Ника гыйылыш дәбине гатнашмак бабатда карара геленимизде нәме барада ойланмалы? (Чыкгыда середиң). б) Биз ника гыйылыш дәбине гатнашмаяндыгымызың себәбини нәдип дүшүндирип билерис?

⁶ Белки-де, биз Харун ве онуң машгаласы ялы агыр сынага дүшйән дәлдирис. Эмма Ехованың Шаяды болмадык доган-гарындашларымыз бизи тоюна чагырып, ника гыйылыш дәбине гатнашмагымызы ислесе нәме? Мукаддес Язгыларда бу бабатда анык гөркезме берилмесе-де, ондакы принциплер бизе догры карара гелмәге көмек эдер *.

⁷ Биз мукаддес болуп, Ехованың гөвнүнден турмак ислейәрис. Шол себәпли бизиң гелйән карарларымыз иман этмейән доган-гарындашларымызы гең галдырмагы мүмкин (1 Пет. 4:3, 4). Элбетде, биз оларың гөвнүне дегмек ислемейәрис. Эмма олар билен мәхирли гүрлешип, ягдайымызы ачык дүшүндирсек говы болар. Муны тойдан өң айтсак пайхаслы болар. Биз олара миннетдарлык билдирип, тоюна чагырандыгы үчин бегенйәндигимизи айдып билерис. Соңра биз дини ынанчларымыз себәпли тойдакы кәбир чәрелере гатнашман, оларың ве мыхманларың кейпини бозмак ислемейәндигимизи дүшүндирип билерис. Шейдип, биз дини ынанчларымыз бабатда башгаларың тәсирине дүшмерис.

8. Левилер китабында Ехованың хөкүмдарлыгы барада нәме айдыляр?

⁸ Левилер китабында Ехованың хөкүмдарлыгы бабатда ныгталып гечилйәр. Бу китапда канунлары Ехованың берйәндиги барада отуз гезекден говрак айдыляр. Муса пыгамбер хем муңа говы дүшүнйәрди ве Ехованың табшырыкларыны берҗай эдйәрди (Лев. 8:4, 5). Шонуң ялы биз хем хемише Хөкүмдарымыз Ехованың ислегини ерине етирмели. Бу бабатда бизе Худайың гурамасы көмек эдйәр. Эмма Исаның чөлде сыналышы ялы, биз хем еке галанымызда сынага дүшүп билерис (Лука 4:1—13). Эгер биз үнсүмизи Худайың хөкүмдарлыгына гөнүкдирип, оңа бил багласак, хич кимиң тәсирине дүшмерис ве хич затдан горкмарыс (Сүл. тым. 29:25).

9. Бүтин дүнйәде Худайың халкыны нәме үчин йигренйәрлер?

 ⁹ Ехованың Шаятлары бүтин дүнйәде ызарланяр. Бу бизи гең галдырмаяр, себәби Иса шәгиртлерине: «Онсоң сизи гайга басдырарлар, өлдүрерлер, Мениң адым үчин хемме миллетлер сизи йигренер» дийипди (Мат. 24:9). Худайың халкыны йигренселер-де, олар Патышалык барада вагыз этмегини бес этмейәр ве Ехованың өңүнде мукаддеслигини саклаяр. Биз догручыл болуп, беден ве ахлак тайдан арасса яшаярыс хем-де хәкимиетлере табын болярыс. Онда нәме үчин бизи йигренйәрлер? (Рим. 13:1—7). Себәби биз Хөкүмдарымыз Ехова табын болярыс. Биз «диңе Оңа» гуллук эдйәрис ве онуң када-канунларыны берҗай эденимизде, хич хачан башгаларың тәсирине дүшмейәрис (Мат. 4:10).

10. Битараплыгыны сакламадык бир доган нәхили ягдая дүшди?

¹⁰ Биз бу «дүнйәден дәлдигимиз» үчин, урушлара ве сыясы давалара гошулмаярыс (Яхя 15:18—21; Ишая 2:4-нҗи аятлары окаң) *. Ехова өзүни багыш эден гуллукчыларының кәбири башгаларың тәсирине дүшүп, битараплыгыны сакламадылар. Эмма оларың көпүси тоба эдип, гечиримли Худайымыз билен гатнашыгыны дикелтдилер (Зеб. 51:17). Кәбири болса тоба этмедилер. Меселем, II Җахан уршы дөврүнде хөкүмет ёлбашчылары биканун түрмә басылан 45 яшларындакы 160 саны доганы Венгриядакы түрмелериң әхлисинден йыгнап, бир шәхере гетирдилер. Олар бу доганларың харбы гуллуга гитмегини талап этдилер. Вепалы доганлар гитмеҗекдигини айдып, берк дурдулар. Эмма 9 доган харбы касамыны айдып, эсгерлериң эшигини гейдилер. Шондан ики йыл геченсоң, харбы гуллуга гиден доганларың бири Ехованың Шаятларыны җезаландырмага гатнашмалы болды. Оларың арасында онуң сүйтдеш доганы хем барды! Хер нәме болса-да, вепалы Шаятлары җезаландырмадылар.

11, 12. Ысрайыллыларың берен гурбанларындан нәме өвренйәрис?

¹¹ Муса пыгамбере берлен канунда ысрайыллыларың нәхили гурбанлары бермелидиги анык айдылярды (Лев. 9:1—4, 15—21). Бу гурбанлар Исаның кәмил җаныны аңладяндыгы үчин, шикессиз болмалыды. Шейле-де ысрайыллылар хер гезек гурбан беренде, белли бир гөркезмә эермелидилер. Меселем, чага догран аялдан нәме талап эдилендиги барада Левилер 12:6-да шейле дийилйәр: «Огул үчинми я-да гыз үчин — пархы ёк, аял өзүниң тәмизлениш дөври тамамланандан соң, ол якма гурбанлыгы үчин биряшар токлыны ве гүнә гурбанлыгы үчин бир кепдерини я-да гумрыны Реббе йүз тутулян чадырың агзындакы рухана гетирип берсин». Ехова канунда анык табшырыклары берсе-де, олар онуң сөйгүден долы ве пайхаслы Худайдыгыны айдың гөркезйәрди. Мысал үчин, чага догран аялың токлы гурбан бермәге ягдайы болмаса, ол ики гумры я-да кепдери берип билйәрди (Лев. 12:8). Ехова бу гарып аялы сөйүп, гадырыны билйәрди ве улы мал гурбаныны берйән байлар билен дең дереҗеде гөрйәрди. Биз мундан нәме өвренип билерис?

¹² Павлус ресул месихчилери Худая «өвги гурбанларыны» бермәге хөвеслендирди (Евр. 13:15). Биз адамлара Ехованың мукаддес ады барада вагыз эдип, өвги гурбанларыны хөдүрлейәрис. Лал доган-уялар хем лалларың дилинде Худая өвги гурбанларыны берйәрлер. Кеселчилик я-да гарташанлык себәпли өйүнден чыкып билмейән месихчилер болса хат, телефон аркалы, я-да  өйүне гелйән адамлара ве мыхманлара вагыз эдип, Худайы шөхратландырярлар. Элбетде, биз Ехова гуллук эденимизде, саглык ягдайымызы ве мүмкинчилигимизи гөз өңүне тутмалы, йөне вагыз этмек үчин элимизде барыны этмели (Рим. 12:1; 2 Тим. 2:15).

13. Биз нәме үчин вагыз хасабатыны табшырмалы?

¹³ Биз Ехованы сөййәндигимиз үчин, хөвес билен өвги гурбанларыны хөдүрлейәрис (Мат. 22:37, 38). Эмма бизден хер ай вагыз хасабатыны табшырмак талап эдилйәр. Муңа нәхили гарамалы? Бу хасабатлары табшырмак билен, биз Худая вепалыдыгымызы гөркезйәрис (2 Пет. 1:7). Йөне месихчилер диңе көп сагат табшырмак үчин вагыз этмели дәл. Вагызчы саглык ягдайы я-да гарташанлыгы себәпли, хатда 15 минут табшырмагы-да мүмкин. Ол элинде барыны эдип, вагыз эдендиги үчин, Ехова онуң бу санлыҗа минутларыны хем гыммат сайяр. Худай бу доган-уяларың оны сөййәндигини ве Ехованың Шаятлары болмак хорматыны гыммат сайяндыгыны билйәр. Гадымы Ысрайылда хатда гарып адамларың хем Худая гурбан бериши ялы, шу гүнлер көп гуллук эдип билмейән доган-уяларам хасабат табшырярлар. Бизиң берйән хасабатларымыз бүтиндүнйә хасабатына гошант гошуп, гелеҗекде вагыз ишини нәдип үстүнликли амала ашырып болҗакдыгыны кесгитлемәге көмек эдйәр. Ине, шол себәпли-де, биз вагыз хасабатыны табшырярыс.

14. Биз машгала ве шахсы окувы гечиришимиз барада нәме үчин ойланмалы?

¹⁴ Биз Левилер китабындан бирнәче ваҗып пикирлере серетдик. Сиз инди Мукаддес Язгылардакы бу китабың әхмиетине говы дүшүненсиңиз (2 Тим. 3:16). Шейле-де сиз диңе Ехованың талап эдйәндиги үчин дәл, эйсем, онуң гөвнүнден турмак ислейәндигиңиз үчин мукаддес болмагы йүрегиңизе дүвенсиңиз. Шу ики макалада Левилер китабындан билен затларымыз Худайың Сөзүни чуңңур өвренмәге хөвеслендирендир (Сүлейманың тымсаллары 2:1—5-нҗи аятлары окаң). Элбетде, биз Ехованың өвги гурбанларымызы кабул этмегини ислейәрис. Шол себәпли Ехова дога эдип, машгала ве шахсы окувымызы нәдип гечирйәндигимиз барада ойланмалы. Биз телегеплешиклериң, видеооюнларың, спортуң я-да халаян затларымызың рухы өсүшимизе пәсгел бермегине ёл берйәрисми? Эгер шейле болса, Павлус ресулың еврейлере язан хатында берен маслахаты барада ойлансак говы болар.

15, 16. Павлус ресул еврей месихчилерине нәме үчин гөнүмел маслахат берди?

¹⁵ Павлус ресул еврей месихчилерине гөнүмел маслахат берди (Еврейлер 5:7, 11—14-нҗи аятлары окаң). Ол догумлылык билен оларың «эшитмәге ислегсиздигини» айтды. Нәме үчин? Себәби бу месихчилер диңе рухы сүйт билен гутулмак ислейәрдилер. Павлус ресул Ехованың гөрелдесине эерип, оларың сөйги билен аладасыны эдйәрди. Мукаддес Язгыларың эсасы таглыматларыны билмек ваҗып болса-да, рухы тайдан берк болмак үчин «агыр дамак» иймек хас ваҗыпдыр.

¹⁶ Еврей месихчилери башгалара өвретмели  болса-да, илки билен, өзлери тәлим алмалыды. Нәме үчин? Себәби олар «агыр дамак» иймейәрдилер. Биз хем өзүмизе шейле сораглары берип билерис: «Мен Мукаддес Язгылары чуңңур өзлешдирмәге нәхили гараярын? Мен оны йүрекден өвренйәринми? Я-да мен дога этмәге ве Мукаддес Язгылары чуңңур өвренмәге совук-сала гараярынмы? Муңа шахсы окувымы ызыгидер гечирмейәндигим тәсир эдйән болаймасын?» Биз адамлара диңе бир вагыз этмән, эйсем, олара Исаның шәгирди болмага-да көмек этмели (Мат. 28:19, 20).

17, 18. a) Биз нәме үчин Мукаддес Язгылары чуңңур өзлешдирмели? б) Йыгнак душушыкларына гитмезден өң спиртли ичгилери ичмеклиге нәхили гарамалы?

¹⁷ Ехова бизиң хич биримизи Мукаддес Язгылары өвренмәге меҗбур этмейәр. Белки-де, муны этмек бизе аңсат дүшйән дәлдир. Эмма биз Худая энчеме йылдан бәри гуллук эдйән я-да яңы-якында гуллук эдип башлан болсак-да, мукаддес ёлдан йөремек үчин, Худайың Сөзүни чуңңур өзлешдирмегимизи довам этмели.

¹⁸ Биз мукаддес болмак үчин, Худайың Сөзүни чуңңур өзлешдирип, Ехованың ислегини берҗай этмели. Гелиң, Харуның огуллары Надап ве Абыху барада ойланып гөрелиң. Белки-де, олар ичгили ягдайда «мукаддес дәл» оды хөдүр эдендир. Шол себәпли Худай олары җезаландырды (Лев. 10:1, 2). Шондан соң Ехова Харуна айратын табшырык берди (Левилер 10:8—11-нҗи аятлары окаң) *. Бу табшырык бизиң йыгнак душушыкларына гитмезден өң спиртли ичгилери асла ичмели дәлдигимизи аңладярмы? Элбетде, биз Мусаның канунына гөрә яшамаярыс (Рим. 10:4). Кәбир юртларда имандашларымыз йыгнак душушыкларына гитмезден өң нахар иенлеринде, аз мукдарда спиртли ичгилери ичйәрлер. Шейле-де Песах байрамында дөрт кәсе шерап уланылярды. Иса Ятлама агшамыны гиризенде, ганының нышаны хөкмүнде ресуллары билен шерап ичди (Мат. 26:27). Эмма Мукаддес Язгыларда ченденаша көп ичмеклик ве араккешлик язгарыляр (1 Кор. 6:10; 1 Тим. 3:8). Доган-уяларың көпүси ынсабы ёл бермейәндиги үчин, мукаддес гуллугың ислендик гөрнүшине гатнашмаздан өң, спиртли ичгилери асла ичмейәрлер. Элбетде, бир халкың гарайшы бейлекиден тапавутланяр. Муңа гарамаздан, әхли месихчилер үчин иң ваҗып зат — өзлерини мукаддес алып бармак. Шол себәпли олар Худайың гөвнүнден турмак үчин, «мукаддес зат билен йөнекей зады» тапавутландырмагы башармалы.

19. a) Биз машгала ве шахсы окувымызың хилини нәдип говуландырып билерис? б) Сиз мукаддес болмак бабатда нәмәни йүрегиңизе дүвдүңиз?

¹⁹ Худайың Сөзүни чуңңур өвренсек, үсти ачылмадык көп хазыналары тапарыс. Шол себәпли биз голланмалар аркалы гөзлег гечирип, машгала ве шахсы окувымызың хилини говуландырмага чалышмалы. Ехова ве онуң ниетлери барада билимимизи артдырып, оңа хас-да якынлашалың (Якуп 4:8). «Гөзлерими ач, кануныңда аҗайып затлар гөрейин» дийип, нагма айдан мезмурчы ялы, Худая дога эделиң (Зеб. 119:18). Ехованың када-канунларыны берҗай эденимизде, хич хачан башгаларың тәсирине дүшмәлиң. «Мукаддес» Ехованың ёкары кануныны йүрекден ерине етирип, «Худайың хош хабарыны» вагыз этмәге ыхласлы гатнашалың (1 Пет. 1:15; Рим. 15:16). Шу соңкы кын гүнлерде мукаддеслигимизи саклалың. Гелиң, әхлимиз эдим-гылымымызда мукаддес болуп, мукаддес Худайымыз Ехованың хөкүмдарлыгыны голдалың!