БИРНӘЧЕ яш месихчи кино гөрмәге гитмекчи боляр. Себәби олар мекдепде көп дең-душларындан шол киноның говудыгыны эшидйәрлер. Олар кинотеатра геленлеринде, афишада улы ярагың ве ярым-ялаңач гейнен аялларың суратыны гөрйәрлер. Олар нәме эдерлер? Хер нәмеде болса, киноны гөрерлерми?

Биз хер гүн Ехова билен достлугымызы беркидйән я-да бозян карарлара гелмели болярыс. Кәвагт сен бир зады этмеги йүрегиңе дүвенсоң, ол барада көпрәк ойланып, пикириңи үйтгетмегиң мүмкин. Бу сениң карара гелип билмейәндигиңи аңладярмы? Я-да оны үйтгетмек догрумы?

Биз Ехованы сөййәндигимиз үчин, оңа өзүмизи багыш эдип, сувда чокундырылдык. Шол себәпли оңа йүрекден вепалы болмак ислейәрис. Йөне ганым душманымыз Шейтан Иблис бизи Еховадан дашлашдырҗак боляр (Ылх. 12:17). Биз Ехова гуллук эдип, онуң табшырыкларыны берҗай этмеги берк йүрегимизе дүвдүк. Биз өзүмизи Ехова багыш эденсоң, пикиримизи үйтгетсек, нәхили гынанчлы боларды! Себәби бу өлүме элтйәр.

2 600 йыл мундан өң Бабылың патышасы Небукаднесар улы алтын хейкел ясап, әхли адамлара онуң өңүнде дыза чөкүп, сежде этмеги буюряр. Муңа гулак асмадык адам янып дуран пеҗе ташланмалыды. Ехованың үч гуллукчысы Шадрак, Мейшак ве Абеднего хейкеле сежде этмедилер. Шол себәпли олары янып дуран пеҗе окладылар. Ехова олары гудрат билен халас этди, себәби олар Худая гуллук этмеги йүрегине  берк дүвүп, җаныны ховп астына салдылар (Дан. 3:1—27).

Даныел пыгамбер хем ёлбарслы чукура ташланҗагыны билсе-де, эрҗеллик билен дога этди. Ол эндиги боюнча гүнде үч гезек Ехова дога эдйәрди. Даныел Худая сежде этмек үчин гелен карарыны үйтгетмеди. Шол себәпли Ехова оны «ёлбарсың пенҗесинден» халас этди (Дан. 6:1—27).

Шу гүнлерем Худайың гуллукчылары оңа берен вадасына гөрә яшаярлар. Африканың бир мекдебинде Ехованың яш гуллукчылары байдага сежде этмедилер. Шонуң үчин олара мекдепден ковулҗакдыгыны айтдылар. Бирнәче вагтдан оларың шәхерине билим министри гелип, бирнәче яш месихчилер билен гүррүңдеш боляр. Шол яш месихчилер горкман, юмшаклык билен оңа гарайшыны дүшүндирдилер. Шондан бәри олары байдага сежде этмәге меҗбур этмейәрлер ве олар аркайын мекдебе барярлар.

Инди Юсуп доганың мысалына середелиң. Онуң аялы рак кесели себәпли арадан чыкяр. Юсубың доган-гарындашлары мерхумы җайламак бабатда онуң гарайшына дүшүнип, хормат гойярдылар. Эмма аялының доган-гарындашлары хакыкатда болмансоң, Худая ярамаян кәбир дәплери берҗай этҗек болдулар. Юсуп доган шейле гүррүң берйәр: «Мен олар билен ылалашмансоң, чагаларымы ырҗак болдулар, оларам берк дурдулар. Аялымың доган-гарындашлары өйүмизде мерхумың хатырасына пата берҗек боланларында, мен олара өйүмде дәл-де, башга ерде эдиң дийдим. Олар бизиң пата бермейәндигимизи билйәрдилер, шол себәпли көп гүррүңдешликден соң, башга ерде пата бердилер.

Шол кын дөвүр мен Еховадан машгаламың онуң кануныны бозмаз ялы көмек этмегини диледим. Ол догаларыма җогап берип, сынагда берк дурмага көмек этди». Юсуп ве онуң чагалары иманы бабатда гарайшыны үйтгетмедилер.

Б. э 32-нҗи йылында Песах байрамындан соң Иса Сайда этрабына геленде, онуң янына бир кенганлы аял баряр. Ол Исадан гызының ичинден җыны ковмагы бирнәче гезек хайыш эдйәр. Иса, илки, оңа хич хили җогап бермейәр. Ол шәгиртлерине: «Мен диңе Ысрайыл өйүниң йитирим болан гоюнларына иберилдим» диййәр. Кенганлы аял ялбарып дурансоң, Иса оңа: «Чагаларың чөрегини алып, итлере зыңмак догры дәлдир» дийип җогап берди. Шонда аял берк иманының бардыгыны гөркезип: «Хава, я Реб, йөне итлер хем эелериниң сачагындан гачан чөрек овунтыкларыны иййәндир» дийди. Иса онуң гызыны сагалдып, хайышыны битирди (Мат. 15:21—28).

Шейтмек билен Иса Ехованың гөрелдесине эерди. Себәби кәбир ягдайларда Ехова мүмкин болса пикирини үйтгедйәрди. Меселем, ысрайыллылар алтын гөле ясанда, Ехова олары ёк этмекчиди, эмма Муса хайыш эденсоң, пикирини үйтгетди (Мүс. чык. 32:7—14).

Павлус ресул хем Ехова билен Исаның гөрелдесине эерди. Бир гезек Павлус ресул миссионер сыяхатына Яхяны, ягны Маркусы алып гитмек ислемейәр. Себәби ол илкинҗи миссионер сыяхатында Павлус билен Барнабасы ташлап гидйәр. Эмма соңра Павлус Маркусың рухы тайдан етишендигине ве көмек эдип билҗекдигине гөз етирйәр. Шол себәпли Павлус Тимотеоса: «Маркусы алып гайт. Хызматымы ерине етирмекде маңа көмеги дегер» диййәр (2 Тим. 4:11).

Биз бу вакалардан нәме өвренип билерис? Биз рехимдар, сабырлы ве сөйгүден  долы гөкдәки Атамыздан гөрелде алсак, адамлар барада пикиримизи үйтгедип билерис. Ехова билен Исадан тапавутлыкда биз бикәмилдирис. Эгер олар пикирини үйтгеден болса, биз хем адамларың ягдайыны гөз өңүнде тутуп, пикиримизи үйтгетмели дәлми нәме?

Рухы максатлары гоянымызда гарайшымызы үйтгетсек говы болар. Кәбир адамлар Мукаддес Язгылар окувыны гечип, йыгнак душушыкларына барса-да, сувда чокундырылмага яйданяр. Кәбир доган-уяларың пионер гуллугына башламага мүмкинчилиги болса-да, икирҗиңленйәр. Кәбир доганлар йыгнакда җогапкәрли борчлары аласы гелмейән ялы гөрүнйәр (1 Тим. 3:1). Сенем шоларың бирими? Ехова сениң шу максатларыңа етмегиңи йүрекден ислейәр. Ехова ве адамлара шатлык билен гуллук эдер ялы гарайшыңы үйтгедип билермиң?

Африканың Бейтелинде гуллук эдйән Элла уя шейле диййәр: «Бейтеле геленимде, узак вагт гуллук эдерин өйтмейәрдим. Ехова йүрекден гуллук этмек ислесем-де, машгаламы гаты говы гөрйәрдим. Башда мен машгаламы өрән күйсейәрдим! Эмма мениң билен биле яшаян уя рухландыряндыгы үчин, Бейтелде галмагы йүрегиме дүвдүм. Хәзир мен Бейтелде он йылдан бәри гуллук эдйәрин ве мүмкин болдугындан доган-уялара хызмат эдер ялы бу ерде көпрәк гуллук этмек ислейәрин».

Кабыл доганына гөрипчилик эдип, гахар-газаба мүненде, нәме боландыгы ядыңа дүшйәрми? Худай мерхеметини  газанар ялы, оңа ягшы ишлери этмеги маслахат берйәр. Худай Кабыла гүнәниң «босагада» дурандыгыны ве оңа агалык этмелидигини айдяр. Кабыл гарайшыны ве ниетини үйтгедип билсе-де, Худайың маслахатына гулак асмады. Гынансак-да, Кабыл доганыны өлдүрип, илкинҗи ганхор болды (Гел. чык. 4:2—8).

Узыя патышаның мысалына середелиң. Башда ол Худайы агтарып, онуң өңүнде догры ишлери эдйәрди. Эмма вагтың гечмеги билен текепбир боландыгы үчин өңки эден ягшы ишлери бидерек болды. Ол руханы болмаса-да, ыбадатханада якымлы ыслы түтетгини якды. Руханылар муны этмели дәлдигини дуйдуранда ол пикирини үйтгетдими? Ёк, үйтгетмеди. Узыя «газапланып», олара гулак асмады. Шол себәпли Ехова оны хейвере кеселине ёлукдырды (2 Йыл. 26:3—5, 16—20).

Кәвагт бизем гарайшымызы үйтгетмели болярыс. Бир мысала середелиң. Иоахим доган 1955-нҗи йылда сувда чокундырыляр, эмма 1978-нҗи йылда ол йыгнак гатнашыгындан кесилйәр. Ол 20 йылданам көп вагт геченсоң, тоба эдип, ене-де Ехованың Шаяды болды. Яңы-якында бир яшулы онуң нәме үчин көп вагтлап ызына доланмандыгыны соранда, ол шейле җогап берди: «Мен гахарлыдым ве текепбирдим. Инди болса шонча вагтлап гайдып гелмәниме өкүнйәрин. Мен йыгнак гатнашыгындан кесилсем-де, Ехованың Шаятларының хакыкаты өвредйәндигини билйәрдим». Иоахим доган гарайшыны үйтгедип, тоба этмелиди.

Бизем кәвагт гарайшымызы ве гелен карарларымызы үйтгетмели болярыс. Муны этсек, Ехованы бегендирерис (Зеб. 34:8).