Павлус ресулың дул хатын «бир әре аял» болмалы диен сөзлери онуң дул галмазындан өңки ягдайыны гөркезйәр. Бу дул аялың диңе бир гезек дурмуш гурмалыдыны аңладярмы? Я-да Павлусың сөзлери башга зады аңладярмы?

Кәбирлери Павлус ресул диңе бир гезек дурмуш гуран дул аяллар барада айтды диййәрлер. Догрудан-да, кәбир медениетде ве җемгыетде дурмуш гурмадык дул аялы ягшы ишлери эдйән адам хасаплаярдылар. Эмма бу Павлусың башга аятларда айдан сөзлерине гаршы гелйәр. Меселем, ол Коринтосдакы месихчилере дул аялың дурмуш гурмаса, хас-да багтлы болҗакдыгыны айтса-да, «исләнине бармага азатдыр, йөне Ребде болмалыдыр» дийди (1 Кор. 7:39, 40; Рим. 7:2, 3). Павлус ресул Тимотеоса язан хатында: «Мен яш дул хатынларың әре бармакларыны... ислейәрин» дийди (1 Тим. 5:14). Шол себәпли дул аял дурмуш гурмак ислесе, оны язгарып болмаяр.

Онда Павлус ресулың Тимотеоса язан сөзлери нәмәни аңладяр? «Бир әре аял» диен җүмле диңе шу аятда душ гелсе-де, Мукаддес Язгыларың асыл нусгасында «бир әриң аялы» диймеги аңладяр. Шуңа меңзеш «бир аялың әри» диен җүмләни Павлус ресул башга аятларында хем уланыпды (1 Тим. 3:2, 12; Тит. 1:6). Бу сөзлери Павлус ресул йыгнак гөзегчилери ве гуллук хызматчылары үчин язан талапларында айтды. Аятлара гөрә, илки билен, месихчилер йыгнагында җогапкәрли борҗы алмак ислейән доган өйленен болса, аялына вепалы ве ахлак тайдан арасса болмалы. Шонуң ялы 1 Тимотеос 5:9-дакы сөзлере гөрә, әри дирикә оңа вепалы ве ахлак тайдан арасса болан дул аяллара месихчилер йыгнагындан көмек берилмелиди. Павлус ресулың айдан башга талаплары хем шол дул хатын барада айдяндыгыны гөркезйәр (1 Тим. 5:10).