ЯРАДЫҖЫМЫЗ ынсана гымматлы совгат — эркинлик берди. Худай эркинлиги өз бәхбиди үчин уланман, хакыкы сеждәни голдап, онуң мукаддес адыны аян эдйәнлере бол берекет берйәр. Ехова адамларың өзүне меҗбурлык я-да горкы билен табын болмагыны ислемейәр. Гайтам, ол вепалы, хилесиз сөйгини гөркезйән ве йүрекден миннетдар болян адамлары гыммат сайяр.

Меселем, Ехова ысрайыллылара Сина дагында сежде этмек үчин чадыр гурмагы табшырыпды. Ол: «Өз араңыздан Реббе садака йыгнаң. Хер ким гөвнүнден чыкаран... затларыны Реббе садака берсин» дийди (Мүс. чык. 35:5). Хер бир ысрайыллы ягдайына гөрә, чадыры гурмак үчин герекли затлары мейлетин садака хөкмүнде берип билйәрди. Олар муңа нәхили гарады?

Ысрайыллыларың хер бири «йүрегинден бесләп, гөвнүнден чыкараныны» мейлетин садака хөкмүнде берди. Эркеклер ве аяллар Ехованың чадырыны гурмак үчин шу затлары хөвес билен гетирдилер: гүлякалар, гулакхалкалар, билезиклер, йүзүклер, алтын, күмүш, бүрүнч, гойы гырмызы йүңи, гөк ве гырмызы йүплүгини, непис зыгыр матасыны, гечи йүңүни, гочуң эйленен дерисини, сайлама дерини, акация агаҗыны, гашлары, якымлы ыслы затлар ве яг. «Оларың гетирен затлары эййәм әхли иши ерине етирмек үчин герегинден хем артыкды» (Мүс. чык. 35:21—24, 27—29; 36:7).

Ехова ысрайыллыларың гетирен затлары дәл-де, хакыкы сеждәни хөвес билен голдандыгы ярады. Олар вагтыны хем гүйҗүни гайгырмадылар. Мукаддес Язгыларда «әхли укыплы чепер элли аяллар» барада хем айдыляр. «Йүреклерине салнан әхли башарҗаң аяллар гечиниң йүңүнден хем йүплүк өрдүлер». Ехова Бесалеле «дүрли хили сенетчилик ишлеринде укып, акыл-пайхас ве башарҗаңлык берди». Гөршүмиз ялы, Худай Бесалеле ве Охалияба чадырдакы әхли ишлери ерине етирмек үчин укып берди (Мүс. чык. 35:25, 26, 30—35).

Ехова ысрайыллыларың хер бириниң хакыкы сежде үчин садаканы «йүрегинден бесләп» берҗекдигине ынанярды. Ысрайыллылар садакасыны хөвес билен берендиги үчин берекет алып, бегендилер. Ехова ислегини хөвес билен берҗай эдйән гуллукчыларының укыбыны ве теҗрибесини артдыряндыгыны гөркезди (Зеб. 34:9). Биз хем өз бәхбидимизи гөзлемән Ехова гуллук этсек, бол берекет аларыс.