1, 2. Худай гуллукчыларының яшына гарамаздан, оларың нәме этмегини ислейәр?

СЕН яшмы? Онда сен Ехованың бүтиндүнйә гурамасында гыммат сайылярсың. Энчеме юртларда сувда чокундырылан доган-уяларың көпүси яшлар. Көп яшларың Ехова гуллук этмеги йүрегине дүвендиклерини гөрмек өрән рухландыряр!

² Сен яш месихчи хөкмүнде дең-душларың билен вагтыңы гечирмеги говы гөрйәрмиң? Белки, говы гөрйәнсиң. Элбетде, хеммелер дең-душлары билен вагтыны гечирмеги говы гөрйәр. Худай бизиң яшымыза ве аслымыза гарамаздан, оңа агзыбир сежде этмегимизи ислейәр. Павлус ресул хем Худайың «бүтин адамларың гутулмагыны, хакыкат билимине етмегини ислейәндигини» айтды (1 Тим. 2:3, 4). Ылхам 7:9-дан Худайың гуллукчыларының «хер тайпадан, хер халкдан ве хер дилдендигини» билйәрис.

3, 4. a) Шу гүнлер яшларың көпүси нәхили гарайышда? б) Эфеслилер 4:25-де Павлус ресул йыгнагы нәхили суратландырды?

³ Ехованың яш гуллукчылары бу дүнйәниң яшларындан өрән тапавутланяр! Ехова гуллук этмейән яшларың  көпүси диңе өзүни билйәр ве ислән задыны эдйәр. Алымларың айтмагына гөрә, шу гүнлер яшлар диңе өзүни билйәр. Оларың гүрлейши ве гейниши бейлеки адамлары, эсасанам, улы яшдакы адамлары сыламаяндыгыны гөркезйәр.

⁴ Шейле гарайшың гиңден яйрандыгы себәпли, Ехова гуллук эдйән яшлар оңа гаршы дуруп, Худайы бегендирмек үчин көп тагалла эдйәрлер. Павлус ресул хем I асырдакы месихчилере «сөз диңлемейән адамларда хәзир ишлейән руха» гаршы дурмагы маслахат берди (Эфеслилер 2:1—3-нҗи аятлары окаң). Йыгнакдакы яшларың шейле руха гаршы дурмагы бегендирйәр. Олар доган-уялар билен Ехова гуллук этмек ислейәрлер. Себәби Павлус ресул: «Бизиң хеммәмиз бир бедениң агзаларыдырыс» дийди (Эфес. 4:25). Залым дүнйәниң соңы етип гелйәндиги үчин доган-уялар билен биле болмак өрән ваҗып. Гелиң, Мукаддес Язгылардан агзыбир болмага көмек эдйән кәбир мысаллара середелиң.

5, 6. Лутуң ве онуң гызларының мысалындан нәме өвренйәрис?

⁵ Гечмишде Ехованың халкы энчеме ховплы ягдайлара дөз гелди. Ехова олары биле боланларында ве бир-бирине көмек эденлеринде гораярды. Шу гүнлер яш ве улы яшдакы Худайың гуллукчылары Мукаддес Язгылардакы мысаллардан көп затлары өвренип билер. Гелиң, Лутуң мысалына середелиң.

⁶ Лут ве онуң машгаласы өрән ховплы ягдая дүшйәр. Себәби, Ехова оларың яшаян шәхери Содомы ёк этмекчиди. Худайың перишделери Лутуң «хеләк болмазлыгы» үчин оңа шәхерден чыкып, даглык ере гачмалыдыгыны айдяр (Гел. чык. 19:12—22). Лут ве онуң ики гызы гулак асып, шәхерден чыкып гидйәр. Гынансак-да, Лутуң бейлеки машгала агзалары гулак асмадылар. Лутуң гызларына өйленҗек яш йигитлер ол «дегишйәндир өйдүп», айдан сөзлерине ынанмадылар. Нетиҗеде, олар хеләк болды (Гел. чык. 19:14). Диңе Лут ве онуң гызлары биле боландыклары үчин халас болды.

7. Ысрайыллылар Мүсүрден тутуш халк болуп чыканда Ехова олара нәдип көмек этди?

⁷ Ене-де бир мысала середелиң. Ысрайыллылар Мүсүрден айра-айра топар болуп чыкман, хер ким өз ёлы билен гитмеди. Олар тутуш халк болуп чыкдылар. Муса «элиндәки хасасыны деңзе етиренде», Ехова Гызыл деңзи икә бөлди. Шонда Ехованың горагы астында Муса деңизден еке өзи я-да бирнәче ысрайыллылар билен дәл-де, тутуш халк билен гечди (Мүс. чык. 14:21, 22, 29, 30). Ысрайыллылар агзыбирди ве «мүсүрлилерден бир топар мәреке» олара гошулып чыкды (Мүс. чык. 12:38). Шонда яшлар айра топар болуп, өз ёлы билен гиден болса акылсызлык боларды. Өз ёлы билен гиден адамы Ехова горардымы? (1 Кор. 10:1).

8. Ехошапат патышаның гүнлеринде Худайың халкы агзыбирдигини нәдип гөркезди?

⁸ Ехошапат патышаның гүнлеринде Худайың халкына ёвуз ве гүйчли душман хүҗүм этди (2 Йыл. 20:1, 2). Шонда Худайың гуллукчылары өз гүйҗүне даянман, Ехова бил баглады (2 Йыл язгылары 20:3, 4-нҗи аятлары окаң) *. Олар кынчылыгы  айратынлыкда чөзҗек болман, хеммеси бир ере йыгнанышды. Мукаддес Язгыларда: «Әхли ехудылар өз яш чагаҗыклары, аяллары ве огуллары билен Реббиң хузурында дурдулар» дийилйәр (2 Йыл. 20:13). Тутуш халк улудан-кичә ченли Ехова бил баглап, онуң айдан сөзлерине эердилер. Ысрайыллылар агзыбир боландыгы үчин, Ехова олары душманларындан горады (2 Йыл. 20:20—27). Шу гүнлерем Худайың халкы кынчылыга учранда, оларың гөрелдесине эерип билер.

9. Биз I асырда яшан месихчилерден нәме өвренйәрис?

⁹ I асырда яшан месихчилер Ехова билеликде сежде эдйәрдилер. Меселем, ехудылар ве өзге миллетли адамлар месихчи болансоң, ресулларың несихатларына эерйәрдилер. Олар биле чөрек ийип, дога эдйәрдилер. (Рес. иш. 2:42). Хатда олар ызарлананда хем бир-бириниң көмегине мәтәчдигине дүшүнип, агзыбирдилер (Рес. иш. 4:23, 24). Бизем ызарламаларда агзыбирлиги саклап, бир-биримизи голдамалы.

10. Биз хачан хасам агзыбир болмалы?

¹⁰ Тизден адамзат тарыхында иң кын дөвүр башланар. Ёвел пыгамбер оңа «гараңкылык хем-де зулмат гүни» диййәр (Ёвел 2:1, 2; Сеф. 1:14). Шонда Худайың халкы хасам агзыбир болмалы. Иса: «Ичинде бөлүнишик болан ислендик патышалык... берк дурмаз» дийди (Мат. 12:25).

11. Зебур 122:3, 4-нҗи аятлардан Ехованың халкының агзыбирлиги барада нәме өвренйәрис? (Макаланың башындакы сурата середиң).

¹¹ Агыр мушакгат геленде биз агзыбир болмалы. Бизиң агзыбирлигимизи гадымы дөвүрде Иерусалимдәки җайларың гурлушына меңзетсе боляр. Җайлар бир-бирине шейле голайды велин, мезмурчы Иерусалиме «битеви бир шәхер» диййәрди. Бу болса, яшайҗылара бир-бирине көмек этмәге ве горамага мүмкинчилик берйәрди. Җайларың бир-бирине голай ерлешмеги «Реб тирелери» Ехова сежде этмек үчин йыгнаншанда, тутуш халкың рухы тайдан агзыбирдигини гөркезйәрди (Зебур 122:3, 4-нҗи аятлары окаң). Шу кын гүнлерде бизем агзыбир болмалы.

12. Худайың халкына хүҗүм эдиленде халас болмага нәме көмек эдер?

¹² Гелеҗекде агзыбир болмак нәме үчин ваҗып? Хезекиел китабының 38-нҗи бабында «Магок юрдундакы Мешегиң» Ехованың халкына хүҗүм этҗекдиги пыгамберлик эдилди. Шонда агзыбирлигимизи бозмага хич зада ёл бермели дәл ве Шейтаның дүнйәси бизи горар дийип пикир этмели дәл. Гайтам, биз доган-уялара якынлашмалы. Элбетде, биз диңе Худайың гурамасының агзасы болмак билен халас болуп билмерис. Ехова ве Иса Месих агыр мушакгатда Худайың адыны чагыран адамлары халас эдер (Ёвел 2:32; Мат. 28:20). Сизиң пикириңизче, Худайың сүрүсинден дашлашып, өз ёлы билен гиден адамлары Ехова халас эдерми? (Мика 2:12).

13. Худайың яш гуллукчылары ёкардакы мысалдан нәме өвренип билер?

¹³ Яшлар өзлерини доган-уялардан четде тутса, нәхили акылсызлык болҗакдыгына дүшүнйәрсиңизми? Тизден әхлимиз яшларам, улуларам бир-биримизиң көмегимизе мәтәч боларыс. Хава, биз хәзирден бир-биримиз билен хызматдашлык эдип, агзыбирлигимизи беркитсек, гелеҗекде халас боларыс.

14, 15. a) Ехова нәме үчин бизе агзыбир болмагы өвредйәр? б) Ехова агзыбирлиги сакламак үчин нәхили маслахат берйәр?

¹⁴ Ехова бизе агзыбир гуллук этмәге көмек эдйәр (Сеф. 3:8, 9). Ол бизи гелеҗекде «бар затлары Месихде бирлешдирмек» үчин тайярлаяр. (Эфеслилер 1:9, 10-нҗы аятлары окаң). Ехованың ниети — гөкдәки ве ердәки гуллукчыларыны бирлешдирип, бир машгала этмек. Яшлар хем шол машгаланың эбеди агзасы болуп билер. Ехованың гурамасында саңа агзыбир болмага нәме көмек эдер?

¹⁵ Ехова тәзе дүнйәде адамлар билен парахат яшап билмегимиз үчин хәзирден агзыбир болмагы өвредйәр. Ол бизе «бири-биримизиң аладамызы этмеги», «бири-биримизе гөвүнлик бермеги» ве «бири-биримизи абатламагы» сабырлы өвредйәр (1 Кор. 12:24; Рим. 12:10; 1 Сел. 4:18; 5:11). Ехова месихчилериң бикәмил боланы үчин агзыбирлиги сакламагы кын боляндыгыны билйәр. Шол себәпли биз «бири-биримизи багышламагы» өвренмели (Эфес. 4:32).

16, 17. a) Йыгнак душушыкларының максады нәме? б) Яшлар Исаның гөрелдесинден нәме өвренип билер?

¹⁶ Шейле-де Ехова йыгнак душушыклары аркалы бизе агзыбир болмагы өвредйәр. Биз көпленч йыгнак душушыгы барада Еврейлер 10:24, 25-нҗи аятлардан окаярыс. Онуң максады — «бирек-биреги сөйги, оңат ишлер үчин гайрата галдырмак». Эсасанам, биз йыгнак душушыклары аркалы «ол гүнүң голайлаянлыгыны нәче гөрсек, шонча-да бири-биримизи рухландырярыс».

¹⁷ Иса яш вагты Ехованың халкы билен йыгнанышып, говы гөрелде гөркезди. Ол 12 яшында эне-атасы билен ыбадатханада гечирилен улы душушыга баряр. Эне-атасы оны йитиренде, ол бейлеки яш огланларың арасындадымы? Ёк. Эне-атасы оны тапанда, ол ыбадатханада мугаллымлар билен Мукаддес Язгыларың эсасында гүррүң эдйәрди (Лука 2:45—47).

18. Дога агзыбирлигимизи нәдип беркидйәр?

¹⁸ Биз доган-уялар үчин дога эдип, агзыбирлигимизи беркидип билерис. Бизиң догаларымыз олар барада  алада этмелидигимизи ятладяр. Биз доган-уялары диңе бир йыгнак душушыкларында говы гөрүп, рухландырман, эйсем, олар үчин дога этмели. Яшлар, сиз йыгнагыңыздакы доган-уялара говы дост болмак үчин шу затлары эдйәрсиңизми? Биз Шейтаның дүнйәсиндәки адамлар билен дәл-де, доган-уялар билен достлашсак, залым дүнйәниң соңы геленде халас боларыс.

19—21. a) «Хеммәмиз бир бедениң агзаларыдыгымызы» нәдип гөркезип билерис? Мысал гетириң. б) Тебигы бетбагтчылыкда көмек эден доганлардан нәме өвренип билерис?

¹⁹ Ехованың халкы хәзирден Римлилер 12:5-де «бир тен ве бири-биримизиң агзаларыдырыс» диен принципе гөрә яшаяр. Биз бу сөзлериң догрудыгыны тебигы бетбагтчылыга учранымызда гөрйәрис. 2011-нҗи йылың декабрь айында болан элхенч харасат зерарлы Филиппиндәки Минданао адасыны сув аляр. Бир гиҗәниң ичинде 40 мүңден говрак, шол санда доган-уяларың хем өйлери вейран боляр. Филиалың хабар бермегине гөрә, башга ерлерден доган-уялар гелйәнчә, көмек эдйән ерли комитет ише гиришип башлады.

²⁰ Гүндогар Японияда хем гүйчли ертитреме себәпли болан цунамиде энчеме доган-уялар көп задындан кәбирлери болса, әхли задындан махрум болдулар. Патышалык залындан 40 километр аралыкда яшаян Ёшико уямыз өйсүз галды. Ол шейле диййәр: «Ертитреме болан гүнүниң эртеси айланян гөзегчиниң ве башга доганларың бизи гөрмәге гелендигине хайран галдык». Ёшико йылгырып, шейле гүррүң берйәр: «Биз йыгнак аркалы рухы тайдан аладамызың эдилйәндигини гөрдүк. Мундан башга-да бизе йылы эгин-эшик, аякгап, сумка ве гиҗе гейилйән эгинбаш берилди». Көмек эдйән ерли комитетиң агзасы шейле диййәр: «Япониядакы әхли доганлар билеликде имандашларына көмек этмәге җан этдилер. Хатда АБШ-дан хем доганлар көмек этмәге гелди. Доганлардан нәме үчин узак ерден гелендигини соранларында, олар: „Биз Япониядакы доганларымыз билен бир машгаладырыс ве олар бизиң көмегимизе мәтәч“» дийдилер. Сен хер бириниң аладасыны эдйән гураманың агзасыдыгыңа гуванярмың? Элбетде, Ехова шейле агзыбирлиги гөрүп, бегенйәр!

²¹ Биз хәзирден доган-уяларымыз билен агзыбир болсак, гелеҗекде болҗак кынчылыклара дөз гелерис. Бизиң бейлеки юртлардакы доган-уялар билен гатнашмага мүмкинчилигимиз болмаса-да, ерли доган-уялар билен агзыбир болмалы. Японияда болан гүйчли харасатда дири галан Фумико уямыз шейле диййәр: «Залым дүнйәниң соңы гаты голай. Биз имандашларымыза көмек эдип, бетбагтчылыкларың болмаҗак дөврүне сабырсызлык билен гарашярыс».

22. Агзыбир болмагымыз гелеҗекде нәдип көмек эдер?

²² Ехованың гүнүне тайяр болмак үчин яшларам, улуларам хәзирден агзыбир яшамагы өвренйәрлер. Шейтаның дүнйәси ёк эдиленде, Ехова гадымы дөвүрдәки ялы халкыны халас эдер (Иш. 52:9, 10). Сенем халас болмак үчин Худайың халкы билен агзыбир болмалы. Биз индики макалада алян берекетлеримизе нәме үчин миннетдар болмалыдыгымыза середерис.