БИРНӘЧЕ йыл мундан өң Сезар билен онуң аялы Росио Калифорния штатында говы яшаярды. Сезар йылыдыҗы, хованы чалшырыҗы ве совадыҗы кәрханасында узаклы гүн ишлейәрди. Росио болса, ярым гүн хусусы хассаханада ишлейәрди. Оларың өз җайы барды, чагалары ёкды. Эмма бир зат оларың дурмушына гаты тәсир этди. Нәме?

2009-нҗы йылың октябрь айында АБШ-ның филиалы юрдуң әхли йыгнакларына хат угратды. Нью-Йорк штатының Уолкилл шәхериндәки филиалы гиңелтмек үчин көмек этмәге хүнәрмен доган-уялар Бейтеле вагтлайын чагырылды. Оларың арасында Бейтелде гуллук эдерден яшы улы доган-уялар хем барды. Сезар билен Росио: «Биз бу яшымызда инди хич хачан Бейтелде гуллук эдип билмеҗекдигимизе дүшүнйәрдик. Шол себәпли мүмкинчилиги элден гидирмек ислемедик» диййәр. Шейлеликде, олар деррев арза язяр.

Сезар билен Росионың арза язанына бир йылдан говрак вагт гечсе-де, олар энтегем Бейтеле чагырылманды. Муңа гарамаздан, олар дурмушыны садалашдырып, рухы максатларына етмек үчин әдим әтдилер. Сезар шейле гүррүң берйәр: «Биз өйүмизи кирейине берер ялы, яшамак үчин гаражымызы оңардык. Шейдип, биз арзув эдип етен 200 кв м улы җайымыздан 25 кв м җая гөчдүк. Бизиң шол улы җайы гуранымыза бары-ёгы ики йыл болупды. Бу бизи Бейтелде гуллук этмек чакылыгыны кабул этмәге өңүнден тайярлады». Соңра нәме болды? Росио шейле диййәр: «Кичиҗик җайымыза гөченимизе бир ай болансоң, бизи Уолкилле вагтлайын гуллук этмәге чагырдылар. Биз дурмушымызы садалашдырансоң, Ехованың берекет берендигине гөз етирдик».

Сезар билен Росио ялы йүзлерче доган-уялар Нью-Йорк штатындакы гурлушык ишине  гатнашмак үчин көп затдан гечдилер. Оларың бирнәчеси Уолкиллде филиалы гиңелдиш ишине, кәбирлери болса Уорвикде бүтиндүнйә баш эдарамызың гурлушыгына гатнашяр *. Көп әр-аяллар Ехова көпрәк гуллук этмек үчин говы өйлерини, кәрлерини, хатда өй хайванларыны хем гоюп гайтдылар. Ехова оларың җанаямазлыгыны сылагладымы? Элбетде, сылаглады!

Мысал үчин, 60 яшларындакы электрик доган Уэй ве онуң аялы Дебра Канзас штатындакы өйүни ве затларыны сатып, Уолкилле гөчди. Олар филиала гатнап ишлейәрлер *. Мунуң үчин олар кәбир затлардан гечмели болса-да, эдйән ишиниң шоңа дегйәндигине дүшүнйәрлер. Дебра Бейтелде эдйән иши барада шейле диййәр: «Кәте мен өзүми эдебиятларымыздакы суратларда чекилен Җеннетдәки гурлушыга гатнашян ялы дуйярын!»

Мелвин билен Шерон Уорвикдәки гурлушык ишине көмек этмек үчин, Гүнорта Каролина штатындакы җайыны ве затларыны сатдылар. Бу затлардан гечмек аңсат болмаса-да, олар шейле тарыхы таслама гатнашяндыгыны улы хормат сайярлар. Бу әр-аял: «Биз бүтиндүнйә гурамасына пейдалы болҗак ише гатнашяндыгымыза өрән бегенйәрис» диййәр.

55 яшларындакы пенсия чыкан гурлушыкчы Кеннет ве онуң аялы Морин Калифорния штатындан Уорвикдәки гурлушык ишине гатнашмак үчин гелдилер. Бу ере гелмек үчин, олар йыгнагындакы бир уядан өйүне серетмеги ве доган-гарындашларындан Кениң гарташан какасының аладасыны этмеги хайыш этдилер. Инди олар өкүнйәрми? Ёк, өкүнмейәр! Кен шейле диййәр: «Биз бол берекетлери алдык. Элбетде, бизиң кынчылыкларымыз болса-да, биз дурмушдан канагат тапып яшаярыс ве гуллугың бу гөрнүшине гатнашмагы хеммелере ак йүрекден маслахат берйәрис».

Гурлушык ишине гатнашянларың көпүси кәбир кынчылыклара дөз гелдилер. Меселем, Пенсильвания штатында яшаян 60 яшларындакы Вильям билен Сандраның машын шайларыны өндүрйән кәрханасы барды. Кәрханада 17 адам ишлейәрди. Олар чагалыгындан бәри гуллук эдйән йыгнагына гатнаярды ве доган-гарындашларының көпүси шол ерде яшаярды. Шол себәпли Уолкилде гуллук этмәге мүмкинчилик дөрәнде, олар хеммелер билен хошлашып, өвренишен затларыны ташлап гитмели болҗакдыгына дүшүнйәрди. Вильям: «Говы дурмушымызы  гоюп гитмек бизе гаты агыр дүшди» диййәр. Эмма әр-аял көп дога эдип, гөчмеги йүрегине дүвдүлер ве олар муңа өкүнмейәрлер. Вильям шейле диййәр: «Бейтел машгаласы билен гуллук этмекден алян шатлыгымызы хич бир зат билен деңәп болмаяр. Сандра икимиз хич хачан шейле багтлы болмандык!»

Рики доган Гавайи штатында гурлушык ишлеринде ёлбашчы болуп ишлейәрди. Оны Уорвикдәки гурлушыга гатнап ишлейән бейтелчи хөкмүнде чагырдылар. Аялы Кендра онуң бу чакылыгы кабул этмегини иследи. Эмма олар 11 яшлы оглы Якуп барада биынҗалык болярды. Олар: «Машгаламыз билен Нью-Йорк штатына гөчмек пайхаслы болармы ве оглумыз тәзе ере өвренишерми?» дийип алада эдйәрдилер.

Рики: «Якубың говы достлары болар ялы, йыгнакда рухы тайдан өсен яшларың болмагыны ислейәрдик» диййәр. Оларың баран тәзе йыгнагында чага азды, йөне бирнәче бейтелчи барды. Рики шейле диййәр: «Илкинҗи душушыкдан соң, мен Якуба: „Тәзе йыгнак гөвнүңе ярадымы, бу ерде сениң дең-душларыңам-а ёк“ дийдим. Шонда ол маңа: „Алада этме, кака. Инди, мениң достларым яш бейтелчилер болар“ дийди».

Элбетде, яш бейтелчилер Якуп билен достлашдылар. Бу оңа нәхили тәсир этди? Рики шейле гүррүң берйәр: «Бир гүн агшам мен онуң отагының янындан гечип баряркам, чырасы янып дурды. Шонда ол электрон ойнуны ойнап отурандыр, менем үстүнден барарын дийип пикир этдим велин, гөрсем, ол Мукаддес Язгылары окап отуран экен! Мен Якупдан нәме эдйәнини соранымда, ол: „Мен яш бейтелчи, шонуң үчин бир йылың ичинде Мукаддес Язгылары окап чыкмалы“ дийди». Элбетде, Рики билен Кендра өрән багтлы. Олар диңе бир Рикиниң Уорвикдәки гурлушыга гатнашяндыгына дәл-де, эйсем, бу ере гөчмек билен оглуның рухы тайдан өсмегине говы көмек эдендиклерине бегенйәрлер (Сүл. тым. 22:6).

Уолкиллдәки ве Уорвикдәки гурлушык иши иң соңы тамамланар. Бейтелде көмек эдйән доган-уялар хем вагтлайын чагырыландыгына дүшүнйәрлер. Олар нирә гитҗекдиги ве нәмелер этҗекдиги барада ченденаша аладаланярмы? Ёк! Оларың көпүси Флорида штатындан гелен 50 яшларындакы әр-аялың айдан сөзлери билен ылалашярлар. Гурлушыга ёлбашчылык эдйән Җон доган ве онуң аялы Кармен Уорвикде вагтлайын гуллук эдйәрлер. Олар шейле  диййәр: «Бу ерде Ехова зерурлыкларымыз хакда алада эдйәр. Ехованың бизи бу ере вагтлайын гетирип, соңра терк этмеҗекдигини билйәрис» (Зеб. 119:116). Янгын сөндүриҗи системасыны дүзйән Луис доган ве онуң аялы Кения Уолкиллде гуллук эдйәрлер. Олар шейле диййәр: «Биз Ехованың эли ачыкдыгыны хәзирден гөрйәрис, ол бизиң мадды зерурлыкларымызың аладасыны эдйәр. Биз ниреде болсак-да, онуң нәдип алада этҗекдигини билмесек-де, терк этмеҗекдигине ынанярыс» (Зеб. 34:10; 37:25).

Нью-Йоркдакы гурлушык ишине көмек эденлериң көпүси мейлетин гуллукчы болмаз ялы бахана тапып билерди. Эмма Ехованың теклип эдиши ялы, олар оны сынап гөрдүлер. Ехова шейле диййәр: «Мени... сынап гөрүң... Мен гөгүң пенҗирелерини сизиң үчин ачып, үстүңизе долуп-дашян берекет ягдырмарынмы?» (Мал. 3:10).

Сизем Ехованы сынап гөрсеңиз, онуң бол берекетлерини аларсыңыз. Сиз Нью-Йоркда я-да яшаян ериңизде гураманың башга гурлушыгына гатнашмак үчин дога этсеңиз, Ехованың сылаглаяндыгыны гөрерсиңиз (Мар. 10:29, 30).

Алабама штатындан гелен гурлушык инженери Дейл ве онуң аялы Кети гуллугың бу гөрнүшине гатнашмагы хеммелере маслахат берйәр. Уолкиллде мейлетин гуллук этмек барада олар шейле диййәр: «Эгер сиз говы яшайшыңызы гоюп гитмеги башарсаңыз, онда Ехованың мукаддес рухуның тәсир эдишини гөрүп билерсиңиз». Мунуң үчин нәме этмели? Дейл: «Яшайшыңызы садалашдырың, садалашдырың ене-де садалашдырың. Сиз хич хачан өкүнмерсиңиз!» диййәр. Демиргазык Каролина штатындан гелен ве 30 йыллап гурлушык ишине ёлбашчылык эден Гери доган билен аялы Морин Бейтелде энчеме йылдан бәри гуллук эдйән доган-уялар билен якындан таншып, ишлешйәндигине бегенйәрлер. Бу оларың Уорвикде алян берекетлериниң бири. Гери шейле диййәр: «Бейтелде гуллук этмек үчин сада яшамалы ве бу соңкы гүнлерде иң говы дурмуш ёлы». Иллинойс штатындан гелен ве электрик ишлерине гөзегчилик эден Җейсон доган билен аялы Җенифер Уолкиллдәки Бейтелиң гурлушык ишине гатнашып, өзлерини эдил тәзе дүнйәде яшаян ялы дуйяндыгыны айдярлар. Җенифер шейле диййәр: «Эдйән ишимизе Ехованың миннетдардыгыны ве онуң бизиң үчин тайярлаян гелеҗегине гошант гошяндыгыңы билмек нәхили говы. Ехова бизиң рухы тайдан хазына йыгнаяндыгымызы гөрйәр».