2013-НҖИ ЙЫЛЫҢ 28-нҗи апрелинде Японияның Нагоя шәхеринде йөрите душушык гечирйәр. Шонда Ёлбашчылык маслахатының агзасы Энтони Моррис «Маттаның хош хабарыны» айратын китап эдип чап эдилендигини шатлык билен хабар берйәр. Оны диңлейән 210 мүң адам шовхунлы эл чарпдылар.

Япон дилиндәки «Мукаддес Язгыларың Тәзе дүнйә терҗимесинден» алнан 128 сахыпалы «Маттаның хош хабары» өрән үйтгешик китапды. Энтони Моррис китабың «йөрите япон халкына ниетленендигини» айдяр. Китабың нәхили айратынлыгы бар? Нәме ниет билен чап эдилди? Адамлар оңа нәхили сесленйәрлер?

Япон дилиндәки сөзлер диклигине я-да кеселигине языляр. Кәбир макалалар, шол санда бизиң соңкы чыкан эдебиятларымыз хем кеселигине язылан гөрнүшде чап эдилйәр. «Матта» китабы болса газетлер ве чепер эсерлер ялы диклигине язылан. Шол себәпли окыҗылара китабы окамак аңсат боляр. Мукаддес Язгыларың хер сахыпасының башында язылан эсасы пикирлер «Матта» китабында сөзбашы хөкмүнде гетирилйәр. Бу болса эсасы пикирлери аңсатлык билен тапмага көмек эдйәр.

Доган-уялар «Маттаның хош хабарының» чыкандыгына өрән бегенйәрлер. Меселем, 80 яшлы уя: «Мен Матта китабыны бирнәче гезек окадым, эмма онуң диклигине язылан ве сөзбашылы гөрнүши маңа Исаның дагдакы вагзына долы дүшүнмәге көмек этди» диййәр. Бир яш уя болса: «Мен бу китабы бир демимде окап чыкдым. Мен өң кеселигине язылан китаплары окаярдым, йөне диклигине язылан гөрнүши окамагы хас говы гөрйәрин» диййәр.

«Маттаның хош хабары» китабыны нәме үчин япон халкына ниетленен дийсе болар? Олар Мукаддес Язгылар барада көп затлары билмейәрлер, йөне оны хөвес билен окамак ислейәрлер. «Маттаның хош хабары» китабы болса, олара Худайың сөзүни окамага мүмкинчилик дөредйәр.

«Маттаның хош хабары» нәме үчин айратын китап хөкмүнде чап эдилйәр? Себәби Японияның яшайҗылары Мукаддес Язгыларда диңе Иса Месих барада языландыр өйдйәрлер. Олары гызыкландырян темалар болса «Матта» китабында җемленен. Онда Исаның несил шеҗереси, дүнйә иниши, Дагдакы вагзы ве соңкы гүнлер барада айдан пыгамберликлери гүррүң берилйәр.

 Япониядакы доган-уялар өйден-өе вагыз эденлеринде ве икиленч идегде тәзе китабы хөвес билен хөдүрлейәрлер. Бир уя шейле язяр: «Биз инди Мукаддес Язгылары көп адамлара берип билйәрис. Хатда мен йөрите душушык гечирилен гүни «Маттаның хош хабары» китабыны хөдүрледим».

Вагызчылар «Маттаның хош хабары» китабыны адамлара нәдип хөдүр эдйәрлер? Япониялыларың көпүсине: «Дар гапыдан гириң... дүрдәнелериңизи доңузларың өңүне ташламаң... эртири гайгы этмәң» диен җүмлелер танышды (Мат. 6:34; 7:6, 13). Олар Исаның бу сөзлерини «Маттаның хош хабары» китабындан оканларында хайран галярлар. Хатда оларың кәбири: «Мукаддес Язгылары иң болманда бир сапар окасадым» диййәрлер.

Вагызчылар «Маттаның хош хабары» китабыны алан адамлары икиленч идег эденлеринде, оларың кәбири китабы деррев окандыгыны айдярлар. 60 яшлы адам вагызча йүзленип: «Мен бу китабы бирнәче сапар окадым ве йүрегим гиңеди. Мениң билен Мукаддес Язгылар окувыны гечип билмермисиңиз?» диййәр.

Вагызчылар көпчүлик ерлеринде хем «Маттаның хош хабары» китабыны яйрадярлар. Меселем, бир яш гелин китабы аляр ве электрон почтасының белгисини берйәр. Бир сагат гечер-гечмез ол уя җаң эдип, китабы окандыгыны ве көпрәк билеси гелйәндигини айдяр. Бу яш гелин бир хепдеден соңра Мукаддес Язгылар окувыны гечйәр ве йыгнак душушыкларына гатнашып башлаяр.

«Маттаның хош хабары» китабының 1 миллион 600 мүңден говрагы йыгнаклара говшурылды. Вагызчылар хер айда китабың 10 мүңлерчесини яйрадярлар. Онуң гириш сөзлеринде: «Гой, бу китап сизи Мукаддес Язгылары окамага хөвеслендирсин!» дийилйәр.