Бу сөзлер сизе таныш болса герек! Павлус ресулың «Ребде» дурмуш гурмак барада берен маслахаты әхли месихчилере дегишли (1 Кор. 7:39). Онда кәбир месихчилер нәме үчин «Ребде» дурмуш гурмак мүмкин дәл диййәрлер?

Кәбир йыгнакда дурмуша чыкмадык уяларың өйленмедик доганлардан көпдүгини гөрсе боляр. Меселем, Кореяда ортача 100 саны дурмуш гурмадык месихчилериң 57-си уялар, 43-и доганлар. Колумбиядакы йыгнагың 66 гөтерими уялар, 34 гөтерими доганлар.

Ехова иман этмейән ата-энелериң кәбири гызы үчин көп галың салярлар. Шейле ягдай доганларың өйленмегине бөвет боляр. Шол себәпли уялар: «Доганларың арасындан янёлдаш тапып болармы?» дийип икирҗиңленйәрлер *.

«Ребде» дурмуш гурмак аңсат дәл дийип пикир эдйән месихчилериң ягдайына ве дуйгусына Ехова говы дүшүнйәр (2 Йыл. 6:29, 30).

Мукаддес Язгыларда диңе «Ребде» дурмуш гурмалы дийип маслахат берилйәр. Нәме үчин? Ехова пейдалы затлары өвредйәр. Ол халкының эҗир чекмегини дәл-де, багтлы болмагыны ислейәр. Меселем, Нехемяның гүнлеринде ехудылар Ехова иман  этмейәнлер билен дурмуш гурярлар. Нехемя олара Сүлейман патышаның эден ялңышлыгыны ятладяр. Сүлейман патыша «Худайың халаны» болса-да, «кесеки миллетден болан аяллар оңа гүнә этдирдилер» (Нех. 13:23—26). Гөршүмиз ялы, Аллатагаланың дурмуш гурмак бабатда берен маслахаты бизе гораг боляр (Зеб. 19:7—10; Иш. 48:17, 18). Месихчилер Худайың берйән гөркезмесине эерип, миннетдар болмалы. Шейдип, олар Ехованың ёлбашчылыгына ве хөкүмдарлыгына табын боляндыгыны гөркезйәрлер (Сүл. тым. 1:5).

Элбетде, сиз Ехованы сөймейән адамлар билен «бир боюнтырыга» гирип, Ондан дашлашмак ислемейәрсиңиз (2 Кор. 6:14). Шу гүнлер көп месихчилер Худайың маслахатына эерип, пайхаслы карара гелйәрлер. Эмма кәбирлери башга ёлы сайлаярлар.

Австралияда яшаян Мегги * атлы уя бир йигит билен душушып башлаяр. Ол: «Мен йыгнак душушыкларындан галып, көп вагтымы онуң билен гечирйәрдим. Нетиҗеде, мениң рухы саглыгыма зыян етди» диййәр. Хиндистанлы Ратана уяның сынпдашы Мукаддес Язгылар окувыны гечип башлаяр. Уя ол йигиди говы гөрйәр. Йигит болса Ратана өйленмек үчин окаян экен. Ратана оңа дурмуша чыкмак үчин хакыкатдан дәнип, онуң динине гечйәр.

Камерунда яшаян Ниденка билен болан вака середелиң. Ол 19 яшында Ехова иман этмейән йигиде дурмуша чыкяр. Йигит оңа динине гаршы чыкмаҗакдыгыны сөз берйәр. Эмма ол тойдан ики хепде геченден соңра, Ниденканы йыгнак душушыкларына ибермейәр. Ол: «Мен өзүми еке дуюп, көп аглаярын. Бүтин эрк-ыгтыярымы элден гидирендигиме инди дүшүнйәрин ве пушман эдйәрин» диййәр.

Элбетде, Ехова иман этмейән янёлдашыңыз адалатлы ве ягшы хәсиетли болуп билер. Эмма «Ребде» дурмуш гурмалы диен кануны бозсаңыз, Ехова билен достлугыңыза нәхили тәсир эдер? Алланың берен маслахатына вагтында гулак асмасаңыз, өзүңизи нәхили дуярсыңыз? Сизиң гелен карарыңыза Ехова нәхили гарар? (Сүл. тым. 1:33).

Бүтин дүнйәдәки доган-уяларың көпүси «Ребде» дурмуш гурмагың пайхаслыдыгына гөз етирйәрлер. Олар берлен маслахата эермеги берк йүрегине дүвйәрлер. Японияда яшаян Мечеко уяны доган-гарындашлары дурмуша чыкармак ислейәрлер. Шейле-де Мечеко доган-уяларың «Ребде» дурмуш гуряндыгыны гөрйәр. Ол шейле диййәр: «Мен өзүме „мүбәрек Худай“ Ехова гуллук эдйәндигими ве багтлы болмак үчин дурмуша чыкмагың хөкман дәлдигини ятладярдым. Мен Ехованың арзувлары хасыл эдйәндигине ынанярын. Шонуң үчин өзүмизе тай болҗак янёлдаш тапянчак сабырлы гарашмалы» (1 Тим. 1:11). Мечеко догана дурмуша чыкяр ве Ехованың берен маслахатына эерендигине бегенйәр.

Доганлар хем өзүне тай болҗак уя өйленмек ислейәрлер. Австралияда яшаян Бил доган Ехова иман этмейән гызларың кәбирини говы гөрендигини айдяр. Эмма Бил олар билен достлашмаярды. Нәме үчин? Себәби ол «имансызлар билен бир боюнтырыга» гирмек үчин екеҗе әдим хем әтмек ислемейәрди. Бирнәче йыл геченден соңра Бил уяларың кәбирине сөз айдяр. Эмма уялар оңа разы болмадылар. Доган өзүне тай болҗак уя душянча 30 йыл гарашяр. Бил шейле гүррүң берйәр: «Мен гарашаныма өкүнмейәрин. Себәби көп берекетлери  алдым. Мен аялым билен вагыз эдйәрин, Мукаддес Язгылары окаярын ве Ехова сежде эдйәрин. Мен аялымың достлары билен гатнашярын, себәби олар мениң хем имандашларым. Биз Мукаддес Язгыларың принциплерине эерип, багтлы машгала болмага җан эдйәрис».

Сизе «Ребде» дурмуш гурмакда сабырлы болмага нәме көмек эдер? Илки билен, дурмуш гурмага нәме пәсгел берйәрдигине гөз етириң. Эгер сиз «Ребде» дурмуш гурмалы диен маслахата эермәге җан эдйән болсаңыз, Ехованы бегендирерсиңиз (1 Шам. 15:22; Сүл. тым. 27:11). Шейле-де Аллатагала «йүрегиңизи... дөкүп», ызыгидерли дога эдиң (Зеб. 62:8). Сиз дуйгуларыңыза эрк эдип, башгаларың тәсирине гаршы гөрешсеңиз, Худай билен достлугыңыз гүн-гүнден беркәр. Аллатагала сизиң ислеглериңизе ве зерурлыкларыңыза дүшүнүп, аладаңызы эдйәр. Мукаддес Язгыларда Худайың адама тай тапып берҗекдиги барада айдылмаяр. Эмма Ехова дурмуш гурмак ислейән хер бир адамың багтлы болмагының аладасыны эдйәр (Зеб. 145:16; Мат. 6:32).

Кәвагт сиз хем Давут пыгамбер ялы: «Я Реб, маңа тиз җогап бер, рухум тапдан дүшүп баряр; йүзүңи менден гизлеме» диййәнсиңиз (Зеб. 143:5—7, 10). Шейле пурсатларда рухдан дүшмәң ве гөкдәки Атаңызың пайхаслы гөркезмесине сабырлы гарашың. Мукаддес Язгылары оканыңызда, Худайың өз гуллукчыларыны нәдип голдандыгы барада ойланың. Шонда сизиң Ехова бил багламагың догрудыгына ынамыңыз артар.

Сиз багтлы болмак үчин ене нәхили максатлар гоюп билерсиңиз? Ехова ве доган-уялар билен достлугыңызы беркидиң. Мунуң үчин мәхирлилиги, җомартлыгы ве Худая вепалылыгы өсдүриң. Шейле хәсиетлер сизе багтлы машгала гурмага көмек эдер (Гел. чык. 24:16—21; Рут 1:16, 17; 2:6, 7, 11; Сүл. тым. 31:10—27). Патышалык ишлерини биринҗи орунда гоймак эрбет затлардан гораг болар. Бил доган: «Мениң саллахлык дөврүм гөз ачып-юмасы салымда гечди! Шол йыллар мен пионер болуп гуллук эдйәрдим» дийип ятлаяр.

Шу гүнлер хем «Ребде» дурмуш гуруп боляр. Бу маслахата эерйән месихчилер Ехованы шөхратландырярлар ве багтлы болярлар. Мукаддес Язгыларда: «Ребден горкян, Онуң табшырыкларындан көп леззет алян нәхили багтлы! Болелинлик, байлык онуң өйүнде болар; догрулыгы эбедилик довам эдер» дийилйәр (Зеб. 112:1, 3). Гелиң, диңе «Ребде» дурмуш гурмагы йүрегимизе дүвелиң.