1—3. Павлус ресула Ехова болан ынамыны беркитмәге нәме көмек этди? (Макаланың башындакы сурата середиң).

I АСЫРДА Римде яшаян месихчилере ховп абанярды. Б. э. 64-нҗи йылында месихчилери адамсөймез хасаплаярдылар ве олары шәхери отламакда айыплап, гүйчли ызарлаярдылар. Доган-уяларың кәбирини туссаг эдйәрдилер, вагшы хайванларың өңүне оклаярдылар, пүрсе чүйлейәрдилер ве гиҗесине ышык болар ялы, олары дирилигине якярдылар. Эгер сиз хем шол дөвүрде яшан болсаңыз, бу затлара дучар болардыңыз.

² Шол кын дөвүрде Павлус ресул Римде икинҗи гезек туссаг эдилди. Месихчилер оны голдармы? Павлус бираз биынҗалыкланып, Тимотеоса шейле язды: «Илкинҗи горанмамда тарапымы тутан болмады, гайтам, хеммелер мени ташлап гитдилер. Мунуң хасабы олардан соралмасын». Эмма Павлус өзүниң горагсыз галмаҗакдыгыны билйәрди. Себәби өң Иса Месих оңа герекли голдавы берипди. Павлус: «Реб янымда дуруп, мени гүйчлендирди; шейлеликде, арсланың агзындан гутулдым» дийди (2 Тим. 4:16, 17) *.

 ³ Шол себәпли Павлус Ехованың бу гезегем, гелеҗекде-де голдаҗакдыгына ынанып: «Реб хем мени әхли яманлыкдан гутарар» дийди (2 Тим. 4:18). Адамлар оңа герекли көмеги берип билмесе-де, ол Ехованың ве Исаның хемише голдаҗакдыгына дүшүнйәрди.

4, 5. a) Ким бизе хемише герекли көмеги берип билйәр? б) Биз нәдип Ехова хас-да якынлашып билерис?

⁴ Сиз кын ягдая дүшениңизде кәте өзүңизи терк эдилен ялы дуйярсыңызмы? Белки-де, ишсизлик, дең-душларыңызың тәсирине гаршы дурмак, кеселчилик ве шуңа меңзеш кынчылыклар себәпли гөвнүчөкгүнлиге дүшйәнсиңиз. Башгалардан көмек сорасаңыз-да, оларың сизе герекли голдавы берип билмәндиги үчин лапыкеч болянсыңыз. Аслында, ынсана кәбир кынчылыклары чөзмек башартмаяр. Шол себәпли Мукаддес Язгылар бизе Ехова Худая бил багламагы маслахат берйәр (Сүл. тым. 3:5, 6). Биз Худайың көмек этҗекдигине ынанып билерисми? Элбетде! Мукаддес Язгыларда Ехованың өз халкыны хемише голдандыгыны гөркезйән энчеме вакалар бар.

⁵ Эгер адамлар бизе көмек эдип билмеселер, олара нәгиле болмагың дерегине, бу ягдая Павлус ресул ялы Ехова бил багламага мүмкинчилик хөкмүнде гарамалы. Шонда биз Худайың аладамызы эдйәндигине гөз етирип, иманымызы беркидерис ве Оңа хас-да якынлашарыс.

6. Кын ягдайларда Ехова бил багламак нәме үчин аңсат болмаяр?

⁶ Биз кынчылыга учранымызда, оны чөзмек үчин элимизде барыны эдйәрис ве Ехова дога эдип, көмек сораярыс. Биз Худайың голдаҗакдыгына бил баглап, кынчылыгымыз барада биынҗалыкланман билерисми? Хава, биз онуң хөкман көмек этҗекдигине ынанып билерис (Зебур 62:8; 1 Петрус 5:7-нҗи аятлары окаң). Худай билен достлашмак үчин, оңа бил багламагы өвренмели. Эмма муны этмек аңсат болмаяр. Нәме үчин? Себәби Ехова кәте бизиң догаларымыза деррев җогап бермейәр (Зеб. 13:1, 2; 74:10; 89:46; 90:13; Хаб. 1:2).

7. Ехова кәвагт догаларымыза нәме үчин деррев җогап бермейәр?

⁷ Ехова хер бир хайышымыза нәме үчин дессине җогап бермейәр? Мукаддес Язгыларда Ехова сөйгүден долы Ата билен деңешдирилйәр (Зеб. 103:13). Какасы чагасының хер бир соран задыны бермейәр я-да хайышыны деррев битирмейәр. Кәте чага бир зады кесирлик билен сораса-да, онуң ислеги үйтгәп билер. Эгер какасы чагасының хер бир ислегини деррев ерине етирсе, ол өз чагасының гулы ялы болар. Какасы чагасына нәмәниң герекдигини, оны хачан бермелидигини ве мунуң башгалара нәхили тәсир этҗекдигини говы билйәр. Шонуң ялы-да, сөйгүден долы гөкдәки Атамыз, пайхаслы Ярадыҗымыз Ехова бизе нәмәниң герекдигини ве догаларымыза хачан җогап бермелидигини говы билйәр. Шол себәпли Аллатагала бизиң догаларымыза җогап берйәнчә, сабырлы гарашмалы (Ишая 29:16; 45:9-нҗы аятлары деңешдириң).

8. Ехова бизе нәмәни вада берйәр?

⁸ Ехова бизиң мүмкинчилигимизиң чәклидигини говы билйәр (Зеб. 103:14). Ол бизиң әхли зада өз гүйҗүмиз билен дөз гелип билмеҗекдигимизе дүшүнип, герекли көмеги берйәр. Кәте биз кынчылыгы еңип билмерин дийип тапдан дүшйәрис. Эмма Ехова гуллукчыларының гүйҗүнден артык сыналмагына ёл бермеҗекдигине ве «чыкалга ачҗакдыгына» ынандыряр (1 Коринтослылар 10:13-и окаң). Худайың ягдайымыза дүшүнйәндигини билмек бизе теселли берйәр.

9. Биз догаларымыза деррев җогап алмасак нәме этмели?

⁹ Еховадан көмек сорап, дога эденимизде деррев җогап алмасак, сабыр-такат этмели. Себәби Худай йүрекден көмек этмек ислесе-де, онуң өзи хем аматлы вагта сабырлы гарашяр. Мукаддес Язгыларда: «Реб сизе мерхемет этҗек болуп гарашяр, ёкарда сизе рехим этмәге хәзир, чүнки Реб адалат Худайыдыр; Оңа интизарлар нәхили багтлы!» дийилйәр (Иш. 30:18).

10—12. a) Агыр кеселлән машгала агзасының аладасыны эдйән месихчилере нәме үчин кын боляр? б) Кынчылыкларда Ехова бил багламаклык онуң билен достлугымыза нәхили тәсир эдйәр? Мысал гетириң.

¹⁰ Кәте биз агыр кынчылыга учрап, өзүмизи Павлус ресул кимин «арсланың агзында» ялы дуйяндырыс. Шейле ягдайларда Ехова бил багламак кын болса-да, бу өрән ваҗып. Айдалы, доган-гарындашларыңыздан бири агыр кеселлейәр ве сиз онуң аладасыны этмели болярсыңыз. Сиз муңа дөз гелмек үчин элиңизде барыны эдип, Худайдан акылдарлык ве гүйч дилейәрсиңиз *. Аллатагаланың сизи гөрйәндигини ве ягдайыңыза дүшүнйәндиги барада ойлансаңыз, калбыңыз рахат болар. Ехова сизе вепалы галмага ве чыдамлы болмага көмек эдер (Зеб. 32:8).

¹¹ Сиз Ехованың берйән көмегини кәте гөрйән дәлсиңиз. Меселем, лукманлар бир карара гелип, сизе пейдалы болҗак маслахаты берип билмерлер. Доган-гарындашларыңыз хем сизи голдамагың дерегине, яраңыза дуз сепйәндир. Шейле ягдайда Еховадан гүйч сорап, дога этсеңиз ве оңа якынлашсаңыз говы болар (1 Шамувел 30:3, 6-нҗы аятлары окаң) *. Сиз Худайың көмек эдйәндигини гөрениңизде, онуң билен достлугыңыз хас-да беркәр.

¹² Линда * хем бирнәче йыллап кеселлән ата-энесиниң аладасыны эдип, муңа гөз етирди. Ол шейле гүррүң берйәр: «Мен, янёлдашым ве доганым алҗырап, нәме этҗекгимизи билмейәрдик. Биз хич ким голдамаян ялыды. Эмма ызымыза сер саланымызда, Ехованың бизиң билендигине дүшүндик. Ол бизи беркидип, чыкалгасыз гөрүнйән ягдайларда-да көмек берйәрди».

13. Уя Ехова бил баглап, агыр кынчылыклара нәдип дөз гелди?

¹³ Биз бетбагтчылыга учранымызда-да, Ехова долы бил багламалы. Меселем, Ронда уяның иман этмейән янёлдашы айрылышяр, оглан җигиси болса өлүм ховплы дери инчекесели билен кеселлейәр. Бирнәче ай геченден соңра гелнеҗеси арадан чыкяр. Ронда бу элхенч вакалардан соң, бираз өзүни дүрсәп, умумы пионер гуллугына башлаяр. Эмма тизден онуң эҗеси арадан чыкяр. Бу ягдайлара дөз гелмәге Ронда нәме көмек этди? Ол шейле гүррүң берйәр: «Мен хер гүн, хатда уҗыпсыз карарлара геленимде-де, Ехова дога эдйәрдим. Бу маңа Худая хас-да якынлашмага көмек этди. Шейле-де мен өзүме я-да башга адамлара дәл-де, Ехова бил багламагы өврендим. Аллатагала мени голдап, әхли зерурлыкларымың канагатландырды. Мен Ехованың мәхир билен голдаяндыгыны дуйярдым».

14. Доган-гарындашларындан бири йыгнак билен гатнашыкдан кесилен месихчә Ехова нәдип көмек эдйәр?

¹⁴ Гелиң, башга бир мысала середелиң. Айдалы, доган-гарындашларыңыздан бири йыгнак билен гатнашыкдан кесилйәр. Мукаддес Язгыларда йыгнак билен гатнашыкдан кесилен адам билен өзүмизи нәхили алып бармалыдыгымыз барада гөркезме берилйәр (1 Кор. 5:11; 2 Яхя 10). Эмма бу табшырыга гулак асмак кәте кын я-да асла мүмкин дәл ялы гөрүнйәр *. Сиз Ехова вепалы болмак үчин, онуң гүйч берҗекдигине ынанярмысыңыз? Шейле ягдая Худая якынлашмага мүмкинчилик хөкмүнде гарармысыңыз?

15. Адам ата Ехованың берен табшырыгына нәме үчин гулак асмады?

¹⁵ Илкинҗи ынсан Адам ата барада ойланып гөрелиң. Ол Ехова гулак асмасам-да, эбеди яшарын дийип ойландымыка? Ёк. Мукаддес Язгыларда: «Алданан Адам дәлди» дийилйәр (1 Тим. 2:14). Онда Адам ата нәме үчин Худая гулак асмады? Ол Хов энәни сөййәндиги үчин миведен ийди. Адам ата Ехованың табшырыгына гулак асман, аялыны диңледи (Гел. чык. 3:6, 17).

16. Биз кими хас көп сөймели ве нәме үчин?

¹⁶ Онда биз доган-гарындашларымызы йүрекден сөймели дәлми? Элбетде, сөймели! Йөне бизиң Ехова болан сөйгимиз хас гүйчли болмалы (Матта 22:37, 38-нҗи аятлары окаң). Шонда доган-гарындашымыз Худая гуллук этсе-де, этмесе-де олара говы тәсир эдип билерис. Шол себәпли Ехова болан сөйгимизи артдырып, иманымызы берктмели. Эгер сиз доган-гарындашларыңызың йыгнак билен гатнашыкдан кесилендиги үчин рухдан дүшйән болсаңыз, Ехова догада йүрегиңизи дөкүң * (Рим. 12:12; Флп. 4:6, 7). Бу кын ягдая Ехова билен достлугыңызы беркитмәге мүмкинчилик хөкмүнде гараң. Шонда сиз Худая хемише бил багламагы өвренерсиңиз ве оңа гулак асмагың берекет берйәндигине гөз етирерсиңиз.

17. Биз вагыз ишине ыхласлы гатнашып, Ехова бил баглаяндыгымызы нәдип гөркезйәрис?

¹⁷ Ехова Павлус ресулы нәме үчин «арсланың агзындан» халас этди? Ол: «Худайың вагзы мен аркалы долы ыглан болуп, бүтин миллетлер оны эшитмели» дийди (2 Тим. 4:17). Биз хем Павлус ресул ялы вагыз ишине ыхласлы гатнашсак, Ехованың бизи әхли герекли затлар билен үпҗүн этҗекдигине ынанып билерис (Мат. 6:33). Худайың Патышалыгының вагызчылары хөкмүнде бизе хош хабары вагыз этмек «табшырылды». Ехова бизи «ишдешлери» болмага мынасып гөрди (1 Сел. 2:4; 1 Кор. 3:9). Эгер биз муңа ыхласлы гатнашсак, Худайың догаларымыза җогап бермегине гарашмак кын болмаз.

18. Биз Ехова болан ынамымызы ве онуң билен достлугымызы нәдип беркидип билерис?

¹⁸ Гелиң, Ехова билен достлугымызы беркиделиң. Кынчылыклара Худая якынлашмага мүмкинчилик хөкмүнде гаралың. Худайың Сөзүни чуңңур өвренип, ызыгидерли дога эдип, рухы ишлере ыхласлы гатнашалың. Шонда Ехованың бизи хәзирем, гелеҗекде-де голдаҗакдыгына ынамлы боларыс.