Яшулулар, сиз доганлары җогапкәрли борчлары алмага тайярлаярсыңызмы?
«Хер задың өз вагты бар». ВАГ. 3:1
1, 2. Этрап гөзегчилери нәмә гөз етирдилер?
ЭТРАП ГӨЗЕГЧИСИ йыгнак яшулулары билен душушык гечирйәр. Шонда ол доган-уяларың аладасыны этмек үчин агыр зәхмет чекйән яшулулара хормат билен середйәр. Яшулуларың кәбири онуң какасы билен яшдашды. Этрап гөзегчиси соңкы сапар йыгнага айлананда, олара доганлары җогапкәрли борчлары алмага тайярламак бабатда маслахат берипди. Гөзегчи доган олардан: «Сиз доганлары тайярламак үчин нәмелер этдиңиз?» дийип сораяр. Шонда яшулулардан бири: «Гынансак-да, биз кән зат эдип билмедик» диййәр. Бейлеки яшулулар хем баш атып, оны макуллаярлар.
2 Эгер сиз йыгнак яшулысы болсаңыз, онда этрап гөзегчисиниң айданларына дүшүнйәнсиңиз. Бүтин дүнйәдәки этрап гөзегчилери көп йыгнакларда бир зада үнс бердилер. Олар имандашларымызың аладасыны этмек үчин яш ве гарры доганлара өвретмегиң герекдигине гөз етирдилер. Элбетде, бу аңсат дәл. Нәме үчин?
3. a) Мукаддес Язгылар доганлары тайярламагың ваҗыпдыгыны нәдип гөркезйәр ве биз мунуң билен нәме үчин гызыкланмалы? (Чыкгыда середиң). б) Кәбир яшулулара доганлары тайярламак нәме үчин аңсат болмаяр?
3 Яшулулар, сиз чопан кимин доганлары тайярламагың ваҗыпдыгына шүбхесиз дүшүнйәнсиңиз *. Себәби имандашларымызы рухы тайдан беркитмек ве тәзе йыгнаклары дөретмек үчин җогапкәрли доганларың герекдигини билйәнсиңиз (Ишая 60:22-ни окаң) *. Худайың Сөзем «бейлекилере өвретмәге» хөвеслендирйәр (2 Тимотеос 2:2-ни окаң). Эмма ёкарда агзалян яшулулар ялы муны этмек сизе аңсат дүшйән дәлдир. Сиз машгала агзалырыңызың аладасыны эдйәндигиңиз, ишлейәндигиңиз, йыгнакдакы җогапкәрчилигиңиз ве башга борчларыңыз себәпли доганлары тайярламага вагт галмаяр дийип ойланянсыңыз. Йөне, гелиң, мунуң нәме үчин ваҗыпдыгыны билелиң.
ДОГАНЛАРЫ ТАЙЯРЛАМАГЫ БИРИНҖИ ОРУНДА ГОЮҢ
4. Доганлары тайярламак нәме үчин соңа гоюляр?
4 Кәбир йыгнак яшулуларына доганлары тайярламага вагт тапмак нәме үчин кын болуп билер? Белки-де, олар: «Хава, доганлары тайярламак герек, йөне йыгнагың хас гыссаглы ишлери бар ахырын. Эгер доганлары тайярламак билен башагай болсак, йыгнагың ишлерини ким эдер?» дийип пикир эдйәндир. Йыгнакда көп ваҗып ишлер бар болса-да, доганлара вагтында көмек эдилмесе, бүтин йыгнагың рухы саглыгына зыян етер.
5, 6. Сүрүҗиниң гарайшындан нәхили сапак эдинйәрис ве бу мысал доганлары тайярламагың ваҗыпдыгыны нәдип гөркезйәр?
5 Гелиң, бир мысала середелиң. Улагың моторы говы ишләр ялы, сүрүҗи онуң ягыны вагтында чалышмалы. Эмма ол моторың ягыны чалышмагы янгыч гуймак ялы ваҗып хасапламазлыгы мүмкин. Себәби улага янгыч гуюлмаса, ол тизден дурар, асла йөремез. Сүрүҗи: «Моторың ягыны чалышмасам-да, улагым энтек бираз йөрәр-ле» дийип пикир эдйәндир. Догрудан-да, шейлеми? Эгер сүрүҗи улагың моторына үнс бермесе, ягны ягыны вагтында чалышмаса, бир гүн ол дөвлер. Инди моторы беҗермек үчин көп вагт хем пул герек болар. Биз мундан нәме өвренйәрис?
6 Яшулулар йыгнакдакы ваҗып ишлери вагтында ерине етирйәндиги себәпли, доган-уяларың арасында агзыбирлик хөкүм сүрйәр. Сүрүҗиниң улагына хемише янгыч гуюп дурушы ялы, яшулулар хем «иң ёкары затлара гөз етирмели» (Флп. 1:11). Эмма кәбир яшулулар шейле башагай болярлар велин, доганлары тайярламага үнс бермейәрлер. Башгача айданыңда, олар мысалдакы сүрүҗи ялы, моторың ягыны чалышмагы ваҗып хасапламаярлар. Эгер-де яшулулар доганлары тайярламагы хемише соңа гойсалар, онда гүнлерде бир гүн йыгнагың аладасыны этҗек теҗрибели доганлар етмезчилик эдер.
7. Биз доганлары тайярлаян яшулулара нәхили гарамалы?
7 Гөршүмиз ялы, доганлары тайярламак ваҗып дәл диен пикирден гача дурмалы. Кәбир өңден гөрүҗи яшулулар теҗрибеси аз доганлары тайярламага вагт сарп эдйәрлер. Шейле яшулулар пайхаслы иш доландырыҗы хөкмүнде бүтин йыгнага берекет гетирйәрлер (1 Петрус 4:10-ны окаң). Нәхили берекет?
ГЕЛЕҖЕГЕ ТАЙЯРЛЫК
8. a) Доганлары тайярламага яшулулары нәме хөвеслендирйәр? б) Вагызчыларың етмейән еринде гуллук эдйән яшулуларың нәхили ваҗып җогапкәрчилиги бар? (« Өрән ваҗып юмуш» диен чарчува середиң).
8 Иң теҗрибели йыгнак яшулулары-да, хәзирки эдйән ишлерине гарран чагында гүйҗүниң етмеҗекдигини кичигөвүнлилик билен боюн алярлар (Мика 6:8). Шейле-де олар «аматсыз вагт ве хадыса» зерарлы йыгнагың аладасыны этмәге ягдайының болмаҗакдыгына дүшүнмели (Ваг. 9:11, 12; Якуп 4:13, 14). Гелеҗегиң пикирини эдйән яшулулар Ехованың гузуларының йүрекден аладасыны эдип, топлан теҗрибесини яш доганлара өвредйәрлер (Зебур 71:17, 18-нҗи аятлары окаң).
9. Доганлары хәзирден тайярламак нәме үчин ваҗып?
9 Яшулуларың доганлары тайярламагының ене-де нәхили пейдасы бар? Олар йыгнагы беркидйәр. Нәдип? Яшулулар нәче көп доганлары тайярласа, шонча-да йыгнагың берк хем агзыбир болмагына көмек эдйәр. Бу диңе бир хәзир дәл-де, эйсем, улы мушакгатың кын гүнлеринде-де пейдалы болар (Эзек. 38:10—12; Мика 5:5, 6). Гадырлы яшулулар, шу гүнден башлап, доганлары тайярламагы биринҗи орунда гоймагы сизден хайыш эдйәрис!
10. Яшулулар доганлары тайярламак үчин нәме этмели?
10 Элбетде, сизиң йыгнакдакы ваҗып ишлере зордан етишйәндигиңизе дүшүнйәрис. Эмма доганлары йыгнакда җогапкәрли борчлары алмага тайярламак үчин вагт тапсаңыз, говы боларды (Ваг. 3:1). Шонда сиз гелеҗеге говы тайярлык гөрерсиңиз.
АМАТЛЫ ШЕРТЛЕРИ ДӨРЕДИҢ
11. а) Ериң дүрли күнҗегинде яшаян яшулуларың берйән маслахаты барада нәме дийсе болар? б) Оларың маслахатына эермегиң пайхаслыдыгыны Сүлейманың тымсаллары 15:22-и нәдип гөркезйәр?
11 Ериң дүрли күнҗегинде яшаян яшулулардан доганлара рухы тайдан өсмәге көмек этмекде нәхили үстүнлик газанандыкларыны соранларында, бирмеңзеш маслахат берйәндиклери аныкланылды *. Бу нәмәни гөркезйәр? Павлус ресулың гүнлеринде болшы ялы, яшулулар «хер ерде, хер йыгнакда» Мукаддес Язгыларың эсасында доганлары тайярлап билйәрлер (1 Кор. 4:17). Биз шу ве индики макалада оларың берйән маслахатлары барада гүррүң эдерис (Сүл. тым. 15:22). Оларда тәлим берйән доганлара «мугаллымлар», өвренйәнлере болса «окувчылар» диерис.
12. Мугаллым нәме этмели ве нәме үчин?
12 Мугаллым өвретмек үчин аматлы шертлери дөретмели. Багбаның ере тохум сепмезден өң топрагы юмшадышы ялы, мугаллым хем өвретмезден өң окувчының йүрегини тайярламалы, ягны оны хөвеслендирмели. Аматлы шертлери дөретмек үчин нәме этмели? Мунуң үчин бир пыгамбериң уланан усулына эермели. Ол нәхили усул?
13—15. а) Шамувеле нәме табшырыляр? б) Ол юмшы нәдип ерине етирйәр? (Макаланың башындакы сурата середиң). в) Яшулулар нәме үчин Шамувелиң гөрелдесине эермели?
13 Ехова 3 000 йыл мундан озал Шамувел пыгамбере: «Эртир шу вагтлар Мен сениң яныңа бенямин топрагындан бир адам иберерин. Сен оны Мениң халкым Ысрайыла хөкүмдарлыга яг чалып сайларсың» диййәр (1 Шам. 9:15, 16). Шамувел тизден халка өзүниң дәл-де, Ехованың башга бирини ёлбашчылык этмәге беллеҗекдигине дүшүнйәр. Белки-де, ол: «Мен оңа патыша болмага нәдип көмек этсемкәм?» дийип пикирленендир. Ол ойланып, бир карара гелйәр.
14 Эртеси гүн Шамувел Шавулы гөренде, Ехова оңа: «Ине, Мениң саңа айдан адамым шу» диййәр. Шонда ол гелен карарына гөрә херекет эдйәр. Ол Шавулы ве онуң хызматкәрлерини нахара чагырып, төрден ер берйәр. Пыгамбер Шавула гоян пайыны берип: «Ал, ийибер, мен муны йөрите сениң үчин гойдурдым» диййәр. Соңра олар гүррүңдеш болуп, пыгамбериң өйүне гидйәрлер. Хава, пыгамбер тагамлы нахардан ве говы гезеленчден соңра дөрән аматлы шертлерден пейдаланяр. Ол Шавул билен өйүниң «үчегиниң үстүне» чыкып, агшамың салкын шемалында гүррүңини довам эдйәр. Эртеси гүн Шамувел Шавулы месх эдйәр, огшаяр ве гөркезме берйәр. Шейдип, Шавулы гелеҗекде этмели җогапкәрли борчлара тайярлаяр (1 Шам. 9:17—27; 10:1).
15 Элбетде, патышаны беллемек билен доганлары яшулы я-да йыгнак хызматчысы болмага тайярламагың арасында тапавут бар. Йөне яшулулар Шамувелден бирнәче затлары өвренип билерлер. Гелиң, оларың икисине середелиң.
ЫХЛАСЛЫ МУГАЛЛЫМ ВЕ ХАКЫКЫ ДОСТ
16. a) Пыгамбер патыша беллемели боланда өзүни нәхили дуйды? б) Шамувел юмшы нәхили ерине етирди?
16 Совук-сала дәл-де, хөвес билен көмек эдиң. Шамувел пыгамбер ысрайыллыларың патыша талап эдйәндигини эшиденде гынанып, өзүни дерексиз дуйды (1 Шам. 8:4—8). Ол шейле бир лапыкеч болды велин, Ехова оңа ысрайыллыларың хайышыны битирмегини үч сапар айтды (1 Шам. 8:7, 9, 22). Эмма Шамувел өз ерини алҗак адама йүрегинде йигренҗиң көк урмагына ёл бермеди. Ол Шавулы месх этмели боланда, муны совук-сала дәл-де, хөвес билен этди.
17. Яшулулар Шамувелиң гөрелдесине нәдип эерйәрлер ве олар нәме үчин бегенйәрлер?
17 Шу гүнлер теҗрибели яшулулар Шамувелден гөрелде алып, доганлара мәхир билен көмек эдйәрлер (1 Пет. 5:2). Олар йыгнакда ерине етирйән борчларыны доганлара бермекден горкмаярлар ве олара рухы тайдан өсмәге көмек эдйәрлер. Шейле мугаллымлар гөрипчилик этмейәрлер ве окувчыларыны бәсдеши хасапламаярлар. Гайтам, олара «ишдешлер» ве йыгнагың гымматлы хазыналары хөкмүнде гараярлар (2 Кор. 1:24; Евр. 13:16). Шейле кичигөвүнли мугаллымлар укыплы окувчыларының йыгнага пейдасының дегйәндигини гөрүп бегенйәрлер (Рес. иш. 20:35).
18, 19. Яшулулар окувчының йүрегини нәдип тайярламалы ве бу нәме үчин ваҗып?
18 Диңе бир мугаллым дәл-де, хакыкы дост болуң. Шамувел пыгамбер Шавулы гөрен бадына, онуң башына деррев яг чалып, уградып билерди. Ол патыша белленсе-де, борчларыны ерине етирмәге тайяр болардымы?! Эмма пыгамбер дост хөкмүнде вагт тапып, Шавулың йүрегини юваш-ювашдан тайярлаяр. Олар тагамлы нахар ийип, гезеленч ве гүррүңдешлик эдип, говы дынч алярлар. Соңра пыгамбер Шавулы месх эдип, патыша беллейәр.
Доганлара көмек этмек үчин, илки, олар билен достлашың (18, 19-нҗы абзацлара середиң)
19 Мугаллым хем окувчыны тайярламак үчин, илки, аматлы шертлери дөретмели ве онуң билен достлашмалы. Яшулуларың шейле гатнашыклары ёла гоймак үчин эдйән тагаллары хер юртда дүрли-дүрли болуп билер. Элбетде, олар ерли ягдайы ве медениети гөз өңүнде тутмалы. Йөне яшулулар хайсы юртда яшаса-да, нәче башагай болса-да, окувчысына вагт сарп этсе, оңа: «Сен мениң гадырлы достум» диен ялы боларды (Римлилер 12:10-ы окаң). Шонда окувчылар өзүни герекли дуюп, хөвес билен өвренерлер.
20, 21.a) Киме говы мугаллым дийсе болар? б) Индики макалада нәме барада гүррүң эдерис?
20 Яшулулар, сиз говы мугаллымың диңе бир өвретмек билен чәкленмән, окувчысыны сөййәндигини унутмаң (Яхя 5:20-ни деңешдириң). Мугаллымының сөйгүсини дуйян окувча өвренмек аңсат болар. Гадырлы яшулулар, доганы тайярланыңызда, диңе бир мугаллым болман, хакыкы дост болуң (Сүл. тым. 17:17; Яхя 15:15).
21 Хава, мугаллымлар окувчысының йүрегини тайярландан соңра герекли тәрлери өвредип билерлер. Яшулулар нәхили тәрлери уланып билерлер? Бу барада индики макалада гүррүң эдерис.
^ абзац 3 Шу ве индики макала яшулулар үчин язылса-да, бизиң әхлимиз бу барада ойланып билерис. Нәме үчин? Себәби макалада Патышалык ишини голдамак үчин сувда чокундырылан доганларың әхлисине йөрите тайярлык гөрмегиң ваҗыпдыгы дүшүндирилйәр. Бу әхлимизе пейда гетирер.
^ абзац 3 Ишая 60:22 Оларың иң азы уруг болар, гүйчли миллет болар иң эҗизи; Мен — Реб муны өз вагтында тиз амал эдерин.
^ абзац 11 Яшулулар АБШ-да, Австралияда, Бангладешде, Бельгияда, Бразилияда, Гүнорта Африкада, Гүнорта Кореяда, Мексикада, Намибияда, Нигерияда, Реюньон, Руссияда, Францияда, Француз Гвианада ве Японияда яшаярлар.
