1, 2. а) Месихчилер нәме үчин Худая вепалы галярлар ве нәдип? (Макаланың башындакы сурата середиң). б) Бу дүнйәниң адамлары нәмә вепалы болярлар ве онуң соңы нәмә язяр?

МЕСИХЧИЛЕР агзалалыкдыр урушларда битараплыгы саклаярлар. Нәме үчин? Себәби Ехова өзүни багыш эден месихчилер оңа табын болуп, вепалы галярлар ве сөйгүсини билдирйәрлер (1 Яхя 5:3). Биз яшаян еримизе, алан тербийәмизе, миллетимизе ве медениетимизе гарамаздан, Аллатагаланың када-канунларына эерйәрис. Биз Ехова ве онуң Патышалыгына вепалы болмагы әхли затдан ваҗып сайярыс (Мат. 6:33). Шол себәпли Худайың гуллукчылары дүнйәде болян давалара ве агзалалыга гошулмаярлар (Иш. 2:4; Яхя 17:11, 15, 16-нҗы аятлары окаң).

² Адатча, адамлар Ватанына, миллетине, медениетине я-да спорт топарының оюнчыларына вепалы болмак үчин, җаныны гурбан эдйәрлер. Шейле вепалылык көпленч бәсдешлиге, урушлара ве гыргынчылыга язяр. Олар бизиң әхлимизе тәсир эдип билер,  себәби бизем бу дүнйәде яшаярыс. Худайың кешбинде ярадылан ынсанларың хер биринде адалатлылык хәсиети бар. Йөне хәкимиетлериң гелйән карарлары бизиң догры ве адалатлы хасаплаян затларымыза кәте гаршы гелйәр (Гел. чык. 1:27; Кан. таг. 32:4). Биз муңа нәхили гараярыс? Элбетде, бу дүнйәде адамлара битараплыгы сакламак аңсат дәл.

3, 4. а) Месихчилер нәме үчин битараплыгы саклаярлар? б) Биз шу макалада нәме барада гүррүң эдерис?

³ Хәкимиетлер юртда питне туранда раятларының хайсы-да болса бир тарапы голдамагыны талап эдйәрлер. Эмма месихчилер сыясы давалара гошулмаярлар ве хич бир тарапы голдамаярлар (Мат. 26:52). Биз адамларың ве Шейтаның тәсирине дүшмезлик үчин җан эдйәрис (2 Кор. 2:11). Биз бәсдешлик эдйән топарлары голдамаярыс ве дүнйәниң ишлерине гошулмаярыс (Яхя 15:18, 19-нҗы аятлары окаң).

⁴ Биз бикәмиллик себәпли нәдогры пикирлеримизи дүзетмәге тагалла эдйәрис (Ер. 17:9; Эфес. 4:22—24). Биз шу макалада нәдогры пикирлери дүзетмәге ве Худайың Патышалыгына вепалы галмак үчин ынсабымызы тербиелемәге көмек эдйән кәбир принциплер барада гүррүң эдерис.

5, 6. Иса нәме үчин ве нәдип битараплыгы саклаярды?

⁵ Сиз агзалалык дөрәнде өзүңизе: «Мениң ериме Иса нәме эдерди?» диен сорагы берип билерсиңиз. Ысрайыл юрдунда яхудалы, җелилели, самариялы ве башга-да дүрли миллетли адамлар яшаярдылар. Мукаддес Язгыларда оларың арасында дава-җенҗелиң боландыгы айдыляр (Яхя 4:9). Шейле-де фарисейлер билен садукейлериң (Рес. иш. 23:6—9); адамлар билен салгытчыларың (Мат. 9:11); билимлилер билен билимсизлериң арасында дүшүнишмезлик болярды (Яхя 7:49). I асырда ысрайыллылар Римиң голы астындады; халк римлилери йигренйәрди. Иса дини ёлбашчылары паш эдип, гутулышың ехудылардан гелҗекдигини вагыз этсе-де, хич бир затда бәсдешлик этмели дәлдигини өвредйәрди (Яхя 4:22). Ол шәгиртлерине «гоңшусыны», ягны әхли адамлары сөймеги табшырды (Лука 10:27).

⁶ Иса ехудыларың дава-җенҗелине нәме үчин гошулмаярды? Ол Атасының гөрелдесине эерйәрди. Ехова илкинҗи ынсан җүбүтини яраданда, оларың өрңәп көпелмегини иследи (Гел. чык. 1:27, 28). Худай адамлары бирмеңзеш эдип яратмады. Шол себәпли Ехова билен Иса әхли миллети, җынсы ве дили дең дереҗеде гыммат сайып, олары ала тутмаяр (Рес. иш. 10:34, 35; Ылх. 7:9, 13, 14). Биз хем оларың гөрелдесине эерип билерис (Мат. 5:43—48).

7, 8. а) Месихчилер нәхили меселеде белли бир карара гелмели? б) Месихчилер нәмә ынанярлар?

⁷ Биз Ехованың хөкүмдарлыгы бабатдакы җеделли меселеде белли бир карара гелмели. Шейтан Эрем багында питне турзуп, җеделли  меселәни орта атды. Эмма биз Шейтаның дәл-де, Ехованың говы хөкүмдардыгына гөз етирйәрис. Биз Ехованың када-канунларыны берҗай эдип, оны голдаярысмы? Биз адамзадың кынчылыкларыны ынсан хәкимиетиниң дәл-де, Ехованың Патышалыгының чөзҗекдигине ынанярысмы? (Гел. чык. 3:4, 5).

⁸ Биз бу сораглар бабатда белли бир карара гелсек, битараплыгы саклап билерис. Сыясатчылар ве гозгалаңчылар кынчылыклары чөзмек үчин элинде барыны эдйәрлер. Эмма месихчилер адамзадың кынчылыкларыны диңе Худайың Патышалыгының чөзҗекдигине ве ер йүзүнде адалатлылыгы дикелтҗекдигине ынанярлар. Биз Ехова бил баглап, догры карара гелмесек, йыгнакда агзалалык дөремезми?

9. Коринтосдакы йыгнакда нәхили дүшүнишмезлик болды ве Павлус ресул нәхили маслахат берди?

⁹ I асырда яшан месихчилериң арасында агзалалык дөрейәрди. Коринтосдакы йыгнакда месихчилериң кәбири: «Мен Павлусыңкы, мен Аполлосыңкы, мен Кифасыңкы, мен Месихиңки» диййәрдилер. Павлус ресул месихчилериң арасындакы агзалалыгы гөрүп: «Месих бөлүндими?» диййәр. Агзалалыгы нәдип чөзүп болар? Павлус месихчилере шейле маслахат берйәр: «Доганлар, хеммәңизиң дили бир болуп, араңызда бөлүнишик болман, бир пикирде ве райда бирлешмегиңизи Реббимиз Иса Месихиң ады билен сизден хайыш эдйәрин». Шу гүнлерем месихчилер Павлусың берен маслахатына эерип, йыгнакда агзыбирлиги саклаярлар (1 Кор. 1:10—13; Римлилер 16:17, 18-нҗи аятлары окаң).

10. Павлус битараплык бабатда нәхили мысал гетирди?

¹⁰ Павлус ресул мехс эдилен месихчилериң үнсүни ердәки затлара дәл-де, гөкде алҗак сылагына гөнүкдирди (Флп. 3:17—20) *. Себәби олар Месихиң илчилери болмалыдылар. Илчилер баран юрдунда битараплыгы саклап, Ватанына вепалы болярлар (2 Кор. 5:20). Ерде яшамага умыт эдйән месихчилер хем Худайың Патышалыгының раятлары хөкмүнде бу дүнйәниң даваларына гошулмаярлар.

11, 12. а) Месихчилере Худайың Патышалыгына вепалы болмага нәме пәсгел берйәр? б) Бир уя нәхили кынчылыга душ гелйәр ве оны нәдип еңйәр?

¹¹ Адамлар көпленч тарыхына, медениетине ве дилине буйсанярлар. Эмма месихчилер битарап болмак бабатда ынсабыны тербиелемели ве догры гарайшы өсдүрмели. Нәдип?

¹² Гелиң, бир мысала середелиң. Югославияда яшаян Меръетаның * машгаласы серб халкыны йигренйәрди. Меръета Ехованың адамлары ала тутмаяндыгыны ве Шейтаның миллетпаразлыгы өңе сүрйәндигини биленде, йүрегиндәки эрбет хәсиети көки билен согруп ташламага җан эдйәр. Бир гүн онуң яшаян еринде гозгалаң туряр ве ол  ене-де серблери йигренип башлаяр, хатда олара вагыз этмек хем ислемейәр. Эмма уя нәдогры пикирини дүзетмелидигине дүшүнйәр. Меръета кынчылыга дөз гелмек ве пионер болуп гуллук этмек барада Ехова дога эдйәр. Ол: «Адамлара вагыз эдип, мен эрбет пикирлерими еңйәрин. Мен Ехованың сөйги хәсиетине эермәге ве нәдогры гарайшымы үйтгетмәге җан эдйәрин» диййәр.

13. а) Бир уя нәме үчин рухдан дүшйәр ве ол нәме эдйәр? б) Биз Зоила билен болан вакадан нәме өвренйәрис?

¹³ Гелиң, инди Европада яшаян мексикалы Зоила билен болан вака середелиң. Бир гүн ол йыгнакдакы латын америкалы кәбир доган-уяларың Меркези Американың дәп-дессурлары ве айдым-сазлары барада яңсылайҗы гүррүңини эшидйәр. Сиз онуң ерине болсаңыз нәме эдерсиңиз? Элбетде, Зоила оңайсыз ягдая дүшендир. Эмма ол пайхаслы херекет эдип, Ехованың көмеги билен өз дуйгуларына эрк этмеги башаряр. Гынансак-да, бизем кәте йыгнакда шейле ягдайлара душ гелйәрис. Месихчилер доган-уяларың ве башга адамларың дуйгуларыны гөз өңүне тутуп, айтҗак сөзлерине хем өзүни алып баршына үнсли болмалы. Шонда йыгнакда не агзалалык, не-де миллетпаразлык болар (Рим. 14:19; 2 Кор. 6:3).

14. Месихчилер догры гарайышда болмак ве ынсабыны тербиелемек бабатда нәме этмели?

¹⁴ Белки-де, сиз алан тербийәңиз ве даш-төверегиңиздәки адамлар себәпли, өзүңизде миллетпаразлык дуйгусының бардыгыны билйәнсиңиз. Эмма месихчилер башгалары әсгермезчилик эдип, миллетпаразлыга ёл бермели дәл. Биз башга миллетдәки, медениетдәки, җынсдакы ве башга дилде геплейән адамлары кемситмез ялы нәме этмели? Эгер сиз Ехованың адамлары ала тутмаяндыгы барада ойлансаңыз, гөзлег гечирип, оны машгала я-да шахсы окувында өвренсеңиз, нәдогры пикирлери еңип билерсиңиз. Шейле-де адамлара догры гарайышда болмак үчин дога эдиң (Римлилер 12:2-ни окаң).

15, 16. а) Адамлар бизиң Худая вепалылыгымыза нәхили гараярлар? б) Ата-энелер чагаларыны нәдип голдап билер?

¹⁵ Ехованың гуллукчыларының ынсабы Мукаддес Язгылара гөрә тербиеленендиги үчин ишдешлеринден, сынпдашларындан, гоңшы-голамларындан ве доган-гарындашларындан тапавутланяр (1 Пет. 2:19). Хава, биз бу дүнйәден болмалы дәл! Иса адамларың бизи йигренҗекдигини дуйдурды. Себәби олар бу дүнйәниң ишлерине бизиң нәме үчин гошулмаяндыгымыза дүшүнмейәрлер. Эмма месихчилер битараплыгы әхли затдан ваҗып сайярлар.

¹⁶ Биз Ехова вепалы галмак ислейәрис (Дан. 3:16—18). Эмма бизиң хер биримизде адамдан горкы дуйгусы болуп билер. Эсасан-да, яшлара иманы барада гүррүң бермек кын боляр. Сизиң чагаңыз байдага тагзым этмек ве байрамчылыклара гатнашмак ялы сынаглара душ гелсе, машгала окувы аркалы оңа көмек эдиң. Меселем, бу дүнйәниң  ишлерине гошулмалы дәлдигини дүшүндириң. Оңа әхли сынагларда берк дуруп, иманы барада ач-ачан ве сыпайычылыклы гүррүң бермеги өвредиң (Рим. 1:16). Галыберсе-де, сизиң өзүңиз чагаңызың мугаллымлары билен гүррүңдеш болуп билерсиңиз.

17. Биз нәмеден әгә болмалы ве нәме үчин?

¹⁷ Элбетде, биз Ватанымызы, медениетимизи, дилимизи ве милли нахарларымызы говы гөрйәрис. Эмма биз өвүнмекден әгә болмалы. Ехова бизиң леззет алып яшамагымыз үчин дүрли-дүрли затлары яратды (Зеб. 104:24; Ылх. 4:11). Онда нәме үчин адамлар бир зады башга затдан ёкары сайярлар?

18. Ехованың гөрелдесине эерсек нәхили берекетлер аларыс?

¹⁸ Худай әхли адамларың хакыкат барада билим алып, багтлы яшамагыны ислейәр (Яхя 3:16; 1 Тим. 2:3, 4). Биз адамлары ала тутмасак көп берекет аларыс ве доган-уяларың арасындакы агзыбирлиги беркидерис. Ехова вепалы месихчилер бу дүнйәниң ишлерине ве дава-җенҗеле гошулмаярлар. Ехова бизи Шейтаның хөкүм сүрйән дүнйәсинде гиңден яйран миллетпаразлыкдан, текепбирликден ве бәсдешлик рухундан азат эдйәр. Биз Аллатагала өрән миннетдар! Мезмурчы: «Доганларың биле яшамагы, гөр, нәхили говы, нәхили якымлы!» диййәр (Зеб. 133:1). Гелиң, бизем әхли адамлар билен агзыбир яшамага җан эделиң!