1. Яхя ресул месихчилери нәме барада ойланмага хөвеслендирйәр ве нәме үчин?

ЯХЯ РЕСУЛ Ехованың бизе болан чуңңур сөйгүси барада ойланмага хөвеслендирйәр. Ол 1 Яхя 3:1-де: «Ата бизе, гөр, нәхили сөйги берипдир!» диййәр. Яхя месихчилере Аллатагаланың сөйгүсиниң әхмиети, айратынлыгы ве онуң сөйгүсиниң нәмеден гөрүнйәндиги барада пикирленмәге хөвеслендирди. Ехованың бизи сөййәндигине гөз етирсек, оңа болан сөйгимиз артар ве достлугымыз беркәр.

2. Кәбир адамлара Худайың сөйгүсине ынанмак нәме үчин кын боляр?

² Гынансак-да, кәбир адамлар Худайың сөййәндигине ынанмаярлар. Олар Худай адамларың аладасыны этмейәр дийип пикир эдйәрлер. Олар Ехованы талап эдиҗи ве өзүне гулак асмаян адамлары җезаландырян Худай хасаплаярлар. Себәби ялан таглыматлар Худайы өрән залым ве хайбатлы эдип гөркезйәр. Кәбирлери болса ягшы иш этсең-де, эрбет иш этсең-де Аллатагала әхли адамлары сөййәр дийип пикир эдйәрлер. Эмма Мукаддес Язгыларда Ехова барада хакыкат айдыляр. Ехованың эсасы хәсиети сөйгүдир. Ол бизи сөййәндиги үчин Оглуны төлег хөкмүнде гурбан берди (Яхя 3:16; 1 Яхя 4:8). Белки-де,  алан тербийәңиз себәпли сизе-де Худайың адамлары сөййәндигине ынанмак кын боляндыр.

3. Ехованың бизи сөййәндигине дүшүнмәге нәме көмек эдер?

³ Ехованың бизи сөййәндиги нәмеден гөрүнйәр? Бу сорагың җогабыны билмек үчин Худайың бизи ярадандыгына ве яшайшы пешгеш берендигине дүшүнмели (Зебур 100:3—5-нҗи аятлары окаң). Мукаддес Язгыларда Адам ата «Худайың оглы» дийилйәр. Иса шәгиртлерине Ехова йүзлененде «гөклердәки Атамыз!» диймелидигини өвредйәр (Лука 3:38; Мат. 6:9). Ехова — бизиң Атамыз. Башгача айданыңда, мәхирли атаның чагаларыны сөйши дек, Ехова-да бизи сөййәр.

4. а) Ехова ынсан аталарындан нәмеде тапавутланяр? б) Биз шу ве индики макалаларда нәме барада гүррүң эдерис?

⁴ Бикәмил аталар Ехова ялы долы дереҗеде сөйгүсини гөркезип билмейәрлер. Залым какасының элинде өнүп-өсенлериң кәбириниң хенизем йүрек ярасы битен дәлдир. Эмма Ехова иң говы Ата; ол чагаларына хич хачан залымлык билен дарашмаяр (Зеб. 27:10). Ехованың чуңңур сөййәндигине ве аладамызы эдйәндигине дүшүнсек, бизиңем оңа болан сөйгимиз артар (Якуп 4:8). Биз шу макалада Ехованың адамлара болан сөйгүсиниң дөрт айратынлыгы барада гүррүң эдерис. Индики макалада болса бизиң Ехова болан сөйгимизиң дөрт айратынлыгыны билерис.

5. Павлус ресул афинылылара Худай барада нәмәни дүшүндирди?

⁵ Павлус ресул Грецияның Афины шәхерине баранда бутлардан долудыгыны гөрйәр. Афинылар яшайшы ве герекли затлары бутларың берйәндигине ынанярдылар. Шол себәпли Павлус шейле дүшүндирди: «Дүнйәни, онуң ичинде болан бүтин затлары ярадан Худай... хеммелере дирилик, дем ве әхли зады Онуң өзи берйәр... биз Онда яшаяндырыс, херекет эдйәндирис ве бардырыс» (Рес. иш. 17:24, 25, 28). Ехова бизиң дурмушдан леззет алып яшамагымыз үчин «әхли затлар» билен үпҗүн эдйәр. Гелиң, бу барада ойланып гөрелиң.

6. Ер шары Ехованың сөйгүсини нәдип аян эдйәр? (Макаланың башындакы сурата середиң).

⁶ Ехова Ери ярадып, оны «адам огулларына берди» (Зеб. 115:15, 16). Алымлар әлем гиңишлигинде гөзлег гечирип, Ер шары ялы планеталары тапмак үчин энчеме чыкдаҗы эдйәрлер. Олар йүзлерче планеталарың бардыгыны аныкладылар, йөне оларда яшайыш шертлери ёкды. Гөз өңүне гетириң, Акмаяның ёлунда сансыз-саҗаксыз планеталар бар, йөне Ехова Ер шарыны өрән тәсин тәрде яратды. Ол Ери яшайыш үчин диңе бир герекли затлар билен үпҗүн этмән, эйсем, оны аматлы, овадан ве ховпсыз өй эдип яратды (Иш. 45:18). Бу Ехованың адамлара болан чуңңур сөйгүсини гөркезмейәрми нәме?! (Эйюп 38:4, 7; * Зебур 8:3—5-нҗи аятлары окаң).

7. Ехова ынсаны яраданда сөйгүсини нәдип аян этди?

⁷ Ехова бизи сөйги билен ярадып, Өзүнден гөрелде алмага мүмкинчилик берди (Гел. чык. 1:27). Бу бизе Ехованың сөйгүсини дуймага, оңа сөйги билдирмәге ве багтлы яшамага көмек эдйәр. Чага ата-энесиниң сөйги  билен аладасыны эдйәндигини гөренде, өзүни багтлы дуйяр. Исаның айтмагына гөрә, бизем гөкдәки Атамыз Ехова билен достлашсак, багтлы болуп билерис (Мат. 5:3). Ехова бизе әхли зады «леззет алмак» үчин берйәр. Догрудан-да, сөйгүден долы Ехова өрән җомарт Худай (1 Тим. 6:17; Зеб. 145:16).

8. Биз нәме үчин Еховадан өвренмек ислейәрис?

⁸ Чагаларыны сөййән ата оларың азашмагыны ве алданмагыны ислемейәр. Гынансак-да, ата-энелериң көпүси чагаларына догры гөркезме берип билмейәрлер. Себәби оларың өзи Худайың када-канунларына эермекден йүз өвүрйәрлер. Нетиҗеде, олар көп ялңышлык гойберип, лапыкеч болярлар (Сүл. тым. 14:12). Ехова — «хакыкат Худайы» (Зеб. 31:5). Ол перзентлерини сөйүп, өзүни танадяр ве сежде этмек бабатда гөркезме берйәр. Ехова хакыкатың нур кимин шөхле сачяндыгына бегенйәр (Зебур 43:3-и окаң). Ол нәхили хакыкаты аян эдип, сөйгүсини билдирйәр?

9, 10. а) Ехова өзүни нәме үчин танадяр? б) Ехова адамзат бабатда хакыкаты аян эдип, сөйгүсини нәдип гөркезйәр?

⁹ Илки билен, Ехова өз адыны аян эдип, хакыкаты ачды. Мукаддес Язгыларда онуң ады бейлеки атлара гараныңда, хас көп агзаляр. Бу болса бизе Ехованы говы танамага көмек эдйәр (Якуп 4:8). Шейле-де Ехова хәсиетлери барада гүррүң берйәр. Әлем-җахан Аллатагаланың акылдарлыгыны ве гүйҗүни васп эдйәр. Мукаддес Язгыларда Ехованың адалатлылыгы ве чәксиз сөйгүси беян эдилйәр (Рим. 1:20). Биз Худайың Сөзүни оканымызда, Ехованың адалатлы ве сөйгүден долы Худайдыгына гөз етирйәрис. Биз онуң хәсиетлери барада нәче көп билсек, шонча-да онуң билен якындан достлашарыс.

¹⁰ Ехова бизе ниетини аян эдип, Өз машгаласының агзасы хасаплаяр. Шейле-де ол гөкде ве ерде парахатлыгың, агзыбирлигиң дикелдилмеги үчин, бизиң нәме этмелидигимизи дүшүндирйәр. Мукаддес Язгыларда адамларың Худайдан гарашсыз ве өзбашдак яшамак үчин ярадылмандыгы айдыляр. Шу хакыкаты инкәр эдйән адамлар паҗыгалы ягдая учраярлар (Ер. 10:23). Ехова бизе нәмәниң герекдигини говы билйәр. Биз онуң хөкүмдарлыгына табын болсак, асуда ве агзыбир яшарыс. Ехова сөйги билен бизе шейле гымматлы хакыкаты аян эдйәр!

11. Сөйгүден долы Атамыз нәхили гелеҗеги вада берйәр?

¹¹ Сөййән ата чагаларының гелеҗеги барада алада эдйәр. Ол чагаларың дурмушының манылы болмагыны ислейәр. Гынансак-да, көп адамлар гелеҗеге умыт этмейәрлер. Шол себәпли олар вагтлайын шатлык гетирйән затлара ковалашып, бүтин өмрүни күл эдйәрлер (Зеб. 90:10). Биз сөйгүден долы гөкдәки Атамызың бардыгына бегенйәрис. Ол шу гүнлер бизиң багтлы яшамагымызы өвретмек билен чәкленмән, эйсем, аҗайып гелеҗеги-де вада берйәр.

12. Ехованың Кабыл билен Баруга берен маслахатындан сөйгүси ве аладасы нәдип гөрүнйәр?

¹² Ехова Кабыла: «Нәме үчин гахарланяң? Нәме йүзүңи саллаярсың?.. Йөне сен гүнәниң үстүнден агалык этмелисиң!» дийип маслахат берди. Шейдип, Ол Кабыла ховп абаняндыгыны дуйдурды. (Гел. чык.  4:6, 7). Гынансак-да, Кабыл Ехова гулак асман эҗир чекди (Гел. чык. 4:11—13). Шейле-де Ехова Ермеяның көмекчиси Баругың нәдогры гарайышдан яңа ядав ве суступесдигине үнс берйәр. Шонда Ол Баруга нәдогры гарайшыны дүзетмелидигини айтды. Кабылдан тапавутлылыкда Барук Ехованың маслахатына гулак асып, җаныны халас этди (Ер. 45:2—5).

13. Ехова вепалы гуллукчыларының сынаглара душ гелмегине нәме үчин ёл берйәр?

¹³ Павлус: «Реб сөййәнини тербиелейәндир, огуллыга кабул эденини чаляндыр» диййәр (Евр. 12:6). Эмма тербие диңе бир темми бермеги дәл-де, көп зады аңладяр. Мукаддес Язгыларда Ехова гуллук эден адамларың көп кынчылыклардан гечендиги айдыляр. Муңа гарамаздан, олар кынчылыклара дөз гелип, көп зады өврендилер. Меселем, Юсуп, Муса ве Давут барада ойланып гөрелиң. Мукаддес Язгыларда бу пыгамберлериң агыр дурмушы җикме-җик ве долы беян эдилйәр. Ехова олара хемише голдав берйәрди. Оларың топлан теҗрибеси Ехованың җогапкәрли юмушларыны ерине етирмәге көмек эдйәрди. Биз Мукаддес Язгылардан шу вакалары оканымызда, Ехованың өз гуллукчыларыны сөййәндигине ве аладасыны эдйәндигине гөз етирйәрис (Сүлейманың тымсаллары 3:11, 12-нҗи аятлары окаң).

14. Ехованың берйән тербиеси бизе болан сөйгүсини нәдип аян эдйәр?

¹⁴ Ехованың берйән тербиеси бизи сөййәндигини гөркезйәр. Гүнә эден адам Ехованың тербиесини кабул эдип, тоба этсе, «Реб оңа рехим эдер» (Иш. 55:7). Бу нәмәни аңладяр? Давут Ехованың гечиримлилиги барада шейле тәсирли сөзлери айдяр: «Әхли  языкларыңы багышлаян, әхли кеселлериңи беҗерйән, яшайшыңы хеләкчиликден халас эдйән, саңа мерхемет ве рехим тәҗини гейдирйән, гүндогар гүнбатардан нәхили узак болса, шонча-да Ол җенаятларымызы бизден узаклашдырды» (Зеб. 103:3, 4, 12). Ехова бизе-де дүрли ёллар аркалы маслахат берип тербиелейәр. Шонда биз деррев өзгеришлик эдйәрисми? Ехованың сөййәндиги үчин тербиелейәндигини хемише ятда саклалың (Зеб. 30:5).

15. Ехованың халкыны гыммат сайяндыгы нәмеден гөрүнйәр?

¹⁵ Элбетде, машгаласыны сөййән ата хемише олары ховпдан горамага җан эдйәр. Гөклердәки Атамыз Ехова-да бизи гораяр. Мезмурчы Ехова барада: «Ол такваларының җанларыны гораяндыр, эрбетлер элинден олары халас эдйәндир» диййәр (Зеб. 97:10). Сиз гөзүңизе зепер етирмезлик үчин оны деррев гораянсыңыз. Себәби ол сизе гымматлы. Шонуң ялы-да, Ехова өз халкыны деррев гораяр, себәби олар онуң үчин гымматлы (Закаря 2:8-и окаң) *.

16, 17. Ехова халкыны гечмишде ве шу гүнлер нәдип гораяр?

¹⁶ Гечмишде-де, шу гүнлерем Ехова перишделери аркалы халкыны гораяр (Зеб. 91:11). Бир гезек Ехованың перишдеси Иерусалими горамак үчин ассириялыларың 185 мүң эсгерини бир гиҗеде гыряр (2 Пат. 19:35). I асырда перишделер Петрусы, Павлусы ве бейлеки адамлары түрмеде халас эдипдилер (Рес. иш. 5:18—20; 12:6—11). Шу гүнлерем Ехованың эли гысга дәл. Яңы-якында Африка дөвлетинде элхенч уруш болды. Юрдуң әхли күнҗегинде уруш, талаңчылык, зорлук ве адам өлдүрмек ялы залым ишлер мөвч урярды. Адамларың көпүси өз якынларыны йитирселер-де, доган-уяларың әхлиси аман галды. Доган-уялар Ехованың сөййәндигине ве аладасыны эдендигине гөз етирдилер. Олар көп эҗир чекселер-де, өзлерини өрән багтлы дуйярлар. Баш эдарамызың векили Африка гелип, оларың хал-ягдайыны соранда, олар: «Ехова миннетдар! Хемме зат говы» дийдилер.

¹⁷ Элбетде, Ехованың вепалы гуллукчыларының кәбирине Стефанус ялы өлүм җезасы берилди. Ехова көпленч шейле ягдайың өңүни алмаяр. Эмма Худай Шейтаның гурян дузаклары барада дуйдурып, халкының бүтинлей ёк эдилмегине ёл бермейәр (Эфес. 6:10—12). Биз бу дуйдурышлар барада Мукаддес Язгылардан ве оңа эсасланан эдебиятлардан окап билйәрис. Меселем, биз Интернетиң, пула болан сөйгиниң, ахлаксызлыгы ве залымлыгы гөркезйән киноларың, китаплардыр кәбир оюнларың ховплудыгыны билйәрис. Хава, Ехова бизи сөййәндиги үчин горамак ислейәр.

18. Ехованың сизи сөййәндигине нәхили гараярсыңыз?

¹⁸ Муса пыгамбер Ехованың сөйгүсине ынанярды ве оңа гуллук эден йылларыны ятлап: «Эртирине мерхеметиң билен бизи доюр, шонда биз бүтин гүнүмизде бегенип шатланарыс» диййәр (Зеб. 90:14). Ехованың сөйгүсини дуймак улы хормат ве берекетдир! Бизем Яхя ресулың: «Ата бизе, гөр, нәхили сөйги берипдир!» диен сөзлерине гошулярыс (1 Яхя 3:1).