МЕН 1927-нҗи йылда Канаданың Саскачеван велаятының кичи шәхери болан Уокода дүнйә индим. Бизиң машгаламызда еди чага барды: дөрт оглан, үч гыз. Шол себәпли мен яшлыгымдан адамларың арасында яшамагы өврендим.

1930-нҗы йылларда юртда ыкдысады ягдай песе дүшүпди. Бу бизиң машгаламыза-да тәсир этди. Биз гурплы яшамасак-да, гүн-гүзеранымызы гөрйәрдик. Биз сыгыр ве бирнәче товук саклаярдык. Шол себәпли өйде иере юмуртга, сүйт, гаймак, яг, пейнир ялы затлар барды. Бизиң хер биримиз хоҗалык ишлерине өз гошандымызы гошярдык.

Мениң чагалык дөврүмден көп ягшы ятламаларым бар. Меселем, алманың якымлы ысы өйде барк урарды. Хер гүйз паслында какам хоҗалыгымыздан өнйән затлары шәхере сатмага алып гидерди. Өе болса терҗе алмадан долы гуты билен гелерди. Биз гүнде терҗе алма ийип хезил эдердик!

Биз хакыкаты биленимизде, мен алты яшымдадым. Мениң улы агам Җонни дүнйә иненинден соң бирнәче гүн яшап арадан чыкды. Бу ата-энеме агыр ургы болды. Олар руханыдан: «Җонни ниреде?» дийип сорадылар. Шонда руханы бәбегиң сувда чокундырылмандыгы үчин гөге бармандыгыны, онуң җеннет билен довзахың арасында я-да довзахың босагасында дурандыгыны дүшүндирди. Руханы Җонниниң гөге алынмагы ве җеннете дүшмеги үчин өзүне пул төлеселер дога окап берҗекдигини айтды. Сиз шейле ягдайда өзүңизи нәхили дуярдыңыз? Лапыкеч болан какам билен эҗем гайдып рухана йүз тутмадылар. Йөне олар хенизем оглуна нәме боландыгыны билмек ислейәрдилер.

Бир гүн эҗем Ехованың Шаятларының «Өлен адамлар ниреде?» атлы брошюрасыны тапып, оны хөвес билен окады. Какам өе геленде болса эҗем бегенип: «Мен Җонниниң ниредедигини билйәрин! Ол хәзир ятыр, эмма ол бир гүн оянар» дийди. Шол гүн агшам какамам брошюраны долы окап чыкды. Ата-энем Мукаддес Язгылардан өлен адамларың укуда ятандыгыны ве гелеҗекде оларың дирелҗекдигини билип, калбында рахатлык дуйдулар (Ваг. 9:5, 10; Рес. иш. 24:15).

Ата-энемиң хакыкаты билмеги бизе теселли берди, дурмушымызы өзгертди ве багтлы болдук. Олар Ехованың Шаятлары билен Мукаддес Язгылар окувыны гечйәрдилер ве Уокодакы кичиҗик йыгнага барярдылар. Ол ердәки доган-уяларың көпүси украиналыды. Бираз вагтдан какам билен эҗем вагыз эдип башлады.

Соңра биз Канаданың Британ Колумбия велаятына гөчүп гитдик. Ол ердәки доган-уялар бизи мәхирли гаршы алдылар. Бизиң машгаламыз «Гаравул диңини» окап, екшенбе гүни болян йыгнак душушыкларына тайярлык гөрйәрди.  Бу мениң ятдан чыкмаҗак гүнлеримиң бириди. Биз Ехованы ве хакыкаты йүрекден сөййәрдик. Мен дурмушымызың өзгерендигини ве Ехованың берйән берекетлерини гөрйәрдим.

Биз чагакак иманымыз барада адамлара гүррүң бермәге чекинйәрдик. Мен җигим Ева билен бир айың довамында вагыз этҗек теклиплеримизи тайярлап, олары Гуллук душушыгында сахналашдырып гөркезйәрдик. Мен муңа өрән бегенйәрдим! Себәби биз чекинҗеңлик хәсиетимизи еңип, адамлара Мукаддес Язгылар аркалы вагыз этмеги өврендик.

Долы вагтлы гуллук эдйән доган-уялар бизе мыхманчылыга гелйәрдилер. Бу мениң чагалык дөврүмиң иң гызыклы пурсатларыды. Меселем, этрап гөзегчиси Җек Нейтан йыгнага геленде, биз оны мыхман алярдык *. Онуң гүррүң берйән энчеме гызыклы вакалары ве ак йүрекден айдян өвгүли сөзлери мени Ехова вепалы гуллук этмәге хөвеслендирди.

Мен чагакам: «Улаланымда Нейтан доган ялы гуллук эдерин» диердим. Онуң гөрелдесиниң мениң долы вагтлы гуллуга башламагыма гүйчли тәсир эдендигине инди-инди дүшүнйәрин. Мен 15 яшымда Ехова гуллук этмеги йүрегиме дүвдүм. 1942-нҗи йылда Ева икимиз сувда чокундырылдык.

Икинҗи җахан уршы дөврүнде миллетпаразлык гиңден яйрапды. Скотт мугаллым дине гаршы чыкярды. Ол мениң ики гыз доганым билен агамы мекдепден чыкарды. Нәме үчин? Себәби олар байдага тагзым этмекден йүз өврүпдилер. Ханым Скотт мениң мугаллымымы хем ырып, мени мекдепден чыкармак иследи. Эмма мугаллымым оңа: «Бизиң юрдумызда дини сайламак бабатда адамлара эрк-ыгтыяр берлен. Шол себәпли миллетпаразлыгы голдаян чәрелере гатнашмазлыга хер кимиң хакы бар». Скотт нәче җан этсе-де, мугаллымым: «Геп гутарды!» дийип, оңа берк җогап берди.

Скотт мугаллым: «Ёк, энтек гутаранок! Мелитаны мекдепден чыкармасаң, сениң үстүңден арз эдерин» дийип, мугаллыма хайбат атды. Мугаллымым өзүниң нәдогры иш эдйәндигини боюн алып, ата-энеме мени мекдепден чыкармалы болҗакдыгыны дүшүндирди. Ёгсам, ол ишини йитирҗекдигини айтды. Инди биз сапаклары мекдепде дәл-де, өзүмиз өйде окаярдык. Шондан бираз вагт геченсоң, биз яшаян еримизден 32 км узаклыга гөчүп гитдик ве шол ердәки мекдепде окап башладык.

Уруш дөврүнде бизиң эдебиятларымыз гадаган эдилди. Эмма биз өйден-өе вагыз эденимизде Мукаддес Язгылары уланярдык. Шейлеликде, биз Мукаддес Язгылар аркалы Патышалык барадакы хош хабары өкделик билен вагыз этмеги өврендик. Бу болса бизе рухы тайдан өсмәге ве Ехованың голдавыны дуймага көмек этди.

Мен Ева билен мекдеби тамамланымыздан соңра пионер гуллугына башладык. Мен өзүми эклемек үчин, башда азык харытлары сатылян дүканда ишледим. Мен сач беҗермеги говы гөрйәрдим ве сач гыркмагы өвредйән алты айлык окува гирдим. Соңра хепдеде ики гүн гөзеллик салонында ишләп башладым ве айда ики гезек сач гыркмагы өвредйәрдим. Бу маңа долы вагтлы гуллук этмәге көмек эдйәрди.

1955-нҗи йылда мен АБШ-ның Нью-Йорк шәхеринде ве Германияның Нюрнберг шәхеринде гечирилҗек «Дабаралы Патышалык»  атлы конгреслере бармагы максат эдиндим. Мен Нью-Йорка гитмезден өң Баш эдарамызда гуллук эдйән Нейтан Норр доган билен танышдым. Ол аялы билен Канаданың Ванкувер шәхеринде гечирилйән конгресе гелди. Шонда Норр доганың аялының сачыны беҗермеги менден хайыш этдилер. Норр догана мениң сач беҗеришим ярапдыр. Ол мениң билен таншанда, мен Германия гитмезимден өңүрти Нью-Йорк шәхерине-де барҗакдыгымы айтдым. Норр доган мени Бруклиндәки Бейтелде 9 гүн ишлемәге чагырды.

Бу сыяхат мениң дурмушымы өзгертди. Нью-Йорк шәхеринде мен Теодор (Тэд) Ярач билен танышдым. Бираз вагтдан соң бу яш йигит менден: «Сен пионер болуп гуллук эдйәрмиң?» дийип сорады. Мен бу сорага гарашмансоң «Ёк» дийип җогап бердим. Эмма Лавонн җорам: «Хава, ол пионер болуп гуллук эдйәр» дийип, сөзүми бөлди. Тэд гең галып, Лавонна: «Инди мен киме ынанмалы?!» дийди. Мен оңа пионер болуп гуллук эдендигими ве конгресден соң ене-де пионер гуллугына башлаҗакдыгымы айтдым.

1925-нҗи йылда Тэд АБШ-ның Кентукки шәхеринде дүнйә инйәр. Онуң машгала агзаларының хич бири хакыкаты кабул этмәндир. Муңа гарамаздан, ол 15 яшында Ехова өзүни багыш эдип, сувда чокундырыляр ве ики йылдан соңра пионер гуллугына башлаяр. Шейдип, онуң 67 йыл долы вагтлы гуллугының биринҗи тарыхы сахыпасы ачыляр.

1946-нҗы йылың июль айында Тэд Гилеад мекдебиниң 7-нҗи класыны тамамлаяр. Шонда ол 20 яшындады. Соңра ол Огайо штатының Кливленд шәхеринде этрап гөзегчиси болуп гуллук эдйәр. Дөрт йыл геченсоң оны Австралиядакы филиала гөзегчи эдип беллейәрлер.

Германияның Нюрнберг шәхеринде гечирилйән конгресде мен Тэд билен хас якындан танышдым. Шейдип, биз бири-биримизи халадык. Тэд Ехова бүтин җаны-тени билен гуллук этмек ислейәрди. Мен муңа бегенйәрдим. Ол максада окгунлы, Худая вепалы, аграс, алчак ве мәхирлиди. Мен онуң башгалары өзүнден ёкары тутяндыгына үнс бердим. Конгресден соңра Тэд Австралия гитди, мен болса Ванкувере гайтдым. Эмма биз хат аркалы хабарлашып дурярдык.

Тэд Австралияда бәш йыл гуллук эденден соңра Америка гелди ве Ванкуверде пионер болуп гуллук эдип башлады. Ол мениң машгаламың гөвнүне ярады. Мен муңа өрән бегендим. Агам Майкл хемише мениң аладамы эдйәрди. Бир яш доган мениң билен гызыкланса, ол биынҗалык болярды. Эмма Тэд Майклың гөвнүне ярады. Агам: «Мелита, ол өрән акыллы йигит. Онуң билен дост бол, гөвнүне дегмегин» дийди.

Менем Тэди халадым. Биз 1956-нҗы йылың 10-нҗы декабрында той тутдык. Биз Ванкуверде ве Калифорнияда пионер болуп гуллук этдик. Соңра Тэди Миссуриде ве Арканзасда этрап гөзегчиси эдип белледилер. Биз 18 йылың довамында Американың көп ерлеринде гуллук эдип, хер хепде дүрли-дүрли ерлерде яшаярдык. Шонда энчеме гызыклы вакалар болды ве биз көп доган-уялар билен достлашдык. Бизе гөчүп-гонуп йөрмек аңсат болмаса-да, гуллук этмекден леззет алярдык.

Мен Тэдиң Ехова билен достлуклы гатнашыгыны гыммат сайяндыгыны гөремде, оңа хас-да хормат гойярдым. Ол әлемиң иң Бейик Шахсыетине гуллук эдйәндигине гуванярды. Биз Мукаддес Язгылары биле окамагы ве өвренмеги говы гөрйәрдик. Агшам ятмаздан өң Тэд дога эденде, икимизем дыза чөкйәрдик. Соңра херимиз  айратын Ехова өз йүрегимизи дөкүп, дога эдйәрдик. Мен Тэдиң бир зады гайгы эдйәндигини деррев дуйярдым, себәби ол ятан еринден туруп, дыза чөкүп көп дога окаярды. Мен онуң улы ве уҗыпсыз меселелер барада Ехова дога эдйәндигини гыммат сайярдым.

Тэд той тутанымыздан бирнәче йыл геченинден соңра Ятлама агшамында нышанлардан датҗакдыгыны айтды. Ол: «Мен Ехованың ислегини долы ерине етирйәндигиме гөз етирмек үчин көп дога этдим» дийди. Мен онуң мукаддес рух аркалы месх эдилендигине ве гөге гитҗекдигине кән бир гең галмадым. Мен янёлдашымы, ягны Месихиң доганыны голдамага мүмкинчилигимиң боланына бегенйәрин (Мат. 25:35—40).

1974-нҗи йылда Тэд Ехованың Шаятларының Ёлбашчылык маслахатының агзасы болмага чагырылды. Биз муңа хайран галдык. Бираз вагтдан бизи Бруклиндәки Бейтелде гуллук этмәге чагырдылар. Тэд Ёлбашчылык маслахатының агзасы болуп гуллук эдйәрди, мен болса тәмизчи болуп ишлейәрдим хем-де доган-уяларың сачыны беҗерйәрдим.

Тэд дүрли филиаллара барып, доган-уялары рухландырярды. Ол, эсасанам, Демир галаның аркасындакы юртларың вагыз ишине гөзегчилик эдйәрди. Бир гезек биз Швеция дынч алмага гиденимизде өрән ядавдык. Шонда Тэд: «Мелита, Польшада вагыз иши гадаган эдилипдир. Мен доган-уялара гөвүнлик бересим гелйәр» дийди. Биз виза ачып, Польша гитдик. Тэд җогапкәр доганлар билен душушып гүррүңдеш боланда, хич кимиң билмезлиги үчин даш ере гитдилер. Олар дөрт гүнләп йыгы-йыгыдан душушдылар. Мен Тэдиң доган-уялара голдав бермекден шатлык тапяндыгыны гөрүп, өз янымдан бегенйәрдим.

1977-нҗи йылың ноябрь айында биз ене-де Польша гитдик. Ф. В. Франц, Дэниел Сидлик ве Тэд Ёлбашчылык маслахатының векиллери хөкмүнде филиала гелдилер. Бизиң ишимиз гадаган эдилсе-де, Ёлбашчылык маслахатының үч агзасы дүрли шәхерлерде яшаян гөзегчилердир пионерлер ве көп вагтдан бәри гуллук эдйән вагызчылар билен гүррүңдеш болдулар.

Соңкы йыл Тэд билен Милтон Хеншель Польша гидип, Ехованың Шаятларының вагыз ишине гаршы чыкмаян хәкимиет ишгәрлери билен душушдылар. 1982-нҗи йылда Польшаның хәкимиети доганлара бир гүнлик конгреси гечирмәге ругсат берди. Бир йыл геченден соңра, биз башга конгреслери гечирмек үчин кирейине ер алдык. Вагыз этмеклик гадаган болса-да, биз 1985-нҗи йылда стадионда дөрт саны конгрес гечирдик. Соңра 1989-нҗы йылың май айында биз хас-да улы конгреслери гечирмәге тайярлык гөренимизде, Польшаның хәкимиети  Ехованың Шаятларының вагыз ишини кануны тайдан ресмилешдирди. Тэд хич хачан шейле бегенмәнди.

Биз 2007-нҗи йылда Гүнорта Африкада тәзе филиалың ачылышына гитмелидик. Эмма Англиядакак Тэдиң ган басышы ёкарланды ве лукман Африка гитмезлиги маслахат берди. Тэдиң ягдайы говулашансоң, биз Америка доландык. Бирнәче хепдеден соң Тэдиң бейнисине ган инип (инсульт), бедениниң саг тарапы ысмаз болды.

Тэд башда ишләп билмейәрди, йөне кем-кемден сагалярды. Ол ысмаз болса-да, гепләп билйәрди. Биз муңа өрән бегенйәрдик. Ол өңкүси ялы ишлемәге җан эдйәрди, хатда өйде телефон аркалы Ёлбашчылык маслахатының душушыгына гатнашярды.

Тэд Бейтелде говы беҗерги берленине миннетдарды. Ол кем-кемден херекет эдип башлады ве йыгнакдакы кәбир борчлары ерине етирип, хемише шадыян болмага чалышярды.

Үч йыл геченден соңра онуң бейнисине ене-де ган инди. 2010-нҗы йылың 9-нҗы июнында чаршенбе гүни арадан чыкды. Мен Тэдиң гөге гитҗекдигини билсем-де, онуң өлүми маңа агыр дегди ве оны ненеңси күйсейәндигими сөз билен айдып билмейәрин. Мен Тэди голдамага Ехованың гүйч берендигине хер гүн догамда саг болсун айдярын. Биз 53 йыллап шатлык билен долы вагтлы гуллук этдик. Тэд маңа гөкдәки Атам билен достлугымы беркитмәге көмек этди. Мунуң үчин мен Ехова шүкүр эдйәрин. Мен Тэдиң тәзе борҗы хөвес билен ерине етирйәндигине шүбхеленмейәрин.

Мен янёлдашым билен энчеме йыллап шатлык билен гуллук этдим. Эмма инди маңа кынчылыклара дөз гелмек аңсат дәл. Маңа Тэд билен Бейтеле ве Патышалык залына гелйән адамлары гаршы алмак дийсең яраярды. Йөне инди мениң сөвер ярым ёк, мен өңким ялы гуҗур-гайратлы дәл ве адамлар билен кән гөршүп билмейәрин. Муңа гарамаздан, мен Бейтелдәки ве йыгнакдакы мәхрибан доган-уялар билен болмагы говы гөрйәрин. Бейтелде гуллук этмек аңсат болмаса-да, Аллатагаланың өйүнде хызмат этмек шатлык гетирйәр. Мениң хенизем вагыз ишине болан сөйгим совамады. Мен чалт ядасам-да, узак ёл йөрәп билмесем-де, вагыз этмекден ве Мукаддес Язгылар окувыны гечирмекден көп шатлык тапярын.

Ер йүзүнде болян эрбетлиги гөренимде, мәхрибан янёлдашым билен Ехова гуллук эдендигиме бегенйәрин. Хава, Ехованың берекетлери мени багтлы эдйәр (Сүл. тым. 10:22).