1, 2. Ехова нәдип сөймеги өвредйәр?

КАКАСЫ говы гөрелде гөркезип, чагасына тербие берйәр. Ол чагасына сөйги билдирмек билен, оңа сөймеги өвредйәр. Гөкдәки Атамыз Ехова ялы бизи хич ким сөййән дәлдир. Биз Еховадан сөймеги өвренйәрис, «чүнки өңинчә Ол бизи сөйди» (1 Яхя 4:19).

² Ехованың «өңинчә... бизи сөендиги» нәмеден гөрүнйәр? Павлус ресул: «Худай бизе болан сөйгүсини, биз энтек гүнәкәркәк, Месихиң бизиң угрумызда өлмеги билен гөркезди» диййәр (Рим. 5:8). Ехова Өзүне иман эдйән адамларың халас болмагы үчин Оглуны төлег хөкмүнде берди. Шейдип, ол хакыкы сөйгини гөркезди. Сөйги өз пейдасына чапмаяр, җаныны аямаяр ве бермәге тайын боляр. Аллатагала рехимдарлык билдирип, төлег гурбаныны берди. Шол себәпли бизем оңа якынлашярыс ве сөйгимизи билдирйәрис (1 Яхя 4:10).

3, 4. Бизиң Аллатагала болан сөйгимиз нәмеден гөрүнйәр?

³ Сөйги — Ехованың эсасы хәсиети. Иса Худайың илкинҗи табшырыгы барада шейле дийди: «Өз Худайың Ребби бүтин йүрегиң, бүтин җаның, бүтин дүшүнҗәң, бүтин гүйҗүң билен сөй!» (Мар. 12:30). Ехова бизиң оны «бүтин йүрегимиз» билен сөймегимизи ислейәр. Эгер биз кимдир бирини я-да нәмедир бир зады Еховадан артык сөйсек, оны гынандырарыс. Йөне бизиң Ехова болан сөйгимиз диңе бир дуйга эсасланман, эйсем, оны «бүтин дүшүнҗәмиз» ве «бүтин гүйҗүмиз билен» сөймели. Хава, бизиң Ехова болан сөйгимиз сөзде ве иш йүзүнде гөрүнмели (Мика 6:8-и окаң) *.

⁴ Бизиң гөкдәки Атамыза болан сөйгимизи ене-де нәмеден гөрсе боляр? Биз Ехованы чәксиз сөймели. Исаның сөзлеринден гөрнүши ялы, биз Ехованы сөймек үчин беден, дуйгы ве рухы тайдан тагалла этмели. Гечен макалада Ехованың перзентлерине болан сөйгүсиниң дөрт айратынлыгы барада гүррүң этдик. Гелиң, хәзир Ехова болан сөйгимизиң нәмеден гөрүнйәндиги ве бу сөйгини артдырмага нәмәниң көмек эдйәндигини билелиң.

5. Биз Ехованың эдйән аладасына нәхили гарамалы?

⁵ Сиз совгат берен адама саг бол айдярсыңызмы? Эгер совгады гыммат сайсаңыз, оны аявлы сакларсыңыз герек. Якуп ресул: «Әхли оңат, кәмил совгат ёкардан, нурлар Атасындан инйәндир; Онда не үйтгеме, не-де чалшык көлегеси бардыр» дийди (Якуп 1:17). Ехова герекли затлар билен үпҗүн эдип, бизиң багтлы яшамагымызы ислейәр. Шейле совгатлар үчин Худая миннетдар болмалы дәлми нәме?!

6. Ысрайыллылар Ехованың берекедини алмак үчин нәме этмелидилер?

⁶ Ехова ысрайыллылара энчеме берекетлери берди. Ол йүзлерче йылың довамында халкына канун ве гөркезме берип, олары герекли затлары билен үпҗүн эдйәрди (Кан. таг. 4:7, 8). Ысрайыллылар Аллатагаланың канунына гулак асып, миннетдардыгыны гөркезйәрдилер. Меселем, олар «ерлеринден өнен илкинҗи мивелерини» Ехова садака хөкмүнде бермелидилер (Мүс. чык. 23:19). Олар Ехова гулак асып, иң говы задыны оңа берселер, берекет алҗакдыкларыны билйәрдилер (Канун таглыматы 8:7—11-нҗи аятлары окаң) *.

7. Биз Худая гымматлы задымызы берип сөйгимизи нәдип гөркезйәрис?

⁷ Биз барада нәме дийсе болар? Элбетде, шу гүнлер биз гөни маныда гурбанлык бермейәрис. Эмма биз Аллатагала иң гымматлы задымызы берип, оны хорматлаяндыгымызы ве сөййәндигимизи гөркезип билерис (Сүл. тым. 3:9). Нәдип? Меселем, яшаян еримизде ве бүтин дүнйәде алнып барылян Патышалык ишлерини серишдәмиз билен голдап билерис. Биз аз зат берсек-де, көп зат берсек-де, Ехованы йүрекден сөййәндигимизи гөркезйәрис (2 Кор. 8:12). Эмма биз Ехова болан сөйгимизи башга затлар аркалы хем гөркезип билйәрис.

8, 9. Аллатагала нәдип бил багламалы? Мысал гетириң.

 ⁸ Иса шәгиртлерине Патышалыгы биринҗи орунда гоймалыдыгыны ве иймитиң, эгин-эшигиң ченденаша аладасыны этмели дәлдигини өвретди. Себәби гөкдәки Атамыз бизе герекли затлар билен үпҗүн этҗекдигини вада берди (Мат. 6:31—33). Биз Ехованың вадасыны берҗай этҗекдигине ынанярыс ве Оңа бил баглаярыс. Элбетде, сиз бирини йүрекден сөйсеңиз, оңа ынанярсыңыз. Биз Ехова нәче көп бил багласак, шонча-да оңа болан сөйгимиз артар (Зеб. 143:8). Хер бир адам өзүне шейле сораглары берип билер: «Мениң максатларымдан ве өзүми алып баршымдан Ехова бил баглаяндыгым гөрүнйәрми? Мен хер гүн Худайың аладамы эдйәндигине ынанярынмы? Муны иш йүзүнде гөкезйәринми?»

⁹ Майк атлы месихчи хакыкы сөйгини билдирип, Худая бил баглаяр. Майк яшлыкдан дашары юртда вагыз этмеги максат эдинипди. Ол ики чаганың какасы болса-да, максадындан эл үзмейәрди. Майк машгаласы билен вагызчыларың етмейән ерлеринде гуллук эдйән доган-уялар барадакы макалалары окап, сада яшамалы диен карара гелйәр. Олар улы җайыны сатып, кичеңрәк җай аляр. Майк тәмизлейҗи хусусы кәрханасының ишини азалдяр ве оны Интернет аркалы дашары юртдан нәдип доландырып боляндыгыны өвренйәр. Шейлеликде, олар дашары юрда гөчүп, шатлык билен гуллук эдйәрлер. Мундан ики йыл геченден соң Майк: «Биз Исаның Матта 6:33-де айдан сөзлериниң хакдыгына гөз етирдик!» диййәр.

10. Давут патышадан гөрелде алып, Ехова барада ойланмагың нәме пейдасы бар?

¹⁰ Үч мүң йыл мундан озал Давут патыша асмана сын эдип: «Гөклер Худайың шөхратыны ыглан эдйәр, гөк гүммези Онуң эллериниң ишинден хабар берйәр» дийип язды. Ол Худайың канунларына гең галып: «Реббиң кануны кәмилдир, ол җаны тәзелейәндир. Реббиң шаятлыгы ыгтыбарлыдыр, ол мөн адамы хем акылдар эдйәндир» дийди. Давудың бу затлар барада ойланмагы Ехова билен достлугыны беркитди ве оңа болан сөйгүсини артдырды. Ол: «Агзымың сөзлери, йүрегимиң ой-пикирлери Сениң гөвнүңден турсун, я Реб, мениң Гаям, Халасгәрим» дийди (Зеб. 19:1, 7, 14).

11. Аллатагаланың берйән билими нәме этмәге хөвеслендирйәр? (Макаланың башындакы сурата середиң).

¹¹ Шу гүнлер Ехова бизе өзүни танадып, ниетини аян эдйәр ве ярадан затлары, Сөзи барада өвредйәр. Бу дүнйә ёкары билим алмагы ве везипе газанмагы өңе сүрйәр. Эмма шейле максатлар көпленч Худая болан сөйгиңи ве иманыңы говшадяр. Мукаддес Язгылар болса билимден гайры, акылдарлык ве дүшүнҗе газанмагы үндейәр. Ехова бизиң өвренен затларымызы догры уланмагымыза ве адамлара көмек этмегимизе гарашяр (Сүл. тым. 4:5—7). Худай «бүтин адамларың гутулмагыны, хакыкат билимине етмегини ислейәр» (1 Тим. 2:4). Биз Патышалык барадакы хош хабары гүррүң берип, Ехованың адамзат бабатдакы ниетине дүшүнмәге көмек этсек, Аллатагала болан сөйгимизи гөркезйәрис (Зебур 66:16, 17-нҗи аятлары окаң).

12. Яш уя Ехованың берен совгадына нәдип миннетдарлыгыны билдирди?

¹² Яшлар хем Ехованың өвредйән затлары барада ойланып, оңа болан сөйгүсини гөркезип билерлер. Шеннон 11 яшындака 10 яшлы уясы ве ата-энеси билен «Худая вепалы болалың!» атлы велаят конгресине гатнашды.  Шонда яшлардан йөрите белленен ерде отурмагы хайыш этдилер. Шеннон бираз толгунса-да, гөркезилен ерде отурды. Оларың хер бирине «Яшларың соваллары» атлы овадан китап берилди. Шеннон муңа өрән бегенди. Шонда ол Ехова Худай барада нәме пикир этдикә? Шеннон шейле диййәр: «Инди мен Ехованың хак Худайдыгына ве мени бичак сөййәндигине долы гөз етирдим. Мен бейик Ехова Худайымызың шейле аҗайып ве овадан совгатлары берйәндигине өрән миннетдар».

13, 14. Ехованың берйән маслахатларына нәхили гарамалы ве нәме үчин?

¹³ Мукаддес Язгыларда: «Ата халаян оглуны нәхили тербиелейән болса, Реб хем сөййәнини тербиелейәндир» дийилйәр (Сүл. тым. 3:12). Биз Худайың берйән тербиесине нәхили гарамалы? Павлус ресул: «Хер хили тербие эдилмек өңүрти шатлыклы зат дәл-де, гайгылы зат болуп гөрүнйәндир» дийди. Ол тербие бермек эрбет я-да ваҗып дәл дийҗек болмады. Себәби ол: «Бу соңра шейле етишдириленлер үчин догрулыгың дынчлык мивесини өндүрйәндир» дийип, сөзүни довам этди (Евр. 12:11). Биз Ехованы сөййән болсак маслахатыны хөвес билен кабул эдерис ве нәгиле болмарыс. Биз Ехованы сөййәндигимиз үчин оңа гулак асып, герекли өзгеришлер эдерис.

¹⁴ Малакы пыгамбериң яшан дөврүнде ехудыларың көпүси Аллатагала гулак асмаярдылар. Оларың берен гурбанлыгы Худайың гөвнүнден турмаярды. Шол себәпли Ехова олара берк табшырык берди (Малакы 1:12, 13-нҗи аятлары окаң) *. Мунуң нетиҗеси нәхили болды? Ехова олара: «Мен сизиң үстүңизе нәлет иберерин ве алкышларыңызы нәлете өврерин. Мен олары  эййәм нәлетледим, себәби сиз муны йүрекден ислемедиңиз» дийди (Мал. 2:1, 2). Бизем Ехованың сөйги билен берйән маслахатларыны билгешлейин әсгермезлик этсек, онуң билен достлуклы гатнашыгымыз бозулар.

15. Биз нәхили гарайышдан гача дурмалы?

¹⁵ Шу гүнлер көп адамлар текепбир ве диңе өзүни билип яшаярлар. Шол себәпли олар маслахаты ве тербийәни асла кабул этмейәрлер. Кәбирлери болса гөвүнли-гөвүнсиз диңлейәрлер. Месихчилер «бу дүнйә меңзеш болман», «Худайың... кәмил ислегине» гөрә яшамага җан эдйәрлер (Рим. 12:2). Ехова гурамасы аркалы бизе башга җынсдакы адамлар билен гатнашмак, дост-ярлары сайламак ве дынч алмак ялы меселелерде вагтлы-вагтында маслахат берйәр. Биз гөркезмәни кабул этсек ве оңа эерсек, Ехова миннетдар болуп, оны сөййәндигимизи субут эдерис (Яхя 14:31; Рим. 6:17).

16, 17. а) Биз нәме үчин Ехованың ислегине гөрә карара гелмели? б) Ысрайыллыларың Ехованы сөймейәндиги ве оңа бил багламаяндыгы нәмеден гөрүнйәр?

¹⁶ Чага ховп абананда ата-энесинден пена гөзлейәр. Хатда улы адамлар хем ата-энесинден маслахат сораярлар. Оларың өзлери карара гелип билселер-де, ата-энесиниң хас говы маслахат берҗекдигини билйәрлер. Гөкдәки Атамыз Ехова бизе карара гелмәге мүмкинчилик берйәр. Йөне биз оны сөййәндигимиз ве оңа бил баглаяндыгымыз үчин карара гелмезимизден өңүрти ондан көмек сорап, пикирини билмәге җан эдйәрис. Ол болса бизе мукаддес рухуны берип, догры карара гелмәге көмек эдйәр (Флп. 2:13).

¹⁷ Шамувелиң яшан дөврүнде ысрайыллылар пилиштлилер билен сөвешде еңилдилер. Ысрайыллылар көмеге ве горага мәтәчдилер. Олар нәме этдилер? Ысрайыллылар: «Гелиң, Реббиң Әхт сандыгыны Шилодан шу ере алып гелелиң. Гой, ол бизиң арамызда болуп, бизи душманың элинден халас этсин» дийдилер. Нетиҗеде, «улы гыргынчылык болды, ысрайыллыларың отуз мүң пыяда эсгерини өлдүрдилер. Худайың сандыгы элден гитди» (1 Шам. 4:2—4, 10, 11). Ысрайыллылар Әхт сандыгыны янлары билен алып, Ехованың горамагыны ве халас этмегини иследилер. Эмма олар Еховадан көмек сорамадылар, онуң пикирини хем билмек ислемедилер. Олар өз назарында догры гөрүнйән затлары эдип, көп эҗир чекдилер (Сүлейманың тымсаллары 14:12-ни окаң).

18. Мукаддес Язгыларда Ехова бил багламак бабатда нәме дийилйәр?

¹⁸ Мезмурчы: «Худая умыт баглаярын, чүнки гутарышы үчин мен Оңа ене шүкүр эдерин. Эй Худайым, мениң җаным ичимде суссупес, мунуң үчин мен Сени... ятлаярын» дийип, өзүниң догры гарайышдадыгыны гөркезди (Зеб. 42:5, 6). Гөр, нәхили чуңңур сөйги! Сизем гөкдәки Атамызы сөйүп, оңа бил баглаярсыңызмы? Эгер шейле болса, дурмушың әхли ягдайларында Оңа бил багламага җан эдиң. Себәби Мукаддес Язгыларда: «Реббе бүтин йүрегиң билен бил багла, өз дүшүнҗәңе даянма. Бүтин ёлларыңда оны тана, Ол хем сениң ёдаларыңы догрулар» дийилйәр (Сүл. тым. 3:5, 6).

19. Сиз Ехованы сөййәндигиңизи нәдип гөркезйәрсиңиз?

¹⁹ Ехова өңүрти бизи сөймек билен, бизе өзүни сөймеги өвретди. Гелиң, онуң сөйгүси ве эллериниң иши барада хемише ойланалың! Шонда биз Ехованы бүтин йүрегимиз, җанымыз, дүшүнҗәмиз ве гүйҗүмиз билен сөйүп билерис (Мар. 12:30).