1, 2. Ынсан бейниси хайванларыңкыдан нәмеде тапавутланяр?

ЫНСАН бейниси бедениң тәсин агзасыдыр. Меселем, адамларың дил өвренмәге укыбы бар. Бу бизе окамага, язмага, геплемәге ве эшиден затларымыза дүшүнмәге көмек эдйәр. Шейле-де хайванлардан тапавутлылыкда, биз Ехова дога эдип, оны өвгүли айдымлар билен шөхратландырып билйәрис. Алымлар ынсан бейнисиниң шейле аҗайып ишлери нәдип эдип билйәндигине долы дүшүнип билмейәрлер.

² Дил — Ехованың берен аҗайып совгады (Зеб. 139:14; Ылх. 4:11). Худай бизиң бейнимизи тәсин эдип яратды. Хайванлардан тапавутлылыкда, биз «Худайың кешбинде» ярадылдык. Бизиң сайламага мүмкинчилигимиз бар, себәби Худай бизи эркин эдип яратды. Шонуң үчин биз геплемек укыбымызы уланып, Ехованы шөхратландырып билйәрис (Гел. чык. 1:27).

3. Ехова бизе пайхаслы болар ялы нәхили тәсин совгат берди?

³ Ехова адамлара Мукаддес Язгылары совгат берди. Бу тәсин совгат аркалы диллери ярадан Худайы шөхратландырып билйәрис. Мукаддес Язгылар тутушлыгына я-да онуң кәбир китаплары 2 800-ден говрак дилде бар. Биз Мукаддес Язгыларда айдылан затлар барада ойлансак, Худайыңкы ялы пикир эдип башларыс (Зеб. 40:5; 92:5;  139:17). Бу болса бизе пайхаслы болуп, гелеҗекде халас болмага көмек эдер (2 Тимотеос 3:14—17-нҗи аятлары окаң).

4. Ойланмак нәмәни аңладяр ве биз хайсы сораглара середерис?

⁴ Ойланмаклык бу бир зада үнсүңи җемләп, шол хакда пикирленмеги ве ягшы билен яманы кесгитлемеги аңладяр (Зеб. 77:12; Сүл. тым. 24:1, 2). Эсасан-да, Ехова ве Иса хакда өвренйән затларымыз барада ойланмаклык хас көп пейда берйәр (Яхя 17:3). Эйсем, окамак билен ойланмагың нәхили багланышыгы бар? Хачан ойлансак говы болар? Ойланмакдан шатлык тапмага ве оны эндик эдинмәге нәме көмек эдер?

5, 6. Окан затларымыза дүшүнмәге ве ятда сакламага нәме көмек эдер?

⁵ Үнс берен болсаңыз, кәте биз кәбир затлары этмек үчин ончаклы тагалла этмейәрис. Меселем, дем алмак, йөремек я-да велосипед сүрмек ялы затлары ойланман эдйәрис. Окамаклык барада-да шейле дийсе боляр. Шол себәпли окаян затларың манысына үнсүңи гөнүкдирмек өрән ваҗып. Меселем, бир эдебиятың абзацыны я-да сөзбашысыны оканымыздан соң, бираз сәгинип, окан задымыз хакда ойланмалы ве оңа догры дүшүнендигимизе гөз етирмели. Элбетде, үнсүмизи совян затлара ёл берсек, шахсы окувымыз нетиҗесиз болар. Биз мундан нәдип гача дуруп билерис?

⁶ Алымларың айтмагына гөрә, бир зады сесли окасак, оны ятда сакламак аңсат боляр. Муны бейнимизи ярадан Худай хем говы билйәр. Ине, шол себәпли-де ол Ешува Кануны «сесли», ягны юваш сес билен окамагы табшырды (Ешува 1:8-и окаң) *. Шейле-де Мукаддес Язгылары сесли окамаклык үнсүмизи хас говы җемлемәге ве окан затларымызы ятда сакламага көмек эдйәр.

7. Мукаддес Язгыларда айдылан затлар хакында хачан ойланмак пейдалы? (Макаланың башындакы сурата середиң).

⁷ Окан задыңыз хакда ойланмак ве үнсүңи җемлемек үчин тагалла этмели. Башгача айданыңда, ядав дәл вагтымыз ве үнсүмиз бөлүнмейән ерде окасак, хас говы ойланмага көмек эдер. Мезмурчы хем гиҗелерине ойланмага вагт сарп эдйәрди (Зеб. 63:6). Иса кәмил болса-да, ойланмак ве дога этмек үчин үмсүм ери сайлаярды (Лука 6:12).

8. а) Биз нәме хакда ойланып билерис? б) Ехова барада башгалара гүррүң беренимизде, ол муңа нәхили гараяр?

⁸ Биз диңе бир Мукаддес Язгыларда окан затларымыз дәл-де, эйсем, башга затлар барада-да ойланып билерис. Меселем, Ехованың ярадан аҗайып затларыны гөренимизде, бираз сәгинип, ойланмак үчин вагт сарп эдип билерис. Шейле ойланмаклык бизе Ехова догада миннетдарлык билдирмәге хөвеслендирер. Белки-де, сиз дуйгуларыңызы башгалар билен пайлашмак исләрсиңиз (Зеб. 104:24; Рес. иш. 14:17). Биз Ехова барада ойлананымызда, догада миннетдарлык билдиренимизде ве ол хакда адамлара гүррүң беренимизде, бу оңа нәхили тәсир эдйәр? Мукаддес Язгыларда  шейле дийилйәр: «Ребден горкянлар бири-бирилери билен геплешдилер. Реб үнс берип диңледи. Ребден горкуп, адына хормат гойянлар (ады барада ойланянлар, ТД) хакында Онуң өңүнде бир ятлама китабы язылды» (Мал. 3:16).

9. а) Павлус ойланмак бабатда Тимотеоса нәме маслахат берди? б) Вагза тайярлананымызда нәме хакда ойланып билерис?

⁹ Павлус ресул Тимотеоса геплейши, өзүни алып баршы ве башгалара өвредиши хакда ойланмагы маслахат берди (1 Тимотеос 4:12—16-нҗы аятлары окаң). Бизем Тимотеос ялы рухы затлар барада ойланып билерис. Меселем, Мукаддес Язгылар окувыны гечирмәге тайярлананымызда, ойланмак үчин вагт сарп этмек ваҗып. Гызыкланян адам барада пикирленип, оңа рухы тайдан өсмәге көмек этҗек сораглары я-да айдың мысаллары тапмага чалышмалы. Шейтсек, иманымызы беркидерис ве Мукаддес Язгыларың өкде хем-де ыхласлы мугаллымы боларыс. Вагза гитмезден өң хем ойлансак пейдалы болар (Эзра 7:10-ны окаң) *. Эгер биз Ресулларың ишлери китабындан бир бабы окасак, бу бизе «алан совгадымызы янып дуран от кимин ловурдатмага», ягны хас ыхласлы вагыз этмәге көмек эдер. Шейле-де гүнүң довамында уланҗак аятларымызы ве адамлара хөдүрлеҗек эдебиятларымыз хакда ойланып билерис (2 Тим. 1:6). Мейданчаңызда яшаян адамлар ве олары гызыкландырмак үчин нәме айтҗакдыгыңыз барада ойланың. Сиз шейле тайярлык гөрсеңиз, Мукаддес Язгылар аркалы өкделик билен вагыз эдип билерсиңиз (1 Кор. 2:4).

10. Биз нәхили оңат затлар хакда ойланып билерис?

 ¹⁰ Биз ене-де нәме барада ойланып билерис? Эгер җемагат нутукларында ве конгреслерде айдылян пикирлери беллик эдйән болсаңыз, олары гайталамак үчин вагт тапың. Шонда өзүңизе шейле сораг берип билерсиңиз: «Мен Мукаддес Язгылардан ве Худайың гурамасы хакда нәмелери билдим?» Шейле-де хер ай чыкян «Гаравул диңи» ве «Ояның!» журналларындакы маглуматлар ве иң соңкы гечирилен конгресде айдылан пикирлер барада ойланып билерсиңиз. «Йыллык» китабындан бир ваканы оканыңыздан соң, бираз сәгинип, йүрегиңизе тәсир эдер ялы, ол хакда ойланың. Белки-де, сиз эдебиятларымызы оканыңызда, эсасы пикирлериң ашагыны чызмак я беллемек исләрсиңиз. Беллән пикирлериңиз сизе икиленч идеге, чопанчылык идеглерине я-да нутук билен чыкыш этмәге тайярлананыңызда көмек эдер. Иң ваҗыбы болса, бираз сәгинип, окан задыңызың үстүнде ойлансаңыз, йүрегиңизе тәсир эдер ве өвренен оңат затларыңыз үчин Ехова догада миннетдарлык билдирмәге хөвеслендирер.

11. Биз нәме барада ойланмалы ве бу нәме үчин ваҗып? (Чыкгыда середиң).

¹¹ Элбетде, Мукаддес Язгыларда айдылан затлар хакында ойланмаклык әхли затдан ваҗыпдыр. Айдалы, сизе Мукаддес Язгылары окамагы гадаган этдилер *. Эмма ядыңызда галан ве говы гөрйән аятларыңыз, Патышалык айдымлар хакда ойланмагы хич ким гадаган эдип билмез (Рес. иш. 16:25). Хава, Худайың рухы сизе өвренен затларыңызы ядыңыза салмага көмек эдер (Яхя 14:26).

12. Мукаддес Язгылары хер гүн окамагы нәдип максат эдинип билерсиңиз?

¹² Сиз Мукаддес Язгылары хер гүн окамагы максат эдинип билерсиңизми? Белки-де, сиз хепдәниң белли бир гүнлери «Вагыз мекдеби» душушыгында берилйән Мукаддес Язгыларың кәбир бапларыны окап, оларың үстүнде ойланып билерсиңиз. Башга гүнлер болса, Инҗилиң дөрт китабыны, ягны Матта, Маркус, Лука, Яхя китапларыны окап, Исаның айдан сөзлери ве эден ишлери хакда ойланып билерсиңиз (Рим. 10:17; Евр. 12:2; 1 Пет. 2:21). Шейле-де бизде Исаның дурмушында болуп гечен вакалары беян эдйән эдебиятларымыз бар. Олар сизе Инҗилде окан затларыңыздан хас көп пейда алмага көмек эдер (Яхя 14:6).

13, 14. Хемише рухы затлар хакда ойланмак нәме үчин ваҗып ве муны этмәге нәме хөвеслендирйәр?

¹³ Рухы затлар хакда ойланмаклык рухы тайдан өсен месихчи болмага ве иманыңы беркитмәге көмек эдйәр (Евр. 5:14; 6:1). Ехова хакда ойланмага аз вагт сарп эдйән адам онуң билен достлугыны йитирер, хатда ондан йүз өврүп билер (Евр. 2:1; 3:12). Иса Худайың Сөзүни диңлемесек я-да оны «акйүрекден» кабул этмесек, «миве гетирип» билмеҗекдигимизи дуйдурды. Гайтам, аңсатлык билен яшайшың гайгыларына, байлыгына ве кейпи-сапасына өзүмизи алдырып билерис (Лука 8:14, 15).

¹⁴ Шонуң үчин, гелиң, Мукаддес Язгыларда айдылан затлар хакда ойланмагымызы ве Ехованы хас говы танамагымызы  довам эделиң. Бу бизи онуң хәсиетлеринден гөрелде алмага хөвеслендирер (2 Кор. 3:18). Биз гөкдәки Атамыз хакда хас көп ве хемише билим алып хем-де онуң гөрелдесине эбеди эерип билерис. Бу улы хормат дәлми нәме?! (Ваг. 3:11).

15, 16. а) Мукаддес Язгылар хакда ойланмагың нәхили пейдасы бар?

¹⁵ Рухы затлар барада ойлансак, хакыката болан ыхласымыз артар. Сизиң ыхласыңыз доган-уялары ве вагыз эдйән адамларыңызы рухландырар. Сиз Ехованың Иса Месихиң төлег гурбаны аркалы эден ишлери барада ойлансаңыз, Худай билен достлугыңызы хас-да гыммат саярсыңыз (Рим. 3:24; Якуп 4:8). Гүнорта Африкада яшаян ве иманы үчин 3 йыл түрмеде отуран Марк атлы доганымыз шейле диййәр: «Ойланмаклыгы гызыклы башдан гечирмелер билен деңешдирсе боляр. Рухы затлар хакда нәче көп ойлансак, Худайымыз Ехова хакда шонча-да көп затлар ачылар. Мен кәте гөвнүчөкгүнлиге дүшенимде я-да гелеҗегим хакда алада эденимде, Мукаддес Язгылары элиме алып, ондакы кәбир парчалар барада ойланярын. Шонда калбыма рахатлык аралашяр».

¹⁶ Бизиң яшаян дөврүмизде башагай эдйән затлар шейле көп велин, рухы затлар хакда ойланмага вагт тапмак кәте җуда кын боляр. Африкалы Патрик атлы доганымыз шейле диййәр: «Мен бейними дүрли маглуматдан хырын-дыкын почта меңзедйәрин. Онда герек ве герекмеҗек маглуматларың боландыгы үчин, хер гүн сайлашдырмалы боляр. Шонда көпленч бейнимиң,, аладалардан“ долудыгына гөз етирйәрин. Олары айрар ялы, Ехова дога эдйәрин. Бу затлар көп вагтымы алмаса-да, мен Ехова якынлашяндыгымы дуйярын. Диңе шондан соң рухы затлар барада ойланып башлаярын. Бу аң-дүшүнҗәми хакыката хас чуңңур дүшүнмәге тайярлаяр» (Зеб. 94:19). Хава, Мукаддес Язгылары хер гүн окап, окан затларымыз хакда ойланмагың пейдасы дийсең көп (Рес. иш. 17:11).

17. Сиз ойланмага нәдип вагт тапярсыңыз?

¹⁷ Кәбир адамлар окамак, ойланмак ве дога этмек үчин ирден турярлар. Башгалар болса муны гүнортан аракесме вагты эдйәрлер. Белки, сиз Мукаддес Язгылары агшам я-да ятмаздан өң окамагы хас аматлы гөрйәнсиңиз. Кәбир адамлар Мукаддес Язгылары ирден я-да ятмаздан өң окамагы халаярлар. Шейдип, олар оны «гиҗе-гүндиз», ягны хер гүн окаярлар (Еш. 1:8). Эсасы зат, Худайың Сөзүни окап, ол хакда пикирленип билер ялы, «пурсатдан пейдаланың», ягны вагтыңызы пейдалы уланың (Эфес. 5:15, 16).

18. Мукаддес Язгыларда Худайың Сөзи хакда хер гүн ойланян ве өвренен затлары боюнча яшаян адамлара нәме вада берилйәр?

¹⁸ Мукаддес Язгыларда Ехованың өз Сөзи хакда ойланян ве өвренен затлары боюнча яшамага җан эдйән адамларың әхлисине берекет берҗекдиги вада берилйәр (Зебур 1:1—3-нҗи аятлары окаң). Иса: «Худайың сөзүни эшидип, оны ерине етирйәнлер хас хем багтлыдыр!» дийди (Лука 11:28). Иң эсасы зат болса, Ехованың Сөзүндәки затлар барада хер гүн ойлансак, бу бизе Оны шөхратландырян ишлери этмәге көмек эдер. Шонда Ехова хәзирден бизи багтлы эдип, гелеҗекде болса эбеди яшайыш билен сылаглар (Якуп 1:25; Ылх. 1:3).