1. Ехованың эсасы хәсиети нәме ве сиз муны билип, Худай барада нәхили пикир эдйәрсиңиз?

ЕХОВАНЫҢ ылхамы билен язылан Мукаддес Язгыларда: «Худай сөйгүдир» дийилйәр. Онда сөйгиниң Худайың аҗайып хәсиетлериниң биридиги дәл-де, «Худайың сөйгүдиги» айдыляр (1 Яхя 4:8). Сөйги Худайың иң эсасы хем-де ваҗып хәсиетидир. Ехова бу хәсиете йөне бир эе болман, эйсем, онуң кәмил нусгасыдыр. Әлем-җаханың ве әхли җанлы-җандарларың Ярадыҗысының сөйгүден долы Худайдыгыны билмек, гөр, нәхили аҗайып! Хава, Ехова әхли зады сөйги билен эдйәр.

2. Худайың сөйгүси нәмә ынамымызы беркидйәр? (Макаланың башындакы сурата середиң).

² Ехованың өз ярадан затларына болан гызгын хем-де мәхирли сөйгүси Худайың адамзат бабатдакы ниетлериниң әхлисиниң долы ерине етҗекдигине ве онуң хөкүмдарлыгы астындакы адамлара бол берекетлери берҗекдигине ынамымызы беркидйәр. Мысал үчин, Ехова сөйги билен «бир гүн белледи. Ол Өз сайлан Адамы (Иса Месих) аркалы дүнйәниң үстүнден шол гүнде адыл хөкүм чыкарар»  (Рес. иш. 17:31). Биз мунуң хөкман болҗакдыгына ынанып билерис. Шонда догрулык этмәге җан эдйән ве Худая гулак асян адамлара адыл хөкүм чыкарылар хем-де олар эбеди гелеҗекде эгсилмез берекетлериң эеси болар.

3. Сизиң пикириңизче, Худай адамлары сөймедик болса, дурмуш нәхили боларды?

³ Ойланып гөрүң, эгер Худай адамлары сөймедик болса, онда дурмуш нәхили боларды? Биз диңе бу дүнйәниң залым хем-де гахарҗаң таңрысы Шейтан Иблисиң голы астындакы ынсан хөкүметлериниң элхенч тарыхына сер салмалы болардык (2 Кор. 4:4; 1 Яхя 5:19; Ылхам 12:9, 12-нҗи аятлары окаң). Бу бизе Әлем-җаханда Худайың сөйгүси болмадык болса, гелеҗегиң нәхили айылганч болҗакдыгыны гөркезйәр.

4. Ехова хөкүмдарлыгына гаршы питне турмагына нәме үчин ёл берди?

⁴ Иблис Ехованың хөкүмдарлыгына гаршы питне турзанда, илкинҗи ынсан машгаласыны хем шейле этмәге итерди. Шейтан Худайың Әлемиң үстүнден хөкүм сүрмәге хаклыдыгыны ве онуң хөкүмдарлыгының догрулыгыны шүбхә гойды. Аслында, Иблис өзүниң Ярадыҗыдан хас говы хөкүм сүрҗекдигини айтды (Гел. чык. 3:1—5). Ехова Шейтана сөзүни субут этмәге мүмкинчилик берди, эмма бу вагтлайынды. Ехова бейик акылдарлыгы билен херекет эдип, Худайың хөкүмдарлыгындан башга ислендик хөкүметиң ыгтыбарлы дәлдигини әшгәр этмек үчин етерликли вагт берди. Адамзадың паҗыгалы тарыхы ынсан хөкүметлериниң хем, Шейтаның хем говы хөкүм сүрүп, бизи герекли затлар билен үпҗүн эдип билмейәндигини гөркезйәр.

5. Адамзадың тарыхы нәмәни субут эдйәр?

⁵ Диңе гечен 100 йылың ичинде миллетлер арасындакы урушларда 100 миллиондан говрак адам өлди. Шу гүнлер дүнйәниң ягдайы гитдигиче эрбетлешйәр. Худайың Сөзүнде бу залым дүнйәниң «соңкы гүнлеринде» «эрбет, кеззап адамларың... эрбетликде ене илерлеҗекдиги» өңүнден айдылыпды (2 Тим. 3:1, 13). Тарых Мукаддес Язгыларда айдылан шу сөзлериң хакыкатдыгына шек-шүбхе галдырмады: «Я Реб, мен ынсаның ёлуның өз элинде дәлдигини, догры әдим басмагың ыгтыярында дәлдигини билйәрин» (Ер. 10:23). Хава, Ехова адамлары яраданда, олара Худайдан гарашсыз яшап, дурмушыны өзлери доландырар ялы укып ве ыгтыяр бермеди.

6. Худайың залымлыга вагтлайын ёл бермегиниң нәхили себәби бар?

⁶ Худайың залымлыга вагтлайын ёл бермегиниң ынсан хөкүметлериниң бидерекдигини гөркезмекден башга-да хас әхмиетли себәби бар. Бу элмыдама диңе Худайың хөкүмдарлыгының үстүнликли боляндыгыны тассыклаяр. Эгер Ехова залымлыгы ве онуң себәпкәрлерини ёк эденсоң, кимдир бири Худайың сөйги билен хөкүм сүрйәндигини шүбхә гойса, онда җеделли меселәниң тәзеден орта атылмагына ёл бермек герек болмаз. Худай адамзадың тарыхында болуп гечен вакалара эсасланып, шол питнечилери дессине ёк эдер ве олара зорлук-сүтеми гайтадан дикелтмәге ёл бермез.

7, 8. Ехованың бейик сөйгүси нәмелерде гөрүнйәр?

⁷ Ехованың бейик сөйгүси көп затда гөрүнйәр. Гелиң, Әлем гиңишлигиниң өрән тәсин ярадыландыгына үнс берелиң. Әлем-җаханда миллиардларча галактика болуп, хер галактикада миллиардларча йылдызлар ве планеталар  бар. Меселем, Гүн бизиң Акмаяның ёлы галактикамыздакы йылдызларың бири болуп, онсуз яшайыш шертлериниң кәбири асла мүмкин болмазды. Ярадылан затларың әхлиси Ехованың хак Худайдыгыны хем-де онуң гүйч, акылдарлык ве сөйги ялы хәсиетлерини аян эдйәр. Догрудан-да, Худайың «гөзе гөрүнмейән затлары, ягны эбеди гудраты, Худайлыгы дүнйә дөредиленден бәри ярадылан затлар билен дүшүнилйәр, гөрүлйәр» (Рим. 1:20).

⁸ Ехова ер йүзүндәки затларың әхлисини яшайышдан леззет алмак үчин яратды. Ол ынсанларың эбеди яшамагы үчин, кәмил беден ве аң-дүшүнҗе берип, олары овадан Эрем багында ерлешдирди (Ылхам 4:11-и окаң). Шейле-де Ехова «бүтин адамзада иймит берйәр, чүнки мерхемети эбедидир» (Зеб. 136:25).

9. Сөйгүден долы Худай нәмәни аян эдйәр ве нәме үчин?

⁹ Ехова сөйгүден долы Худай хөкмүнде эрбетлиги йигренйәндигини хем аян эдйәр. Мысал үчин, Зебур 5:4—6-нҗы аятларда Ехова барада: «Сен эрбетлиги халаян Худай дәлсиң... Сен бет иш эдйәнлериң хеммесини йигренйәрсиң... Гана сувсан ве хилегәр адамы Реб неҗис гөрйәндир» дийилйәр.

10, 11. а) Ехова эрбет адамлара нәме эдер? б) Ехова догрулык этмәге чалышян адамлары нәдип сылаглар?

¹⁰ Ехова сөйгүден долы Худайдыгы ве эрбетлиги йигренйәндиги үчин, хөкүмдарлык барадакы җеделли меселе онуң бәхбидине чөзүленсоң, ер йүзүни, шол санда бүтин Әлем-җаханы залымлыкдан арассаламак ислейәр. Худайың Сөзүнде шейле вада берилйәр: «Чүнки яман иш эдйәнлер кесилип ташланар, Реббе умыт баглаянлар болса ери мирас алар. Ене аз-кем сабыр эт, эрбет ёк болар... Реббиң душманлары өрүлериң гөзеллиги кимин сумат болар, түссе кимин сумат болар» (Зеб. 37:9, 10, 20).

¹¹ Шейле-де Мукаддес Язгыларда: «Догры адамлар ери мирас алып, онда эбеди яшар» дийип вада берилйәр (Зеб. 37:29). Догручыл адамлар «бол парахатлыкда хезил эдер» (Зеб. 37:11). Бу затлар хөкман болар, чүнки сөйгүден долы Худайымыз хемише вепалы гуллукчыларының бәхбидине херекет эдйәр. Худайың Сөзүнде: «Ол оларың гөзлеринден әхли яшларыны сүпүрер. Инди не өлүм, не яс, не агы, не-де агыры болар. Чүнки өңки затлар арадан айрылды» дийилйәр (Ылх. 21:4). Ехованың сөйгүсини, хакыкатданам, гыммат сайян ве оңа Хөкүмдары хөкмүнде табын болян адамлара, гөр, нәхили аҗайып гелеҗек гарашяр!

12. Киме «кәмил адам» дийсе болар?

¹² Ехованың Сөзүнде: «Кәмил адамы сынла, гөни адама серет, чүнки бейле адамың соңы парахатлыкдыр. Җенаятчылар болса билеликде ёк эдилер; эрбетлериң соңы кесилип ташланмакдыр» дийилйәр (Зеб. 37:37, 38). «Кәмил адам» Ехованы ве онуң Оглуны танап, Худайың ислегини берҗай эдйәр (Яхя 17:3-и окаң). Ол 1 Яхя 2:17-дәки: «Дүнйә ве онуң хөвеслери гечип гидер, ким Худайың ислегини ерине етирсе, бакы галар» диен сөзлере чынлакай гараяр. Бу дүнйәниң ахырының голайлашяндыгы үчин, Ехова «умыт баглап, Онуң ёлуны сакламак» ваҗыпдыр (Зеб. 37:34).

13. Ехова гүнәли адамлара нәдип бейик сөйгүсини билдирди?

¹³ Биз бикәмиллигимизе гарамаздан, Ехованың «ёлуны саклап» билйәрис.  Шейле-де Ехованың бизе билдирен бейик сөйгүси эсасында онуң билен якындан достлашып билйәрис. Ехова Иса Месихиң төлег гурбаныны бермек билен, Худая гулак асян адамларың Адам атадан мирас галан гүнәден ве өлүмден азат болмагына ёл ачды (Римлилер 5:12; 6:23-нҗи аятлары окаң). Ехова гөкде энчеме асырларың довамында вепалы гуллук эден ялңыз Оглуна долы ынанярды. Элбетде, ер йүзүнде адамлар Иса ёвуз дарашанларында, Ехова сөйгүден долы Ата хөкмүнде гаты гынанды. Эмма Иса Худайың хөкүмдарлыгыны голдап, вепалы галды ве кәмил адамың хас агыр ягдайларда-да айыпсызлыгыны саклап билйәндигини субут этди.

14, 15. Исаның өлүми нәмә ёл ачды?

¹⁴ Догрудан-да, Иса агыр сынагларда айыпсызлыгыны саклады ве Ехованың хөкүмдарлыгыны голдап, өлйәнчә Атасына вепалы галды. Биз Исаның өз җаныны гурбан эдип, адамзады гутармак үчин төлег төләндигине ве Худайың вада эден тәзе дүнйәсинде эбеди яшамагымыза ёл ачандыгына-да дийсең бегенйәрис! Павлус ресул Ехованың хем, Исаның хем бизе бейик сөйги билдирендиги барада шейле дийди: «Хава, биз энтек гүйчсүзкәк, Месих белли вагтда худайсызлар угрунда өлди. Бир догры адам угрунда бириниң өлмеги мүшгүлдир, йөне бир оңат адам угрунда, белки, бири өлмәге йүрек эдер. Худай бизе болан сөйгүсини,  биз энтек гүнәкәркәк, Месихиң бизиң угрумызда өлмеги билен гөркезди» (Рим. 5:6—8). Яхя ресул хем шейле язды: «Бизе Худайың сөйгүси шейле аян болды: бизиң Ол аркалы яшамагымыз үчин Худай Өзүниң ялңыз Оглуны дүнйә иберди. Биз Худайы дәл, эйсем, Ол бизи сөйүп, Өз Оглуны гүнәлеримизе багышланма газандырян гурбан эдип иберди. Ине, сөйги шудур» (1 Яхя 4:9, 10).

¹⁵ Иса Худайың адамзада билдирен сөйгүси барада шейле дийди: «Чүнки Худай дүнйәни көп сөййәнлиги үчин Оглуна иман эденлериң хич бири хеләк болман, эбеди яшайша говушсын дийип, Өзүниң екеҗе Оглуны берди» (Яхя 3:16). Ехованың ынсанлара болан сөйгүси шейле гүйчли велин, ол хатда өзүне улы йитги болса-да, адамлардан ягшылыгыны гайгырмаяр. Худайың сөйгүси эбедидир. Биз оңа элмыдама даянып билерис. Павлус ресул шейле язды: «Себәби мен не өлүмиң, не-де яшайшың, не перишделериң, не хөкүмдарларың, не-де гудратларың, не шу вагтың, не-де гелҗегиң, не белентлигиң, не-де чуңлугың ве не-де башга махлугың Реббимиз Месих Исада болан Худай сөйгүсинден бизи айырмагы башарҗагына ынанярын» (Рим. 8:38, 39).

16. Месихи Патышалык нәме ве Ехова Патышалык ыгтыярыны киме ынанды?

¹⁶ Худайың адамзада болан чәксиз сөйгүси Месихи Патышалык аркалы хем гөрүнйәр. Ехова бу хөкүмети адамлары йүрекден сөййән ве уссатлык билен хөкүм сүрмеги башарян Оглы Иса Месихе табшырды (Сүл. тым. 8:31). Гөкде Иса билен биле хөкүм сүрҗек 144 мүңлер хем ерде ынсан болуп яшандыгы үчин, адамларың ягдайына говы дүшүнйәрлер (Ылх. 14:1). Иса, эсасан, Худайың Патышалыгы барада гүррүң берйәрди. Ол шәгиртлерине шейле дога этмеги өвретди: «Эй гөклердәки Атамыз! Адың мукаддес болсун, Патышалыгың гелсин; гөкде болшы ялы, ерде-де Сениң ислегиң амала ашсын» (Мат. 6:9, 10). Шейле догаларың ерине етмеги Худая гулак асян адамлара бол берекетлери гетирер!

17. Патыша Иса Месих гүнәли ынсан хөкүмдарларындан нәмеде тапавутланяр? Дүшүндириң.

¹⁷ Гөкде сөйги билен хөкүм сүрйән Патыша Иса Месих ер йүзүндәки урушларда миллионларча адамларың өлмегине себәп болян ынсан хөкүмдарларындан, гөр, нәхили тапавутланяр! Иса өз раятларының аладасыны эдип, Худайың аҗайып хәсиетлерини, эсасанам, сөйгүсини гөркезйәр (Ылх. 7:10, 16, 17). Иса: «Эй аргынлар, агыр йүклүлер, Мениң яныма гелиң, Мен сизе дынчлык берейин. Мениң боюнтырыгымы дакының-да, Менден өврениң; чүнки Мен мылайым хем пес гөвүнлидирин, җанларыңыз дынчлык тапар. Чүнки Мениң боюнтырыгым юмшакдыр, йүкүм еңилдир» дийди (Мат. 11:28—30). Гөр, нәхили рухландырыҗы сөзлер!

18. а) Худайың Патышалыгы дикелдиленден бәри нәмелер эдилйәр? б) Биз индики макалада нәме барада гүррүң эдерис?

¹⁸ Мукаддес Язгылардакы пыгамберлиге гөрә, 1914-нҗи йылда Исаның барлыгының башланмагы билен, гөкде Худайың Патышалыгы беркарар эдилди. Шондан бәри Иса билен биле хөкүм сүрҗеклериң галындысы хем-де залым дүнйәден саг-аман гечип, Җеннетде яшаҗак «улы мәреке» йыгналяр (Ылх. 7:9, 13, 14). Улы мәреке нәче адамдан ыбарат? Бу топара дегишли адамлардан нәме талап эдилйәр? Бу сораглара индики макалада середерис.