83-нҗи хекая

Иерусалимиң диварлары

БУ ЕРДЕ эдилйән ишлере серет. Ысрайыллылар Иерусалимиң диварларыны гуряр. 152 йыл мундан озал Небукаднезар патыша Иерусалими басып алып, диварларыны юмруп, шәхериң дервезесини болса отлапды. Бабылдан өз юрдуна илкинҗи гайдып гелен ысрайыллылар тәзе дивар гурмандылар.

Шунча йыллап дивары болмадык шәхериң яшайҗылары өзүни нәхили дуяндыр өйдйәң? Элбетде, олар аркайын яшап билмейәрди. Душман ислән вагты чозуп билйәр. Ахырсоңы Нехемя халка тәзе диварлары гурмага көмек эдйәр. Нехемяның кимдигини билйәңми?

Ысрайыллы Нехемя Шушан шәхеринденди. Шол шәхерде Мордекай билен Эстер хем яшаярды. Ол патышаның көшгүнде гуллук эдйәрди. Нехемя Мордекайы ве Эстери говы танаян болмалы. Йөне Мукаддес Язгыларда Нехемяның Эстериң адамсы Ахашвероша гуллук эдендиги барада айдылмаяр. Ол Артахшашта патышаның дөврүнде гуллук эдйәр.

Артахшашта атлы говы патышаның Ехованың Иерусалимдәки ыбадатханасыны беҗермек үчин Эзра пул берени ядыңда болса герек. Йөне шәхериң диварларыны Эзра дикелтмеди. Оны Нехемя дикелдйәр. Оны Эзра дәл-де, нәме үчин Нехемяның дикелденини билели.

Артахшаштаның ыбадатхананы беҗермек үчин Эзра пул беренинден он үч йыл гечипди. Шонда Нехемя Артахшаштаның баш шерапчысы болуп гуллук эдйәр. Ол патыша берилйән шерабы хич ким зәхерлемез ялы, гөзегчилик эдйәрди. Бу өрән җогапкәрли ишди.

Бир гезек Нехемядан хабар тутмага Ысрайыл юрдундан доганы Ханани билен бирнәче адам гелйәр. Олар ысрайыллыларың чекйән кынчылыклары хем-де Иерусалимиң диварларының энтегем дикелдилмәндиги барада гүррүң берйәрлер. Нехемя муңа гаты гынанып, Ехова дога эдйәр.

Бир гүн патыша Нехемяның гамгындыгыны гөрүп: «Сен нәме үчин бейле гамгын?» дийип сораяр. Нехемя Иерусалимиң ягдайының агырдыгыны, диварларының болса йыкылып ятандыгыны айдяр. Патыша ондан: «Саңа нәме көмек герек?» дийип сораяр.

Нехемя: «Маңа Иерусалиме гидип, онуң диварларыны дикелтмәге ругсат бер» дийип, патышадан хайыш эдйәр. Артахшашта говы патышады. Ол Нехемя гитмәге хем-де гурлушык үчин герек агачлары алмага ругсат берйәр. Нехемя Иерусалиме гелип, халка өз этҗек ишлери барада айдяр. Халк хем оны голдап: «Гурарыс» диййәр.

Иерусалимиң диварларының тәзеден гуруляныны гөрүп, душманлар: «Йөрүң, олары өлдүрип, гурлушыга ёл бермәлиң» диййәрлер. Нехемя муны биленде, ишчилерине гылыч ве найза берип: «Душманлардан горкмаң, доганларыңыз, аялларыңыз, чагаларыңыз ве өйлериңиз үчин сөвешиң» диййәр.

Олар гиҗе-гүндиз ярагларыны тайярлап, гайдувсызлык билен гурлушыгы довам эдйәрлер. Бары-ёгы 52 гүнүң ичинде диварлары гуруп гутарярлар. Халк өзүни инди ховпсуз дуйяр. Нехемя билен Эзра болса халка Худайың кануныны өвредйәр. Шонда халк өзүни дийсең багтлы сайярды.

Йөне ысрайыллыларың дурмушы Бабыла есир дүшмезлеринден өң хас говуды. Халка Парс патышасы хөкүмдарлык эдйәр, олар болса оңа хызмат этмелидилер. Эмма Ехова халка парахатлык гетирҗек тәзе патыша беллеҗекдигини айдяр. Ол патыша кимкә? Ол нәдип ер йүзүне парахатлык гетирер? Бу 450 йылдан айдың боляр. Шонда тарыхда ады белли чага дүнйә инйәр. Бу барада биз индики бөлүмден билерис.

Нехемя китабының 1—6-нҗы баплары.