82-нҗи хекая

Мордекай ве Эстер

ГЕЛ, инди Эзраның Иерусалиме сыяхат этмезинден өң болан вакалара середели. Мордекай билен Эстер Парс патышалыгында таналян ысрайыллыды. Эстер патышаның аялы болды. Доганогланы Мордекай болса патышадан соң икинҗи хөкүмдар белленди. Гел, мунуң нәдип бейле боланыны билели.

Эстер энтек чагака ата-энеси арадан чыкяр, соңра оны Мордекай тербиелейәр. Ахашверош патышаның көшги Шушан шәхеринде ерлешйәрди. Мордекай болса хызматкәрлериниң бириди. Бир гезек Ахашверош патышаның аялы Вашти диенини этмейәр. Шонуң үчин патыша өзүне башга аял сайлаяр. Кими сайлаяныны билйәңми? Яш хем-де овадан гыз Эстери сайлаяр.

Улумсы адамы гөрйәңми? Оңа хеммелер баш эгйәр. Онуң ады Хаман. Ол Парс дөвлетинде белли адамды. Хаман Мордекайың хем баш эгмегини ислейәр. Мордекайың оңа баш эгеси гелмейәр. Ол бейле эрбет адама баш эгмеги нәдогры хасаплаярды. Хаманың оңа гаты гахары гелип, ине, нәмелер эдйәр.

Хаман Ахашвероша ысрайыллылары яманлап: «Олар эрбет адамлар, сениң канунларыңа гулак асмаярлар. Олары өлдүрмели» диййәр. Ахашверош болса аялы Эстериң ысрайыллыдыгыны билмейәрди. Шонуң үчин ол Хаманы диңләп, ысрайыллыларың әхлисини өлдүрмек барада бир гүн белләп, канун чыкаряр.

Мордекай муны эшидип, гынаняр. Ол Эстере: «Сен муны патыша айдып, бизи халас этмеги хайыш этмели» диййәр. Парс кануны боюнча патышаның янына чакылыксыз гирмек боланокды. Йөне Эстер чакылыксыз гирйәр. Патыша алтындан ясалан хасасыны оңа тарап узадяр. Бу Эстери өлдүрмели дәлдигини аңладяр. Эстер патышаны ве Хаманы нахара чагыряр. Нахар вагты патыша Эстерден ислегини сораяр. Шонда Эстер оларың эртеси гүн хем нахара гелмегини хайыш эдйәр.

Икинҗи гезек нахара геленде Эстер Ахашверош патыша: «Мени ве халкымы өлдүрҗек болярлар» диййәр. Патыша муңа гахарланып: «Ким муны этҗек боляр?» диййәр.

Эстер оңа: «Залым душманың ады Хаман!» дийип җогап берйәр.

Шонда патыша гаты гахарланып, Хаманы өлдүрмеги буюряр. Соңра ол Мордекайы патышадан соң икинҗи хөкүмдар беллейәр. Йөне ысрайыллыларың өлдүрилмели гүни якынлашярды, шонуң үчин Мордекай ысрайыллылары гораян тәзе канун чыкардяр. Мордекай белли адамды, шол себәпли көп адамлар ысрайыллылара көмек эдйәр ве олар душманларындан халас боляр.

Мукаддес Язгыларың Эстер китабы.