78-нҗи хекая

Эл дивара хат язяр

БУ ЕРДЕ нәме боляр? Олар улы байрамчылык беллейәр. Бабыл патышасы мүңлерче абрайлы адамлары мыхманчылыга чагырды. Олар Ехованың Иерусалимдәки ыбадатханасындан алнан алтындыр күмүш гаплардан ве кәселерден шерап ичйәрди. Эмма бирденкә адам эли пейда болуп, дивара хат язып башлаяр. Хеммелер гаты горкярлар.

Шол вагт Небукаднезарың агтыгы Белшазар хөкүм сүрйәрди. Ол акылдарлары чагырдып: «Ким бу хаты окап, манысыны дүшүндирсе, көп совгатлар алар ве патышалыкда үчүнҗи хөкүмдар болар» дийип ыглан эдйәр. Эмма акылдарлар хаты не окап, не-де дүшүндирип билдилер.

Патышаның эҗеси галмагалы эшидип, оларың янына гелйәр. Ол: «Горкма, патышалыкда мукаддес худайлары билйән бир адам бар. Сениң атаң Небукаднезар патышака, оны хемме акылдарларың башы эдип белледи. Онуң ады Даниел. Оны чагыртсаң, бу затларың барысыны дүшүндирер» диййәр.

Шейлеликде, шол вагтың өзүнде Даниели чагырярлар. Ол совгатлары алмаяр. Йөне Ехованың нәме себәпден Белшазарың атасы Небукаднезары патышалыкдан айрандыгыны гүррүң берйәр. «Ол өрән улумсы адамды, шонуң үчин Ехова оңа темми берди» дийип, Даниел дүшүндирйәр.

Даниел Белшазара йүзленип: «Небукаднезар билен болан затларың барысыны билсең-де, сенем улумсылык этдиң. Сен Ехованың ыбадатханасындан гапдыр кәселери алып, олардан шерап ичдиң. Агачдан ве дашдан ясалан таңрылары шөхратландырдың, эмма Бейик Ярадыҗыны шөхратландырмадың, шонуң үчинем Худай бу сөзлери яздырды» диййәр. «Язылан сөзлериң окалышы шейле: «МЕНЕ, МЕНЕ, ТЕКЕЛ ве ИФАРСИН».

МЕНЕ сөзүниң манысы: Худай сениң патышалыгың гүнлерини санады ве оны элиңден алар. ТЕКЕЛ сөзүниң манысы: сени терезиде чекип, хич зада мынасып гөрмеди. ИФАРСИН болса, сениң патышалыгың мидиялылар билен парслара берлер диймекдир».

Даниел бу сөзлери айдып дурка, мидиялылар хем-де парслар Бабыла чоздулар. Олар шәхери басып алып, Белшазары-да өлдүрдилер. Дивара язылан хат шол гиҗе ерине етди! Йөне инди ысрайыллылара нәме боларка? Тизден муны билерис, йөне илки билен, гел, Даниеле нәме боланыны билели.

Даниел 5:1—31.