21-нҗи хекая

Доганлары Юсубы йигренйәр

БУ ГАЙГЫЛЫ ве лапыкеч яш йигиде серет. Бу Юсуп. Эдил шу вагт доганлары оны Мүсүре барян адамлара сатдылар. Ол ерде Юсуп гул болар. Йөне нәме үчин онуң атабир доганлары бейле яманлык этдилеркә? Себәби олар Юсуба гөриплик эдйәрдилер.

Атасы Якуп Юсубы говы гөрйәрди. Шол себәпли оңа узын хем овадан гейим тикип берди. Муңа он доганы гөриплик эдип, оны йигрендилер. Йөне оларың йигренмегиниң башга-да себәби барды.

Юсуп ики саны дүйш гөрди. Дүйшлериниң икисинде-де доганлары оңа баш эгдилер. Хачан-да Юсуп дүйшүни гүррүң беренде, оны хас-да бетер йигрендилер.

Бир гезек Юсубың доганлары атасының сүрүсини бакып йөркә, Якуп Юсубы доганларындан хабар тутмага иберйәр. Доганлары Юсубың гелйәнини гөренде: «Гелиң, оны өлдүрелиң!» дийдилер. Эмма иң улы доганы Рубен: «Ёк, өлдүрмәлиң!» дийди. Шонда онуң гейимини чыкарып, Юсубы сувсуз гуя ташладылар. Соңра нәме этмелидигини маслахатлашдылар.

Шол вагт ысмайылыларың кервени гечип барярды. Яхуда доганларына йүзленип: «Гелиң, оны ысмайылылара саталың» дийди. Олар шейле-де этдилер. Олар Юсубы йигрими күмүш теңңә сатдылар. Нәхили неҗислик хем доңйүреклик!

Йөне доганлар атасына нәме диеркә? Олар гечини өлдүрип, Юсубың гейимини гана батырдылар. Соңра гейими атасы Якубың янына гетирип: «Ынха, бизиң тапан задымыз. Серет, бу Юсубың гейими-хә дәлдир-ле?» дийдилер.

Якуп Юсубың гейимини танады. Ол: «Оны йыртыҗы хайван өлдүрендир» дийип аглады. Шейлеликде, доганларың этҗек иши баша барды. Якуп гаты гам чекди. Ол көп гүнләп аглады. Эмма Юсуп дириди. Гелиң, оңа есирликде нәме боланыны билелиң.

Барлык 37:1—35.