11-нҗи хекая

Илкинҗи Әлемгошар

НУХ машгаласы билен гәмиден чыкып, илки билен, нәме эденини билйәңми? Ол Худая гурбан, ягны совгат берди. Сен муны ашакдакы суратдан гөрйәнсиң. Тупандан машгаласыны халас эдени үчин, Нух Худая миннетдарлык билдирип, маллардан совгат берди.

Сениң пикириңче, онуң совгады Ехова ярадымыка? Элбетде, ярады. Шонуң үчин ол Нуха дүнйәни гайдып хич хачан сув билен ёк этмеҗегини айтды.

Басым ер йүзүнде сув гурады. Соңра Нух машгаласы билен гәмиден чыкып, ене-де ер йүзүнде яшап башлады. Худай олара ак пата берип: «Ер йүзи долянча көпелиң» дийди.

Вагтың гечмеги билен адамлар улы тупан барада эшидип, шейле тупаның ене-де болмагындан горкмагы мүмкинди. Шонуң үчин Худай гайдып ер йүзүни тупан билен хеләк этмеҗегини ятладян бир аламат берди. Нәхили аламатдыгыны билйәңми? Әлемгошар.

Көпленч ягышдан соң гүн чыканда, әлемгошар пейда боляр. Әлемгошар дүрли овадан реңклерден ыбарат. Сен әлемгошары гөрүпмидиң? Оны суратда гөрйәңми?

Худай шонда шейле дийди: «Мен бүтин адамзады хем-де хайванлары тупан билен гайдып ёк этмеҗегими вада берйәрин. Мен әлемгошары булутда гойдум. Әлемгошар гөрненде, берен вадамы ядыма саларын».

Шонуң үчин сен әлемгошары гөреңде, ол саңа нәмәни ятлатмалы? Догры, Ехованың дүнйәни гайдып улы тупан билен ёк этмеҗекдигини ятлатмалы.

Барлык 8:18—22; 9:9—17.