25-нҗи хекая

Машгала Мүсүре гөчйәр

ЮСУП мундан артык өзүни саклап билмеди. Ол хызматкәрлерине отагдан чыкмагы буюрды. Доганлары билен еке галанда, Юсуп агламага башлады. Доганлары онуң нәме үчин аглаяндыгына дүшүнмән, гең галярлар. Ахыры ол: «Мен Юсуп. Какам энтек дирими?» диййәр.

Доганлары гең галып, гүрләп билмедилер. Горкудан яңа доңуп галдылар. Йөне Юсуп: «Хайыш эдйәрин, яныма гелиң» диййәр. Доганлары голайлашанда: «Сизиң Мүсүре сатан иниңиз Юсуп мен» диййәр.

Соңра доганларына мәхир билен йүзленип: «Мени бу ере сатаныңыз үчин өзүңизи гүнәкәрлемәң. Адамлары халас этмек үчин мени бу ере Худай иберди. Фараон мени бүтин юрда хәким эдип белледи. Шонуң үчин басым гидип, бу затлары какама гүррүң бериң. Гой, ол шу ере гелип яшасын» дийди.

Соңра Юсуп доганларының әхлисини гуҗаклап огшаяр. Фараона Юсубың доганларының геленини айданларында: «Гой, доганларың арабалары алып, какаңы хем-де машгалаларыны гидип гетирсинлер. Мен сизе Мүсүриң иң говы еринден ер берейин» дийди.

Олар шейле-де этдилер. Ашакдакы суратда гөршүң ялы, какасы бүтин машгаласы билен Мүсүре геленде, Юсуп оны гаршылаяр.

Шоңа ченли Якубың машгаласы җуда көпелипди. Якубы, чагаларыны ве агтыкларыны санасаң, Мүсүре 70 адам гөчүп гелди. Якубың машгаласында көп аяллар хем-де гуллар болан болмалы. Оларың әхлиси Мүсүрде ерлешдилер. Олара ысрайыллылар диййәрдилер, себәби Худай Якубың адыны Ысрайыл дийип үйтгедипди. Худай Ысрайыл халкыны говы гөрйәрди, онуң себәбини соңра билерис.

Барлык 45:1—28; 46:1—27.