29-нҗы хекая

Муса нәме үчин гачды?

СЕРЕТ, Муса Мүсүрден гачып баряр. Онуң ызындан ковалап барянлары гөрйәңми? Олар Мусаны нәме үчин өлдүрҗек болянларыны билйәңми? Онда нәме, гел, билели.

Муса Мүсүриң патышасы фараоның өйүнде улалды. Ол өрән акыллы ве белли адам болуп етишди. Муса өзүниң мүсүрли дәлдигини билйәрди. Себәби хакыкы эне-атасы ысрайыллы гулларданды.

Бир гезек Муса кырк яшларындака халкының яшайшыны гөрмекчи болды. Халкының чекйән гөргүсини гөрүп гынанды. Ол бир мүсүрлиниң ысрайыллы гулы уруп дураныны гөрди. Даш-төверегинде хич кимиң ёклугыны билип, Муса мүсүрлини уруп өлдүрди. Соңра Муса оны гума гөмди.

Эртеси Муса халкындан ене-де хабар алмага чыкды. Ол халкына көмек эдип, гулчулыкдан чыкарарын өйдйәрди. Ол инди уршуп дуран ики ысрайыллыны гөрди. Шонда гүнәкәре йүзленип: «Сен нәме үчин өз доганыңы уряң?» дийди.

Ол җогап берип: «Бизиң үстүмизден сени ким ёлбашчы я казы эдип белледи? Мүсүрлини өлдүршиң ялы, менем өлдүрҗек болян-а дәлсиң?» дийди.

Муса горкды, себәби адамлар мүсүрлини өлдүренини билен болмалы. Оны хатда фараонам билип, Мусаны өлдүрмәге адам иберди. Ине, шонуң үчинем Муса Мүсүрден гачмалы болды.

Муса Мүсүрден узакда ерлешйән Мидиян юрдуна гачып барды. Ол ерде Етроның машгаласы билен таншып, онуң Сиппора атлы гызына өйленди. Муса Етроның гоюн чопаны болды. Ол Мидиян юрдунда кырк йыл яшады. Ол эййәм сегсен яшындады. Ине, бир гезек Муса Етроның гоюнларыны бакып йөркә, бир тәсин вака болды. Шол вака онуң дурмушыны бүтинлей үйтгетди. Индики сахыпадан шол вака барада окап билерсиң.

Чыкыш 2:11—25; Ресулларың ишлери 7:22—29.