32-нҗи хекая

Он җеза

БУ СУРАТЛАРА серет. Хер суратда Ехованың Мүсүре берен он җезасының бири гөркезилен. Биринҗи сурата серет. Харун хасасы билен Нил дерясына уряр. Деряның сувы болса гана өврүлйәр. Әхли балык хеләк боляр ве дерядан эрбет ыс гелип башлаяр.

Индики җеза гурбагаларды. Ехова Нил дерясындан гурбагалары чыкарды. Олар печлерде, гап-гачларда хем-де ёрган-дүшеклерде, умуман, әхли ерде барды. Хачан-да гурбагалар өленде мүсүрлилер олары улы үйшмеклере үйшүрдилер. Ер болса олардан яңа порсады.

Соңра Харун хасасыны ере уранда, тозан туруп чиркейлере өврүлди. Чиркейлер эрбет чакян мөр-мөҗеклер. Бу Мүсүре берлен үчүнҗи җезады.

Галан җезалар болса диңе мүсүрлилере зыян етирип, ысрайыллылара асла дегмеди. Дөрдүнҗи җеза улы сиңеклерди. Олар топлум болуп, хер бир мүсүрлиниң өйүне гирйәрди. Бәшинҗи җеза хайванлара зыян етирди. Бу җезадан мүсүрлилериң көп сыгырлары, гоюнлары хем-де гечилери хеләк болды.

Соңра Муса билен Харун эллерине күл алып ёкарык зыңдылар. Бу адамларда ве хайванларда эрбет чыбанлары дөретди. Бу алтынҗы җезады.

Онсоң Муса элини асмана галдыранда, Ехова гөк гүррүлдедип долы ягдырды. Бу Мүсүриң тарыхында иң эрбет долы яган тупанды.

Секизинҗи җеза чекиртгелериң бир гиден улы сүрүсиди. Шондан өң хем-де соң шейле көп чекиртге хич хачан болманды. Олар долыдан галан әхли өсүмликлери ийдилер.

Докузынҗы җеза түмлүкди. Үч гүнләп ер йүзи түм гараңкы болды. Эмма ысрайыллыларың яшаян ери өңкүси ялы ягтыды.

Ахырсоңы Худай ысрайыллылара гапыларының сөесине овлак я гузының ганыны чалмагыны табшырды. Шондан соң Худайың перишдеси Мүсүриң ичинден гечип гитди. Перишде гапысына ган чалнан өйлерден хич кими өлдүрмеди. Эмма Худайың перишдеси гапыларына ган чалынмадык хер бир өйден адамларың ве хайванларың илкинҗи чагаларыны өлдүрди. Бу онунҗы җезады.

Онунҗы җезадан соң фараон ысрайыллыларың юртдан чыкмагыны буюрды. Худайың халкы гитмәге тайярды ве шол гиҗәниң өзүнде олар Мүсүрден чыкдылар.

Чыкыш 7—12-нҗи баплар.