23-нҗи хекая

Фараоның дүйши

АРАДАН ики йыл гечди. Юсуп хенизем түрмедеди. Шерапчы болса Юсубы ядына-да салмады. Ине, бир гезек гиҗе фараон ики саны үйтгешик дүйш гөрйәр. Олары ёрмага сынанышяр. Сен суратда уклап ятан фараоны гөрйәңми? Ол эртир ирден акылдарларыны чагырып, дүйшүни гүррүң берйәр. Йөне олар дүйши ёруп билмейәр.

Эдил шол вагт шерапчының ядына Юсуп дүшйәр. Ол фараона: «Мен түрмедекәм, дүйш ёруп билйән бир адам барды» диййәр. Фараон шол вагтың өзүнде Юсубы түрмеден гетирдйәр.

Соңра фараон Юсуба дүйшүни гүррүң берйәр: «Мен дүйшүмде еди саны овадан, семиз сыгыр гөрдүм. Соңра еди саны гапыргасы санаймалы хор сыгыр гөрдүм. Онсоң хор сыгырлар семиз сыгырлары ийдилер.

Икинҗи гезек дүйшүмде бир балдакда оңат етишен еди башлы бугдай гөрдүм. Соңра башга бир юка балдакда еди башлы, дәнелери гуран бугдайы гөрдүм. Онсоң юка балдакдакы бугдайлар, оңат етишен бугдайы ювутдылар».

Юсуп фараона: «Ики дүйшүң хем манысы бир. Еди семиз сыгыр ве еди оңат етишен бугдай, еди йылы аңладяр. Еди хор сыгыр ве еди башлы дәнелери гуран бугдай болса, башга бир еди йылы аңладяр. Еди йыл Мүсүрде болчулык болар, соңра еди йыл ачлык гелер» диййәр.

Шонуң үчин Юсуп фараона: «Акылдар бир адам сайлап, оны болчулык дөврүнде бугдай йыгнамак үчин баш эдип белле. Шонда еди йыл ачлык дөврүнде, адамлар хор болмаз» диййәр.

Бу пикир фараона яраяр. Бугдай йыгнамага Юсубы баш эдип беллейәр. Шейдип Юсуп Мүсүрде фараондан соң икинҗи адам боляр.

Секиз йылдан ачлык башланда, Юсуп янына гелйән бирнәче адамы гөрйәр. Оларың кимдигини билйәңми? Бе, олар Юсубың он доганы ялы-ла! Якуп олары чөрек үчин Мүсүре иберди, себәби Кенганда чөрек гутарыпды. Юсуп доганларыны танаяр, йөне олар оны танамаяр. Себәбини билйәңми? Себәби Юсуп улы йигит болуп етишипди ве башгача гейненди.

Юсуп чагалыкда гөрен дүйшүнде доганларының гелип, баш эгенини ядына салды. Ядыңдамы, биз бу барада окапдык? Шонда Юсуп өзүни Худайың Мүсүре ягшы ниет билен иберендигине дүшүнди. Сениң пикириңче, Юсуп инди нәме эдеркә? Гел, билели.

Барлык 41:1—57; 42:1—8; 50:20.