24-нҗи хекая

Юсуп доганларыны сынаяр

ЮСУП бирвагткы неҗис ве доңйүрек доганларының үйтгәнини я-да үйтгемәнини билҗек боляр. Шонуң үчин: «Сиз ичалы. Сиз юрдумызың говшак ерлерини гөрмәге гелдиңиз» диййәр.

Олар: «Ёк, биз ичалы дәл. Биз догручыл адамлар. Бизиң барымыз доган. Биз он ики догандык. Йөне бири ёк, кичи инимиз болса какамызың янында галды» диййәрлер.

Юсуп олара ынанмадык боляр. Ол Шимеон диен доганыны түрмә салып, бейлеки доганларына болса: «Индики гезек гелениңизде, кичи иниңизи яныңыз билен гетириң» дийип, олара бугдай берип уградяр.

Олар Кенган юрдуна, ягны өйүне баранда, болан затлары какасына гүррүң берйәрлер. Якуп гаты гайга батяр. Ол: «Юсуп ёк, инди болса Шимеон-да ёк. Кичи оглум Бенямини ибермерин» дийип аглаяр. Эмма оларың иере зады гутаряр. Шонда Якуп машгаласы үчин бугдай гетирмәге, доганлары билен Бенямини Мүсүре ибермели боляр.

Шейлеликде, Юсуп доганларының гелйәнини гөрйәр. Ол иниси Бенямини гөренине гаты бегенйәр. Элбетде, олар бу абрайлы адамың Юсупдыгыны билмейәрди. Бу гезек Юсуп атабир доганларыны башгача сынаяр.

Ол хызматкәрлерине доганларының халталарыны бугдайдан долдурмагы буюряр. Соңра Беняминиң халтасына өз күмүш кәсесини билдирмән саляр. Олар яңы араны ачанда, Юсуп ызындан хызматкәрлерини иберйәр. Хызматкәрлер ызындан етип: «Бизиң хоҗайынымызың күмүш кәсесини нәме үчин огурладыңыз?» диййәрлер.

Олар: «Биз онуң кәсесини алмадык. Эгер-де кәсе кимден чыкса, гой, ол өлдүрилсин» дийдилер.

Шейлеликде, сениң суратда гөршүң ялы, хызматкәрлер халталары дөкүшдирип, күмүш кәсәни Беняминиң халтасындан тапярлар. Шонда олар: «Хеммәңиз гидип билерсиңиз, эмма Бенямин бизиң билен галар» дийдилер. Он доган инди нәме эдеркә?

Оларың хеммеси Бенямин билен Юсубың өйүне доланярлар. Юсуп доганларына: «Сиз өйүңизе гидип билерсиңиз, Бенямин болса маңа гул болар» диййәр.

Шонда Яхуда ялбарып: «Эгер-де мен өе бу оглансыз барсам, какам өлер, себәби оны говы гөрйәр. Хайыш эдйән, мени гул эдиң, огланы өе гойберәйиң» диййәр.

Юсуп доганларының үйтгәнини гөрйәр. Инди олар өңкүси ялы неҗис хем доңйүрек дәл. Гел, Юсубың соңра нәме эденини билели.

Барлык 42:9—38; 43:1—34; 44:1—34.