19-нҗы хекая

Якубың улы машгаласы

БУ МАШГАЛАНЫҢ улудыгыны бир гөрсене. Булар Якубың он ики оглы. Онуң гызлары хем бар. Якубың чагаларының адыны билйәңми? Гел, оларың кәбири билен таншалы.

Леаның догран огуллары: Рубен, Шимеон, Леви ве Яхуда. Рахел чагасының болмаяндыгына гынанды. Шонуң үчин ол Якуба гырнагы Билханы берди. Ондан ики огул, ягны Дан билен Нафтали догулды. Шонда Леа хем Якуба гырнагы Зилпаны берди. Ол Гад билен Ашери догурды. Соңра Леаның ене-де ики оглы, ягны Иссакар билен Забулун догулды.

Ахыры Рахелиңем чагасы болды. Онуң адына Юсуп дакды. Юсуп барада бираз соң хас көп затлары билерис, себәби ол белли адам болуп етишди. Шейлеликде, Якубың он бир оглы Лабаның өйүнде яшаярка догулды.

Якубың бирнәче гызлары болса-да, Мукаддес Язгыларда диңе Дина барада гүррүң берилйәр.

Вагтың гечмеги билен, Якуп Лабаның өйүнден Кенгана гайтмагы йүрегине дүвди. Шонуң үчин ол улы машгаласыны, биргиден гоюн сүрүсини ве башга-да малларыны йыгнап, узак ёла дүшди.

Якуп машгаласы билен Кенгана гайдып барярка, ёлда Рахелиң ене-де бир оглы болды. Рахел чага догранда, гаты эҗир чекип арадан чыкды. Эмма чага дири галды. Якуп оңа Бенямин дийип ат гойды.

Биз Якубың он ики оглуның адыны ятда сакламалы, себәби бүтин Ысрайыл халкы шолардан дөреди. Хакыкатдан-да, Ысрайылың он ики тайпасы, Якубың он оглы билен Юсубың ики оглуның адыны гөтерйәр. Ысхак Якубың огуллары боландан соң хем узак яшады. Белки-де, ол шейле көп агтыгының боланына гуванандыр. Йөне гел, онуң агтыгы Дина нәме боланыны билели.

Барлык 29:32—35; 30:1—26; 35:16—19; 37:35.