18-нҗи хекая

Якуп Харана гидйәр

ЯКУБЫҢ ким билен гүрлешйәнини билйәңми? Ол көп гүнләп ёл йөрәнсоң, бу адамлара гуйының башында душды. Олар гоюн бакярдылар. Якуп олардан: «Нирелисиңиз?» дийип сорады.

— Биз Харандан — дийип җогап бердилер.

— Сиз Лабаны танаяңызмы? — дийип, Якуп олардан сорады.

— Танаярыс. Серет, хана гоюн сүрүси билен гызы Рахелем гелйәр — дийдилер.

Хол аңырдакы Рахели гөрйәңми?

Якуп дайысы Лабаның гоюн сүрүси билен Рахелиң гелйәнини гөрди. Шонда гоюнлары сува якмак үчин, гуйының агзындакы дашы айырды. Соңра ол Рахели огшап, өзүни танатды. Рахел алҗырап өйүне гитди-де, атасы Лабана бар зады гүррүң берди.

Якуп Лабаның өйүнде дүшледи. Лабан муңа дийсең бегенди. Шонуң үчин Якуп Лабандан гызына өйленмеги соранда, ол хасам бегенди. Эмма Лабан Якубың Рахел үчин еди йыл хызмат этмегини сорады. Якуп Рахели йүрекден сөййәндиги үчин разы болды. Йөне той тутмалы вагты геленде, нәме боланыны билйәңми?

Лабан Рахеле дерек улы гызы Леаны берди. Якуп Лабаның ене-де еди йыл хызматыны этмәге разы боланда болса, Лабан Рахели хем берди. Шол дөвүрде Худай адамлара көп аял алмага ругсат берйәрди. Йөне хәзир Мукаддес Язгыларың гөркезиши ялы, эркек адамың диңе бир аялы болмалы.

Барлык 29:1—30.