112-нҗи хекая

Гәми гарк боляр

СЕРЕТ, гәми бөлек-бөлек болупдыр. Сува бөкен адамлары гөрйәңми? Оларың кәбири кенара йүзүп гелйәр. Ол Павлус дәлми? Гел, оңа нәме боланыны билели.

Ядыңда болса, Павлус Кайсарияда ики йыл түрмеде отурыпды. Соңра оны бейлеки туссаг эдиленлер билен гәмә мүндүрип, Риме уградярлар. Гирит (Крит) адасының голайында гүйчли ел туряр. Ел шейле бир гүйчли болды велин, гәмини сүрмек башартмады. Гүндизине гүн, гиҗесине йылдыз гөрүнмеди. Көп гүн геченсоң, гәмидәки адамлар халас боларыс өйтмедилер.

Шонда Павлус еринден туруп, олара шейле диййәр: «Сизиң хич бириңиз өлмерсиңиз, диңе гәми гарк болар. Шу гиҗе Худайың перишдеси гелип: «Павлус, горкма! Сен Рим хөкүмдарының өңүнде дурмалы. Худай яныңдакы адамларың барысыны халас эдер» дийди».

Он дөрдүленҗи гүни, ярыгиҗә голай деңизчилер сувуң кемелйәндигини гөрдүлер! Гараңкылыкда гаяны сүсмекден горкуп, гәмини дурузмак үчин зынҗырлы демри сува оклаярлар. Эртир ирден кичирәк кенары гөрүп, оңа якынлашмага сынанышярлар.

Ынха, олар кенара голайлашанда, гәми бир чәгелиге дегип сакланды. Шонда толкунлардан яңа, ол бөлек-бөлек болуп башлады. Гәминиң ёлбашчысы: «Ким йүзүп билйән болса, илки сува бөксүн-де, кенара тарап йүзсүн. Галаныңыз болса, оларың ызындан бөкүң-де, гарк болмаз ялы гәмиден дөвлен агачлардан япышың» дийип буюрды. Олар шейле хем эдйәрлер. Перишдәниң айдышы ялы, гәмидәки 276 адамың хеммеси кенара чыкып, халас боляр.

Олар Малта атлы ада чыкдылар. Ерли яшайҗылар олары мәхирли гаршылап, аладасыны этди. Хова ачыланда болса, Павлусы башга гәмә мүндүрип, Риме уградярлар.

Ресулларың ишлери 27:1—44; 28:1—14.