106-нҗы хекая

Түрмеден бошадылдылар

СЕРЕТ, перишде түрмәниң гапысыны ачып, Исаның ресулларыны бошадяр. Гел, оларың түрмә нәдип дүшенини билели.

Бу вака Исаның шәгиртлерине мукаддес рух иненден соң боляр. Бир гезек Петрус билен Яхя Иерусалимдәки ыбадатхана тарап уграяр. Бир догабитди агсак адам ыбадатхананың гапысында отыр. Оны хер гүн бу ере гетирйәрдилер. Ол ыбадатхананың агзында отурып, пул дилейәрди. Петрус билен Яхяны гөренде, олардан хем пул диледи. Ресуллар нәме эдеркә?

Олар дурдулар-да, гедая серетдилер. Соңра Петрус: «Мениң пулум ёк, йөне барымдан саңа берейин. Исаның адындан диййәрин: ериңден туруп, йөре!» дийди. Онсоң, Петрус оны саг элинден тутуп галдырды. Ол шобада бөкүп турды-да, йөрәп башлады. Адамлар бу гудрата хайран галып, гаты бегендилер.

Петрус адамлара йүзленип: «Биз бу гудраты Исаны дирелден Худайың гүйҗи билен этдик» диййәр. Олар адамлара дүшүндирип дурка, дини ёлбашчылар гелйәр. Олар Петрус билен Яхяның Исаның дирелиши барада халка гүррүң берип дураныны гөрүп, гаты гахарланярлар. Шонуң үчин Петрус билен Яхяны тутуп түрмә басярлар.

Эртеси гүн дини ёлбашчыларың улы йыгнагы боляр. Ол ере Петрусы, Яхяны хем-де сагалан адамы гетирйәрлер. Олар ресуллардан: «Сиз муны хайсы гүйч билен этдиңиз?» дийип сораярлар.

Петрус олара Исаны дирелден Худайың гүйҗи билен эдендигини айдяр. Руханылар нәме этҗегини билмейәр, себәби олар гудратың боландыгыны билйәрдилер. Шонуң үчин Иса барада вагыз этмәң дийип, ресуллары гойберйәрлер.

Бирнәче гүн гечйәр. Ресуллар Иса барада вагыз этмеги ве сыркавлары сагалтмагы довам эдйәр. Бу гудратлар барада басым хеммелер эшидйәр. Шонуң үчин Иерусалимиң голайындакы шәхерлерден ресулларың янына сыркавлары гетирйәрдилер. Дини ёлбашчылар гөрипчилик эдип, ресуллары түрмә басярлар. Эмма олар түрмеде көп отурмады.

Суратда гөршүң ялы, Худайың перишдеси түрмәниң гапысыны ачяр. Перишде олара: «Чыкың, ыбадатхана барып, халка вагыз эдиң» дийди. Эртеси ирден дини ёлбашчыларың иберен адамлары ресулларың ёкдугыны гөрдүлер. Соңра олар ресулларың ыбадатханада халка вагыз эдип дураныны гөрди. Олары тутуп, меҗлисе гетирдилер.

Дини ёлбашчылар ресуллара йүзленип: «Иса хакда вагыз этмәң дийип, сизе берк табшырдык. Сиз болса, шол гүррүңлер билен Иерусалими долдурдыңыз» дийдилер. Ресуллар болса олара: «Илки билен, адамлара дәл-де, Худая гулак асмалы» дийдилер. Шонуң үчин олар «хош хабары» вагыз этмеги довам эдйәрлер. Эйсем, бизиң үчин говы гөрелде дәлми?

Ресулларың ишлери 3—5-нҗи баплар.