103-нҗи хекая

Япык гапыдан отага гирйәр

ПЕТРУС билен Яхя Исаның өлүси гойлан мазарың янындан гидйәрлер. Меръем болса ол ерде еке галып аглаяр. Өңки суратдан гөршүң ялы, ол эглип, мазара середйәр. Ол ерде ики перишдәни гөрйәр. Перишделер ондан: «Сен нәме үчин аглаяң?» дийип сораярлар.

Меръем олара: «Исаны мазардан әкидипдирлер. Оны ниреде гояндыкларыны билемок» диййәр. Соңра ызына середенде бир адамы гөрйәр. Ол адам Меръемден: «Кими гөзлейәң?» дийип сораяр.

Меръем багбандыр өйдүп: «Агамҗан, оны мазардан сен әкиден болсаң, ниреде гояныңы маңа айт» диййәр. Аслында, ол Исаның өзүди. Меръем оны танамады, себәби Иса ынсан тениндеди. Йөне Иса онуң адыны тутанда Меръем танады. Соңра Меръем шәгиртлериң янына ылгап барып: «Мен Исаны гөрдүм!» диййәр.

Шол гүн ики саны шәгирт Эммаус диен оба баряркалар, олара бир адам душяр. Шәгиртлер Исаның өлүмине гаты гынанярдылар. Ёлда баряркалар, шол адам олара Мукаддес Язгылардан көп затлары дүшүндирйәр. Шондан соң, олар рахатланяр. Олар онуң билен ийип-иченлеринде, бу адамың Исадыгыны билйәрлер. Шонда Иса бирден йитирим боляр. Шәгиртлери муны ресуллара айтмак үчин ызына Иерусалиме ылгап гайдярлар.

Иса шол вагт Петруса-да гөрүнйәр. Муны эшиден бейлеки шәгиртлери хем гаты бегенйәрлер. Соңра шол ики шәгирт Иерусалиме гелип ресуллары тапярлар. Олар ресуллара ёлда Исаны гөрендигини айдярлар. Шол барада гүррүң эдип дуркалар, нәме боланыны билйәңми?

Сурата серет. Гапы япык болса-да, Иса отагда пейда боляр. Шәгиртлери муңа дийсең бегенйәр! Эйсем, бу гүн шатлыклы гүн дәлми? Исаның шәгиртлерине нәче гезек гөрненини санап билҗекми? Сениң сананларың бәше етдими?

Иса шәгиртлерине гөрненде оларың арасында Томас ресул ёкды. Шонуң үчин ресуллар оңа: «Биз Ребби гөрдүк!» диййәрлер. Эмма Томас өз гөзи билен гөрмесе, ынанмаҗагыны айдяр. Секиз гүнден шәгиртлер бир отагда ене-де йыгнанып, гапысыны гулплаярлар. Бу гезек оларың арасында Томас хем барды. Бирденкә Иса отагда пейда боляр. Шонда Томас хем ынаняр.

Яхя 20:11—29; Лука 24:13—43.