99-нҗы хекая

Ёкаркы отагда

ИКИ гүн гечди. Бу гүн хепдәниң дөрдүнҗи гүни, агшам. Иса 12 ресулы билен Пасха нахарыны иймәге ёкаркы отага чыкды. Отагдан чыкып барян адам Иуда Искариот. Ол Исаны тутмага көмек этмек үчин, руханыларың янына баряр.

Бир гүн өң Иуда оларың янына гелип: «Исаны тутуп берсем, маңа нәме берерсиңиз?» дийип сорады. Олар хем оңа: «Отуз күмүш теңңе берерис» дийдилер. Хәзир Иуда Исаның ниредедигини айтмага баряр. Эйсем, онуң эдйәни эрбет иш дәлми?

Пасха нахарыны ийип, Иса тәзе бир үйтгешик агшам нахарыны гиризди. Ол ресуллара чөрек берип: «Муны ийиң, себәби бу мениң сиз үчин берҗек беденим» дийди. Соңра шераплы кәсәни берип: «Муны ичиң, себәби бу мениң сиз үчин дөкйән ганым» дийди. Инҗилде муңа «Реббиң нахары» я-да «Реббиң агшам нахары» дийилйәр.

Ысрайыллылар Пасха нахарыны ийип, Мүсүрде Худайың перишдесиниң ысрайыллыларың өйүниң «гапдалындан гечип», мүсүрлилериң болса илкинҗи чагаларыны өлдүрендигини ятлаярдылар. Инди Иса шәгиртлери үчин җаныны берендигини ятлатмак ислейәр. Шонуң үчин олара бу үйтгешик агшам нахарыны хер йыл беллемеги табшыряр.

Реббиң агшам нахарындан соң, Иса ресулларының мерт хем-де иманда берк болмалыдыгыны айтды. Иң соңунда, олар Худая өвги айдымларыны айдып гайдярлар. Хәзир эййәм яры гиҗеденем гечипди. Гел, оларың нирә гиденини билели.

Матта 26:14—30; Лука 22:1—39; Яхя 13—17-нҗи баплар; 1 Коринтослылар 11:20.