95нҗи хекая

Исаның өвредиши

БИР гезек Иса бир адама якыныны сөймелидигини айдяр. Шонда ол адам Исадан: «Мениң якыным ким?» дийип сораяр. Иса ол адамың пикирини билйәрди. Ол адам диңе өз миллетинден ве дининден болан адамлары якыны хасаплаярды. Шонуң үчин Исаның оңа нәме җогап беренини билели.

Иса бир зады өвретҗек боланда, хайсыдыр бир ваканы гүррүң берйәрди. Бу гезек хем ол шейле эдйәр. Ол бир ехуды ве самариялы адам барада гүррүң берйәр. Ядыңда болса, ехудылар самариялылары халамаяр. Исаның гүррүң берен вакасына середели.

Бир гүн бир ехуды даглык ёлдан Эриха барярка, гаракчыларың элине дүшйәр. Онуң пулларыны алып, өзүни хем енҗип, чалаҗан ташлап гидйәрлер.

Бираз вагтдан шол ёлдан бир ехуды руханы гечйәр. Шонда ол урлан адамы гөрйәр. Руханы нәме эдендир өйдйәң? Ол ёлуң бейлеки тарапы билен гечип гидиберйәр. Соңра башга бир левили худайхон адам шол ёлдан барярды. Ол нәме эдендир өйдйәң? Ол хем урлан адама көмек этмән гечип гидйәр. Руханы билен левили адамың ашакы ёлдан баряныны гөрйәңми?

Онда урлан адамың янындакы кимкә? Ол самариялы адам. Самариялы адам онуң яраларына дерман чалып даңяр. Соңра оны дынч алып, сагалар ялы ере элтйәр.

Иса бу ваканы гүррүң берип, оңа сораг берен адамдан: «Сениң пикириңче, үч адамың хайсысы урлан адамың якыны боляр: руханымы, левилими я-да самариялы адаммы?» дийип сораяр.

Ол:

— Самариялы адам. Себәби ол урлан адама ягшылык этди — дийип, җогап берйәр.

Иса оңа:

— Догры айдяң. Шонуң үчин бар, сен-де адамлара шонуң ялы эт — диййәр.

Иса уссатлык билен өвредйәр герек? Исаның Инҗилде айдян затларыны диңлесек, биз көп оңат затлар өвренерис, шейле дәлми?

Лука 10:25—37.