88-нҗи хекая

Яхя Исаны сувда чокундыряр

СЕРЕТ, бу адамың үстүне кепдери гоняр. Бу Иса. Ол хәзир 30 яшында. Онуң янындакы адам Яхя. Ядыңдамы, Меръем Элизабетиң янына баранда, Элизабетиң гөвресиндәки чага бегенҗинден яңа гымылдапды? Ол чага хениз догулмадык Яхяды. Эйсем, Иса билен Яхя хәзир нәме эдйәркә?

Яңыҗа Яхя Исаны Иордан дерясына чүмдүрип чыкарды. Шейдип адамлары сувда чокундырярлар. Йөне Яхя Исаны нәме үчин сувда чокундырдыка?

Исаның өзи гелип, сувда чокундырмагы хайыш этди. Яхя болса эден эрбет ишлерине гынанян адамлары сувда чокундырярды. Эйсем, Иса эрбет иш этдими? Ёк! Эрбет иш этмеди, себәби ол Худайың гөкден гелен Оглы. Диймек, башга себәби болмалы. Гел, мунуң себәбини билели.

Иса агач уссасыды. Агач уссасы агачдан стол, отургыч ялы дүрли затлары ясаяр. Меръемиң әри Юсуп агач уссасыды. Ол бу иши Иса-да өвретди. Йөне Ехова Исаны ер йүзүне агач уссасы болмак үчин ибермәнди. Ол Исаны бир юмуш билен иберипди. Инди оны ерине етирмегиң вагты гелди. Шонуң үчинем Яхядан сувда чокундырмагы хайыш этди. Шейдип, Иса Худайың ислегини ерине етирмәге тайярдыгыны гөркезди. Худай Исадан разымыка?

Элбетде, разы. Себәби Иса сувдан чыканда, гөкден бир сес: «Бу мениң Оглум, мен ондан көп разыдырын» дийди. Гөк ачылып, Исаның үстүне кепдери инйәр. Бу хакыкы кепдери дәлди. Йөне ол кепдерә меңзешди. Аслында, бу Худайың мукаддес рухуды.

Инди Иса көп затлар барада ойланмалыды. Шонуң үчин ол 40 гүнлүк чола ере гидйәр. Ол ерде онуң янына Шейтан баряр. Шейтан оңа Худайың кануныны боздурҗак болуп, үч гезек сынанышяр. Эмма Иса оңа гулак асмаяр.

Соңра Иса гайдып геленде, бирнәче адама душяр, олар онуң илкинҗи шәгиртлери боляр. Ине, оларың кәбирлериниң атлары: Андреас, Петрус (шейле хем оңа Симун диййәрлер), Филипус ве Натанаел (шейле хем оңа Бартоломеус диййәрлер). Иса шәгиртлери билен Җелилә гитди. Җелиледе олар Натанаелиң шәхерине, Кана бардылар. Бу ерде Иса тоя барып, илкинҗи гудратыны гөркезйәр. Нәхили гудрат гөркезенини билйәңми? Сувы шераба өвүрди.

Матта 3:13—17; 4:1—11; 13:55; Маркус 6:3; Яхя 1:29—51; 2:1—12.