87-нҗи хекая

Яш Иса ыбадатханада

УЛУЛАР билен геплешип отуран огланҗыга серет. Бу адамлар Худайың Иерусалимдәки ыбадатханасының мугаллымлары. Огланҗык болса Иса. Ол эййәм улалды. Ол хәзир 12 яшында.

Мугаллымлар Исаның Худай хакда ве Мукаддес Язгылар барада көп затлары билйәнине хайран галяр. Йөне бу ерде нәме үчин Юсуп билен Меръем ёк? Олар ниредекә? Гел, билели.

Хер йыл Юсуп машгаласы билен Иерусалиме Пасха дийилйән улы байрамчылыга барярды. Насыра шәхери Иерусалимден узакда ерлешйәр. Адамларда не машын, не-де отлы барды. Шол дөвүрлерде машындыр отлы асла ёкды. Көп адамлар пыяда йөрейәрди. Иерусалиме бармак үчин үч гүне голай вагт герекди.

Юсубың башга-да чагалары барды. Шонуң үчин ол Исаның кичи доганларына серетмели болярды. Ынха, Юсупдыр Меръем чагалары билен өйүне, Насыра тарап узак ёла дүшмели боляр. Олар Исаны ёлагчыларың арасындадыр өйдйәрлер. Йөне агшамара дынч алмак үчин дуранларында, Исаның ёкдугыны билйәрлер. Ол гарындашларының хем-де достларының арасында ёкды. Шонуң үчин олар Иерусалиме доланып, Исаны гөзлемәге башлаяр.

Ахыры олар Исаны шу мугаллымларың арасындан тапярлар. Иса үнсли диңләп, олара сораг берйәрди. Исаны диңлейәнлериң барысы онуң акылына хайран галяр. Эмма эҗеси: «Оглум, сен нәме бейле этдиң? Какаң билен сени гөзләп гайгы этдик» диййәр.

Иса олара: «Мени нәме үчин гөзледиңиз? Сиз мениң Атамың өйүнде болмалыдыгымы билмейәрмидиңиз?» дийди.

Хава, Иса Худай барада билим берилйән ерде болмагы говы гөрйәрди. Бизде хем шейле ислег болмалы дәлми нәме? Иса сежде этмек үчин, өз яшаян шәхери Насырадакы душушыклара хер хепде гатнаярды. Шол душушыкларда үнсли диңләни үчин, Мукаддес Язгылары говы билйәрди. Гел, бизем Иса ялы болалы.

Лука 2:41—52; Матта 13:53—56.