114-нҗи хекая

Эрбетлик ёк эдилер

СЕН суратда нәме гөрйәң? Догры, ак атлы гошун. Серет, олар ниреден гелйәр? Олар гөкден, булутларың үсти билен гелйәр! Гөкде атлар яшаярмы нәме?

Ёк, яшанок. Олар хакыкы атлар дәл. Хакыкы атлары булудың үстүнде чапып болярмы нәме? Эмма Мукаддес Язгыларда гөкдәки атлар барада айдыляр. Себәбини билйәңми?

Себәби озал атлары сөвешде уланярдылар. Гөкден гелйән атлылар болса, Худайың ердәки адамлара гаршы сөвешйәндигини аңладяр. Сөвеш болҗак ере нәме дийилйәнини билйәңми? Ол ере Армагеддон дийилйәр. Шол сөвешде ердәки әхли эрбетликлер ёк эдилер.

Армагеддонда болҗак сөвеше Иса баштутанлык эдер. Ядыңда болса, Ехова Исаны өз хөкүметине патыша белләпди. Шонуң үчин Исаның келлесинде патышалык тәҗи бар. Онуң элиндәки гылыч болса, Худайың әхли душманларыны ёк этҗекдигини аңладяр. Сен Худайың әхли эрбетликлери ёк этҗекдигине ынанярмың?

10-нҗы хекая серет. Сен ол ерде нәме гөрйәң? Догры, Нухуң тупанында эрбетлер ёк эдилйәр. Бу тупаны ким этдикә? Оны Ехова Худай этди. Инди болса 15-нҗи хекая серет. Сен бу ерде нәме гөрйәң? Ехова Содомы ве Гомораны гөкден от ягдырып ёк эдйәр.

Инди 33-нҗи хекая серет. Мүсүрлилериң атларына ве харбы арабаларына серет. Олары ким сува гарк этдикә? Элбетде, Ехова. Шейдип ол өз халкыны халас эдйәр. Инди 76-нҗы хекая серет. Сен бу бапда Ехованың ысрайыллылар хатда өз халкы болса-да, олары эрбет ишлери үчин ёк эдендигини гөрерсиң.

Шонуң үчин Ехованың гөкдәки гошуныны иберип, ердәки эрбетлиги ёк этҗекдигине хайран галмалы дәл. Шондан соң болҗак затлар барада ойланып гөр! Оны индики сахыпадан билерис.

Ылхам 16:16; 19:11—16.