42-нҗи хекая

Геплейән эшек

ОЗАЛ геплейән эшек барада эшитдиңми? «Хайванлар гепләп биленог-а» диймегиң мүмкин. Йөне Мукаддес Язгыларда геплейән эшек барада айдыляр. Гел, муны билели.

Ысрайыллылар Кенган юрдуна гирҗек болуп дурды. Моабың патышасы Балак ысрайыллылардан гаты горкярды. Ол ысрайыллылары нәлетлетмек үчин Балам атлы мекир адамың янына бирини иберйәр. Балам Балакың көп пул берҗегини эшиденде, эшегине мүнүп, онуң янына уграяр.

Ехова халкыны Баламың нәлетлемегини ислемейәр. Шонуң үчин Баламың ёлуны бекләп, оны сакламак үчин эли гылычлы бир перишде иберйәр. Балам перишдәни гөрмейәр, йөне эшек оны гөрйәр. Шонуң үчин эшек перишдеден совлуп гечҗек боляр. Ахыры болмансоң, ёлуң үстүнде ятыберйәр. Балам гаты гахарланып, эшеги таяклаяр.

Шондан соң, Ехова Балама эшегиң диен сөзлерини эшитдирйәр. Эшек оңа: «Мени урар ялы, мен саңа нәме этдим?» диййәр. Балам болса гахарланып: «Сен мениң үстүмден гүлҗек боляң, эгер мениң гылыҗым болан болса, сени дессине өлдүрердим!» диййәр.

Эшек болса: «Мен өң шейле этдимми?» диййәр.

Балам оя батып: «Ёк» диййәр.

Шол вагт Ехова Баламың гөзүни ачяр. Ол ёлуны беклән эли гылычлы перишдәни гөрйәр. Перишде оңа: «Сен нәме үчин эшегиңи уряң? Мен сениң ёлуңы беклемек үчин чыкдым, себәби сен Ысрайылы нәлетлемәге гитмели дәлсиң. Эгер эшегиң өңүмден совулмадык болса, онда мен сени өлдүрердим, эшегиңе болса хич зат этмездим» диййәр.

Балам: «Мен гүнә этдим. Ёлумда сениң дураныңы билмедим» дийди. Перишде Баламы гойберйәр. Ол шонда-да Балакың янына гидйәр. Балам Ысрайылы ене-де нәлетлеҗек боляр, эмма Ехова оны Ысрайыл халкына үч гезек пата бермәге меҗбур эдйәр.

Санлар 21:21—35; 22:1—40; 23:1—30; 24:1—25.