52-нҗи хекая

Гидеон ве 300 эсгери

БУ ЕРДЕ нәме боляныны гөрйәңми? Олар Ысрайыл гошуны. Олар эглип сув ичйәрлер. Оларың янында Гидеон атлы казы дур. Гидеон оларың сув ичишини сынлаяр.

Бу адамларың сувы ичишлерине үнс бер. Оларың кәбири сувдан эглип ичйәр. Бири болса даш-төверегине середип, сувы эли билен ичйәр. Оларың сувы нәдип ичиши ваҗыпды. Себәби Ехова Гидеона сересаплык билен сув ичйән адамлары сайлап, бейлекилери болса өйүне ибермеги табшырыпды. Гел, себәбини билели.

Ысрайыллылар ене-де кын ягдая дүшйәр. Олар ене-де Ехова гулак асмадылар. Шонда моаблылар олары гул эдйәр. Шонуң үчин ысрайыллылар ахы-нала билен Еховадан көмек сораярлар, Ехова-да оларың дилегини эшидйәр.

Ехова Гидеона гошун йыгнамагы табшыряр. Ол 32 мүң эсгер йыгнаяр. Ысрайыла гаршы болса 135 мүң эсгерли гошун йыгнаняр. Муңа гарамаздан, Ехова Гидеона: «Сениң яныңда адам гаты көп» диййәр. Ехова нәме үчин бейле дийдикә?

Эгер ысрайыллылар сөвешде еңселер, онда өзлери еңиш газанандырыс өйдердилер. Шол себәпли Ехованың көмеги герек болмады диймеклери мүмкинди. Шонда Ехова Гидеона: «Горкян адамлара айт, өйлерине долансын» диййәр. Соңра ене-де 22 мүң эсгер өйүне доланяр. Шейлеликде, душманың 135 мүң эсгерине гаршы сөвешмәге Гидеоның янында 10 мүң эсгер галяр.

Онда бу нәме?! Ехова Гидеона: «Сениң яныңда хенизем адам көп. Сен олары сувуң янына элтип, ким сувы эглип ичсе, шоны өйүне ибер» диййәр. Ехова оңа: «Мен саңа сувы сересаплы ичен 300 эсгер билен еңиш берерин» диййәр.

Сөвешмели вагт гелип етди. Гидеон 300 эсгерини үч топара бөлйәр. Хер эсгере сурнай билен ичи чыралы күйзе берйәр. Олар яры гиҗе душманың дүшелгесиниң дашыны габаяр. Шондан соң дең сурнай чалып, күйзелери дөвүп: «Ехованың ве Гидеоның гылыҗы!» дийип гыгырярлар. Оянан душманлар болса алҗырап, ховсала дүшүп гачярлар. Шейдип ысрайыллылар еңйәр.

Казылар 6—8-нҗи баплар.