40-нҗы хекая

Муса хасасыны гая уряр

АРАДАН он йыл гечди, йигрими йыл гечди, отуз йыл гечди ве отуз докуз йыл гечди! Ысрайыллылар болса хенизем чөлде гезип йөрдүлер. Эмма Ехова шол йылларда-да халкының аладасыны этди. Ол халкына иймит хөкмүнде манна берйәр. Ехова олары гүндизине булут сүтүни, гиҗесине болса от сүтүни билен алып барярды. Шол йылларың довамында оларың эшиклери көнелмеди, аяклары хем габармады.

Олар Мүсүрден чыкалы бәри, 40-нҗы йылың биринҗи айы башлапды. Ысрайыллылар Кадешде ене-де бирнәче топарлара бөлүнйәрлер. Бу ер 40 йыл мундан озал Кенган юрдуна 12 ичалының гелен ериди. Кадешде Мусаның аял доганы Меръем арадан чыкяр. Бу ерде ене-де кынчылык боляр.

Халк ичмәге сув тапмаяр. Олар Муса зейренип: «Биз өлен болсак говы боларды. Нәме үчин сен бизи Мүсүрден чыкарып, хич зат битмейән шу горкунч ере гетирдиң? Бу ерде не чөрек, не инҗир, не үзүм, не-де нар бар. Хатда ичмәге сувам ёк» дийдилер.

Муса билен Харун дога этмәге чадыра геленлеринде, Ехова Муса шейле диййәр: «Әхли халкы йыгна ве оларың гөзүниң өңүнде шу гая йүзлен. Шонда әхли адамлара ве хайванлара етер ялы сув акар».

Муса халкы йыгнап: «Эй, Худая ынанмаянлар, диңләң! Бу гаядан сизе сувы Харун билен мен бермелими?» диййәр. Соңра ол хасасыны гая ики гезек уряр велин, ондан шаглап сув акяр. Шол сув хемме адамлара ве хайванлара етйәр.

Йөне Ехова Муса билен Харуна гахарланяр. Билйәңми нәме үчин? Себәби Муса билен Харун гаядан сувы биз бердик дийдилер. Аслыетинде, сувы Ехова берипди. Муса билен Харун хакыкаты айтмандыгы үчин, Ехова олара темми берҗекдигини айдяр. Ол: «Мениң халкымы Кенгана сиз элтмерсиңиз» диййәр.

Тиз вагтдан ысрайыллылар Кадешден гидип, Ор дагына барярлар. Шол дагың депесинде Харун арадан чыкяр. Ол арадан чыканда 123 яшындады. Ысрайыллылар гаты гынанып, 30 гүнләп Харуның ясыны тутяр. Шондан соң онуң оглы Элиязар Ысрайыл халкына баш руханы боляр.

Санлар 20:1—13, 22—29; Кануның гайталанышы 29:5.