38-нҗи хекая

Он ики ичалы

БУ АДАМЛАРЫҢ гетирйән мивелерине бир серет. Үзүмиң улулыгыны гөрсене! Бу үзүми узын таякда гетирмек үчин ики адам герек болды. Шейле-де инҗире ве нара серет. Бу үйтгешик мивелери ниреден гетирдилеркә? Олары Кенган юрдундан гетирдилер. Ядыңда болса, Ыбрайым, Ысхак ве Якуп Кенганда яшапды. Эмма ол ерде ачлык боланда, Якуп машгаласы билен Мүсүре гөчди. Муса такмынан 216 йылдан ысрайыллылары ене-де Кенган юрдуна элтйәр. Олар чөлдәки Кадеш диен ере барярлар.

Кенган юрдунда эрбет адамлар яшаярды. Шол себәпли Муса 12 саны ичалыны ёллап: «Ол ерде нәче адамың яшаяндыгыны ве оларың гүйҗүни билиң. Хасыл алмак үчин ери оңатмы. Ол ериң мивесинден хөкман гетириң» дийип табшырды.

Ичалылар Кадеше гайдып геленде: «Хакыкатдан-да аҗайып юрт» дийдилер. Диенлерини субут этмек үчин болса, мивелериң кәбирлерини гөркездилер. Йөне оларың онусы: «Ол ерде узын бойлы ве гүйчли адамлар яшаяр, эгер-де биз ол юрды эелеҗек болсак, хеләк боларыс» дийип зейрендилер.

Муны эшиденде ысрайыллылар гаты горкдулар. Олар: «Мүсүрде я-да шу чөлде өлен болсак хем говы боларды. Биз сөвешде хеләк боларыс, аялларымызы ве чагаларымызы болса есир аларлар. Гелиң, Мусаның ерине башга ёлбашчы сайлап Мүсүре доланалың!» дийип зейренйәрлер.

Ичалыларың икиси болса Ехова бил баглап, халкы көшешдирҗек боляр. Оларың ады Ешув ве Калебди. Олар халка: «Горкмаң, Ехова биз билен болар. Юрды аңсатлык билен эеләрис» дийип гөвүнлик берйәр. Эмма халк олара гулак асмаяр, гайтам Ешувдыр Калеби өлдүрҗек болярлар.

Ехованың муңа гаты гахары гелйәр. Ол Муса: «20 яшдан улы хич бир адам Кенган юрдуна гирмез. Олар Мүсүрде ве чөлде гөркезен гудратларымы гөрселер-де, маңа ынанмадылар. Шонуң үчин оларың хеммеси өлйәнчә, 40 йыллап чөлде гезерлер. Диңе Ешув билен Калеб Кенган юрдуна гирер» дийди.

Санлар 13:2—34; 14:1—38.