48-нҗи хекая

Пайхаслы гибеонлылар

КЕНГАН шәхерлериниң көпүси сөвешмәге тайынды. Олар еңиш газанарыс өйдйәрдилер. Йөне Гибеон шәхериниң голайында яшаянлар бейле пикирде дәлдилер. Олар ысрайыллылара Худайың көмек эдйәндигине ынанярды. Шонуң үчин Худая гаршы сөвешмек ислемедилер. Шейлеликде, гибеонлыларың нәме эдендигини билйәңми?

Олар узакда ерлешйән бир юрдуң яшайҗылары болан болярлар. Бирнәче адам йыртык эшик ве көне аякгап гейип, йыртык халталары эшеклере йүкләп, янлары билен гатан чөрек аляр. Соңра Ешувың янына гелип: «Биз сизиң бейик Худайыңыз Ехова хакда, онуң Мүсүрде сизиң үчин эден ишлери барада эшидип, узак юртдан гелдик. Шонуң үчин бизиң ёлбашчыларымыз ёл үчин иймит алың дийдилер ве сизе: «Биз сизиң гулуңыз. Бизе гаршы сөвешмеҗегиңизе сөз бериң» дийип, айтмагы табшырдылар. Бу узак ёлда эшигимизиң көнелип, чөрегимизиң гатанына бир середиң» дийдилер.

Ешувдыр бейлеки ёлбашчылар гибеонлыларың диенине ынанып, олара гаршы сөвешмеҗегине сөз бердилер. Эмма олар үч гүнден гибеонлыларың хас голайда яшаяндыгыны билдилер.

— Сиз нәме үчин бизе даш юртдан гелдик дийдиңиз? — дийип, Ешув олардан сорады.

— Биз Ехова Худайың бүтин Кенган юрдуны сизе бермеги вада эденини эшитдик. Шонуң үчин бизи өлдүрерсиңиз өйдүп, горкымыза шейле этдик — дийип, гибеонлылар җогап берди. Ысрайыллылар болса берен сөзүнде дуруп, гибеонлылары өлдүрмән, өзлерине гул этдилер.

Иерусалимиң патышасы гибеонлыларың ысрайыллылар билен парахатлык багланышанына гаты гахарланяр. Шол себәпли ол бейлеки дөрт патыша: «Гелиң-де, маңа гибеонлылар билен сөвешмәге көмек эдиң» дийип хайыш эдйәр. Шейдип, бәш патыша гибеонлылара гаршы сөвеше чыкяр. Эйсем, гибеонлыларың парахатлык баглашмагы пайхаслы болдумыка? Гел, билели.

Ешув 9:1—27; 10:1—5.